جۇما, 29 ناۋرىز 2024
46 - ءسوز 5255 0 پىكىر 14 ماۋسىم, 2018 ساعات 11:06

كەڭىستىكتە...

وسى قىزدار كامپيت تاراتقان سايىن شەشەم ەسىمە تۇسەدى. شەشەممەن بىرگە بالەنشەنىڭ ايەلى دە ويىما ورالادى...

انام مارقۇمنىڭ قالتاسى بوس جۇرمەيتىن. قۇرت، كامپيتىن سالىپ جۇرەتىن انام كەزىككەن ادامنىڭ بارىنە تاتتىلەرىن ۇلەستىرەتىن. ءبىر كۇنى شەشەيدىڭ جۇمىسىنان شىعىپ ۇيگە كەلە جاتقانىمىزدا الدىمىزدان بالەنشەكەڭنىڭ ءۇرىپ اۋىزعا سالعانداي جاس كەلىنشەگى كەزىكتى. بارشىنىم ادەتتەگىدەي قالتاسىنان كامپيتىن شىعارىپ، انا سىلقىمعا ۇسىندى.

سوندا انا جەڭەشەمىز كامپيتكە قاراپ تۇردى دا باسىن شايقاپ، يىعىن قيقاڭ ەتكىزىپ:

-مەن بۇنداي كامپيت جەمەيمىن، - دەدى.

اياۋلىمنىڭ كامپيت ۇسىنعان قولى اۋادا تۇرىپ قالدى. نە ءارى ەمەس، نە بەرى ەمەس. كوڭىل دەگەن وتە نازىك، يممۋنيتەتتەن جۇرداي نارسە. تىم جارالانعىش. ءبىر اتىم ناسىبايدان قالاتىن كوڭىلدىڭ سو جولعى قورلانعانى كۇنى بۇگىنگىدەي ەسىمدە. شەشەم تاق ءبىر سوعان جاعىمپازدانىپ تۇرعانداي. اينالايىن-اۋ، ەنە جولىنداعى اناڭداي ادام ەدى عوي، نەگە قولىن قايتاردىڭ؟ تۇك تۇسىنسەم ءبۇيىرماسىن. ونداي كامپيتتى جەمەسەڭ جەمە، الا سال، بىلاي شىعا بەرە لاقتىرا سال، يتكە بەر. بىراق وزىڭە مەيىرى تۇسكەن ادامنىڭ قولىن قايىرما. شەشەمنىڭ قولىنداعى كامپيتتى الدىم دا اۋزىما سالدىم. سونداي ءبىر سورلى كامپيت ەمەس، سورعىش كامپيت قوي. بارباريس. بالداي. مەنىڭ كوڭىلىم عانا قالماپتى، شەشەي دە رەنجىگەن ەكەن.

- اقىلى ازداۋ ەكەن ءيا، - دەدى.

وسى كۇنى ايەلىم ءبىز قاشان سويتەر ەكەنبىز دەگەندەي: "گۇلىماي گۇلگە ورانىپتى، ءپاريدالار پاريجگە كەتىپتى، شىنارگۇل شۋبا الىپتى، داناگۇل دۋبايدا ءجۇر ەكەن" دەگەندەي اڭگىمەنىڭ شەتىن شىعارسا، سامارقاۋلاۋ عانا، باسىمدى قاتىرماشى دەگەندەي ءبىر سوزبەن; بايدىڭ قاتىندارىنا نە ىستەسە دە جاراسادى عوي... - دەي سالام. ءيا بايدىڭ قاتىندارىنا نە ىستەسە دە جاراسادى دەگەنمەن، قانشا جەردەن بايدىڭ قاتىنى بولسا دا، سول جولى انا كەلىنشەكتىڭ قىلىعى جاراسىمسىز ەدى. سۇيكىمىن قاشىرىپ العانداي بولدى-اۋ دەيمىن. الا سالسا نەسى كەتەر ەدى؟ جەمەسەڭ جەمە، وكەننىڭ بالالارىنا بەر، ءيا بولماسا لاقتىرا سال، بوكەننىڭ بالالارى تاۋىپ الىپ جەيدى. سۇلۋ كەلىن ويتپەدى. المادى.

شەشەي عوي پەندەشىلىك پەن مارازم مەڭدەگەن مىنا جالعان دۇيەدەن بيىكتەپ كەتكەن. مەن ءجۇرمىن ەركە جەڭگەمنىڭ بولماشى ەركەلىگىنە ءالى كۇنگە بۇرتىيىپ. قۇداي-اۋ، ودا تۇرعان نە بار دەيمىن عوي. جەگىسى كەلمەدى، جەمەيمىن دەدى. شەشەم وتە پاراساتتى كىسى ەدى، قۇرتتاي كەلىنىنىڭ قۇرتاقانداي قاتەلىگىن سول ساتىندە-اق كەشىرگەن بولۋ كەرەك. "جاقسى ادامنىڭ وكپەسى شايى ورامال كەپكەنشە..." مەن دە ونداي قاتتى جامان ادام ەمەسپىن. جانە بۇل كورگە باسىڭ جەتكەنشە وكپەلەيتىندەي سەبەپ ەمەس. كەشىرگەم. قازىر دە كەشىرىپ وتىرمىن. ويتكەنى مەن قازىر سول ەركە جەڭگەمنەن ون مىڭ توعىز ءجۇز الپىس ءۇش مەتر بيىكتە كەتىپ بارا جاتىرمىن. قۇدايعا جاقىن ماڭدا دەگەندەي عوي. ونىڭ ۇستىنە ورازا ايىنىڭ سوڭعى كۇنى. تاعى ءبىر ادامدى تاعى ءبىر رەت كەشىرىپ ۇلگەرەيىن.

ايتپاقشى، سول جەڭگەممەن ارادا ءبىر قىزىق وقيعا بولدى. ونداي قاتتى وقيعا ەمەس، بولماشى نارسە. بىراق، قىزىق. كىشىگىرىم ەسە قايتارۋ سياقتى عوي. ونى ايتايىن دەسەم، ول جەڭەشەمنىڭ كىم ەكەنى ءبىلىنىپ قالادى. باياعىدا جاقسى ەدى، اۋىلعا قاتىستى پوستتاردى پەرە بەرەتىنمىن. ويتكەنى ول كەزدە مەن ورتا ازيادا تەڭدەسسىز، الەمدە ەكىنشى دەگەندەي، قازاقستاندا تۇرعىزىلعان، سالىنعان دۇنيەلەردەي اۋىل بويىنشا ءبىرىنشى، نارىنقول بويىنشا ەكىنشى بولىپ تىركەلىپ ەدىم عوي، فەيسبۋكقا. وزىمنەن باسقا ەشكىم بولماعاسىن جازا بەرەتىن ەم. قازىر جارتى اۋىل وسىندا. رۋxاني جاڭعىرۋ باعدارداماسى اياسىندا عوي دەيمىن. سول سەبەپتى جاڭاعى وقيعانى ايتپادىم. بىلگىسى كەلگەندەر جەكەگە شىعىڭدار.

قوي، سامولەت تومەندەي باستادى. ال ماعان تومەندەۋگە بولمايدى دەپ تەگەش بولىپ قالساڭ ءيا. الماتى مەن استانانىڭ اراسى ءبىر پوستتىق جەر ەكەن عوي. تۇراقتاي الماي تەگىستىككە، تىرەلدى ءبىر كۇن ەگىستىككە دەمەكشى، كەڭىستىككە ءبىر شىقانىمدا تاعى كىمدى كەشىرەيىن. تاعى كىم نە ىستەپ قويىپ ەدى ماعان؟ قازىرشە ءتامام.

بەيبىت سارىبايدىڭ Facebook-تەگى پاراقشاسىنان

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2280
عيبىرات

قايسار رۋحتى عازيز جان

مۇحتار قۇل-مۇحاممەد 3600