جۇما, 29 ناۋرىز 2024
اكىمنىڭ ءىسى 8287 11 پىكىر 1 ماۋسىم, 2018 ساعات 13:39

قۋعىن-سۇرگىن كۇنىندە وبلىس اكىمدەرى نە ىستەدى؟

حح عاسىردىڭ باسىندا تالايدى سارساڭعا سالىپ، قاسىرەت شەكتىرگەن ساياسي قۋعىن-سۇرگىن قۇرباندارىن ەسكە الۋ كۇنى ءوتتى، كەشە! اتاۋلى كۇن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جارلىعىمەن 1997 جىلدان باستاپ اتاپ ءوتىلىپ كەلەدى. دەيمىز-اۋ! باسقا، باسقا ەمەس، نازارباەۆتىڭ جارلىعىمەن اتالىپ وتۋگە ءتيىستى كۇندى كەيبىر اكىم-قارالار مۇلدەم ەستەن شىعارىپ، قازاقتىڭ 4 ميلليون ادامىن جالماعان زۇلماتتى كۇنى ارۋاقتارعا تاعزىم وتۋگە شامالارى كەلمەدى. 

كەشە عانا "بەسسمەرتنىي پولكتىڭ" الدىڭعى ساپىندا جۇرگەن شىعىس قازاقستان وبلىسىنىڭ اكىمى دانيال احمەتوۆتىڭ رەسمي سايتىن قاراڭىز. قۋعىن-سۇرگىن قۇرباندارىن ەسكە الۋعا قاتىستى ءبىر اۋىز ءسوز جوق. ەسەسىنە ءدال وسى 31-مامىر كۇنى مارقاكول اۋىلدىق مادەنيەت ۇيىندە بالاباقشا مەكەمەسىنىڭ ۇيىمداستىرۋىمەن بالاباقشامەن قوشتاسۋعا ارنالعان «قوش بول، بالاباقشا!» اتتى  مەرەكەلىك شارا ەتكەنىن سۇيىنشىلەپ حابارلاپتى. بۇل نە؟ دانيال احمەتوۆ باسقاراتىن وبلىس مۇنىمەن نە ايتپاق؟ بالكىم، وبلىستا اكىمنىڭ قاتىسۋىمەن 31 مامىر - قۋعىن سۇرگىن قۇرباندارىنا ارنالعان شارا وتكەن بولار. وندا وبلىس اكىمىنىڭ رەسمي سايتى نەگە جازبايدى؟

ا، ايتپاقشى سەمەيدە ءاليحان بوكەيحاننىڭ ەسكەرتكىشى الدىنا گۇل شوقتارىن قويعان احمەتوۆتىڭ ورىنباسارى اسەم ءنۇسىپوۆا قاعازعا شۇقشيىپ، ورىس تىلىندە بايانداما جاساپ، ءسوزىنىڭ سوڭىن «س پرازدنيكوم – 31 مايا!» دەپ اياقتاعانىن ۇمىتىپ بارادى ەكەنبىز عوي. اكىمنىڭ ورىنباسارى اسەم حانىم ءۇشىن سوندا، 31-مامىر مەرەكە بولعانى ما؟.. تۇسىنبەدىك.

ءبىز كوپ سىنايتىن پاۆلودار وبلىسىنىڭ اكىمى باقاۋوۆ ساياسي قۋعىن-سۇرگىن قۇرباندارىن ەسكە الۋعا ارنالعان قارالى ميتينگتى اشىپ، گۇل شوقتارىن قويدى. بەتى بەرى قاراعان بوكەڭە بۇ جولى ىرزا بولىپ قالدىق.

سولتۇستىك قازاقستان وبلىسىنىڭ اكىمى قۇمار اقساقالوۆتىڭ 24-مامىردان بەرى نە ىستەپ جاتقانى قالىڭ جۇرتشىلىققا بەلگىسىز. ونىڭ رەسمي سايتى كانن فەستيۆالiنiڭ ۇزدiك اكتريساسى اتانعان سامال ەسلاموۆاعا ءۇي سىيلاعاننان كەيىن ءبىرجولا دەمالىسقا كەتكەن سياقتى. ەل الدىندا ارتىسكە پاتەر كىلتىن تابىستاپ جيعان ابىروي باردا، قۇمەكەڭ 31-مامىردى ازا تۇتىپ قايتسىن.

اقمولا وبلىسىنىڭ اكiمi مالiك ءمىرزاليننىڭ دە رەسمي سايتى  قۋعىن-سۇرگىن كۇنى حاقىندا جۇمعان اۋزىن اشقان جوق. 24-25 مامىردان كەيىن سايتتىڭ جاڭارماعانىنا قاراعاندا،  مالىك مىرزا دا اشتىق پەن ساياسي سۇرگىننەن قازا تاپقانداردى ەلەۋگە قۇلشىنا قويماسا كەرەك.

جوعارىداعى اكىمدەرگە بەكەڭ، ءيا، اقتوبە وبلىسىنىڭ اكىمى بەردىبەك ساپارباەۆ ۇلگى كورسەتەرلىك شارۋا جاسادى. اقتوبەدە اشارشىلىق پەن ساياسي قۋعىن-سۇرگىن قۇرباندارىنا ارنالعان ەسكەرتكىش اشىلدى.

ەسكەتكىشكە قاراساڭىز، سول ءبىر جىلدار كوز الدىڭىزعا كەلىپ، جۇرەگىڭىز ءدىر ەتە تۇسەدى.

بەردىبەك ساپارباەۆ ەسكەرتكىش اشىپ قانا قويعان جوق، تەاترلانعان قويىلىم ارقىلى حالقىمىزدىڭ باسىنان كەشكەن تاعدىرىن، توتاليتاردىق جۇيە قۇرباندارىنىڭ ىشكى ارپالىسىن اقتوبە جۇرتىنا اشىق كورسەتۋگە مۇرىندىق بولا ءبىلدى.

قوش! كەيبىر جەڭىلاۋىزدار "31-مامىردى بيلىك تاراپىنان اتاپ وتۋگە، تاعزىم ەتۋگە استىرتىن تيىم سالىنىپتى" دەپ جاتادى. بەردىبەك ساپارباەۆ سىندى اكىمدەردىڭ ىسىنە قاراساڭ، ونداي تاك-تاكتىڭ جوق ەكەنىنە كوزىڭ جەتە تۇسەدى.

ەندەشە، دانيال احمەتوۆ، قۇمار اقساقالوۆ، مالىك مىرزاليندەردىڭ قاستەرلى كۇندە بىلق ەتپەي وتىرۋىنىڭ سىرى نەدە؟

بۇل سۇراققا ەرتەڭ جاۋاپ بەرەتىن بولامىز. وزگە وبلىستاردى دا تولىق قامتىپ، پورتالىمىزدا جاريالاماق ويىمىز بار!

ال، اكىمدەر! دايىندالا بەرىڭدەر! ەگەر دە رەسمي سايتتارىڭىز جاڭارماي جاتسا، جاڭارتىپ ۇلگەرۋگە مۇمكىندىكتەرىڭىز بار!

(جالعاسى بار)

ءشارىپحان قايسار

Abai.kz

 

 

 

 

 

11 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1574
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2268
عيبىرات

قايسار رۋحتى عازيز جان

مۇحتار قۇل-مۇحاممەد 3576