سەنبى, 18 تامىز 2018
«سوقىر» فەميدا 1508 2 پىكىر 17 مامىر, 2018 ساعات 15:28

مەملەكەتكە 1,1 ترلن. تەڭگە شىعىن كەلتىرگەندەر كىمدەر؟

ىزدەۋدە جۇرگەن 82 لاۋىزىمدى تۇلعا مەملەكەتكە 1,1 ترلن تەڭگە كولەمىندە شىعىن اكەلگەن. بۇل تۋراسىندا بۇگىن ينتەرنەت-كونفەرەنتسيا بارىسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ حابارلادى.

- قازىرگى كەزدە جەمقورلىقپەن كۇرەس ۇلتتىق بيۋروسى 82 لاۋىزىمدى تۇلعاعا ىزدەۋ جاريالاعان، ولاردىڭ ۇشتەن ءبىر بولىگى شەتەلدە. ولار قىزمەتتىك وكىلەتىن اسىرا پايدالانۋ، پارا الۋ، ۇيىمداسقان قىلمىستىق توپ قۇرۋ، قارجى جىمقىرۋ جانە ءىزىن جاسىرۋ ىستەرى بويىنشا ىزدەستىرىلۋدە. ولار مەملەكەتكە جالپى سوماسى 1,1 ترلن تەڭگە كولەمدە شىعىن اكەلگەن، - دەدى اگەنتتىك باسشىسى اليك شپەكباەۆ.

اگەنتتىك باسشىسىنىڭ ايتۋىنشا، 2017 جىلى 38 ادام ۇستالعان، ونىڭ 12-ءسى شەتەلدە ۇستالعان. ولاردىڭ تورتەۋى ۆەنگريا، تۇركيا، رەسەيدەن قازاقستانعا ەكستراديتسيالانعان. قازىرگى كەزدە 8 ادام ەكستراديتسيالاۋ الدىندا تۇر.

مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ  دەرەگىنشە، جەمقورلىقپەن كۇرەس ۇلتتىق بيۋروسى قۇرىلعان 2015-2017 جىلدارى رەسپۋبليكالىق بيۋدجەتكە 35 ملرد تەڭگە قايتارىلعان.

- 2017 جىلى ەكى مىڭ جەمقورلىققا قاتىستى زاڭبۇزۋ ىستەرى تىركەلدى. 108 جۇيەلى جەمقورلىق فاكتىسى جانە بەس ۇيىمداسقان قىلمىستىق توپتىڭ ارەكەتى اشىلدى، - دەدى اليك شپەكباەۆ.

2017-2018 جىلدارى سوتقا باعىتتالعان جەمقورلىققا قاتىستى قىلمىستىق ىستەر بويىنشا جەتى ادام اقتالىپ شىققان.

Transparency International ۇيىمىنىڭ 2017 جىلى جاساعان ەسەبىنە سايكەس، قازاقستاننىڭ جەمقورلىق رەيتينگىسى 2016 جىلى 8 ورىنعا تومەندەگەن.

Abai.kz

2 پىكىر