الداعى كۇندەرى الماتى قالاسىندا 160 كوشەنىڭ اتى وزگەرىپ، جاڭالانباقشى. مەگاپوليستە جالپى 2,5 مىڭ كوشە بار. سول كوشەلەردىڭ 350-ءى اتتاس كوشەلەر. اتى جوق كوشەلەر دە جەتىپ ارتىلادى. وسى اتتاس كوشەلەر مەن اتسىز كوشەلەر جەدەل جاردەم قىزمەتى مەن ءورت سوندىرۋشىلەردىڭ جۇمىسىنا كەدەرگى كەلتىرىپ، شاتاستىرۋدا. مىسالى ءبىر عانا الاتاۋ اۋدانىندا 118 كوشەنىڭ اتى ءبىر ءبىرىن قايتالاپ تۇر دەپ حابارلايدى «الماتى» ارناسى. اتالعان اقپارات كوزىنىڭ حابارلاۋىنا قاراعاندا، الداعى كۇندەرى بوستاندىق اۋدانىنداعى 46 كوشەگە جاڭا تاقتايشالار قاعىلماق. ەگەر رەسپۋبليكالىق ونوموستيكالىق كوميسسيا قۇپتاپ جاتسا، الماتىدا جازۋشى ءابىش كەكىلباەۆ، اقىن فاريزا وڭعارسىنوۆا، ءانشى باتىرحان شۇكەنوۆ اتىنداعى كوشەلەر بولۋى مۇمكىن.

Abai.kz