جۇما, 29 ناۋرىز 2024
جانايقاي 7289 4 پىكىر 25 ماۋسىم, 2018 ساعات 12:22

ەلباسىنىڭ دوسى قر جوعارعى سوتى توراعاسىنان اراشا سۇرادى

قر جوعارى سوتىنىڭ توراعاسى

جاقىپ قاجىمانۇلى اسانوۆ

مىرزانىڭ نازارىنا

قازاقستان رەسپۋبليكاسىنىڭ پرەزيدەنتى، ۇلت كوشباسشىسى نۇرسۇلتان ءابىشۇلى نازارباەۆتىڭ كونەكوز قۇرداسى، قازاقستان ماگنيتكاسىن دامىتۋ ءىسىنىڭ ۇزدىگى، ەكىنشى توپتاعى مۇگەدەك، بۇگىندە 81 جاسقا تولعان اقساقال ماحانبەت اتكەەۆ Abai.kz اقپاراتتىق پورتالىنا جاردەم سۇراي كەلىپتى. دەنساۋلىعى ناشارلاپ، اياعىن قالت-قۇلت ەتىپ ارەڭ باسىپ جۇرگەن اقساقال بەينەتىنىڭ زەينەتىن كورەر شاعىندا سوت زالدارىندا تابانىنان توزدىرىپ، ادىلدىك ىزدەپ ءجۇر. بىراق، ەڭبەكشىقازاق اۋداندىق ءھام الماتى وبلىستىق سوتى ادىلدىك ىزدەگەن اقساقالدىڭ جانايقايىنا پىسقىرىپ تا قاراماعان.

ءبىزدىڭ قولدا ماحانبەت اتەكەەۆ پەن تامارا وسپانوۆا اراسىنداعى اكىمشىلىك سوتتىڭ بارلىق قۇجاتتارىنىڭ كوشىرمەسى بار. سول قۇجاتتارمەن تانىسىپ شىققاندا تۇيگەن جاعدايلاردى قىسقاشا عانا بايانداپ كەتسەك...

2014 جىلدىڭ 17 ماۋسىمى كۇنى تامارا وسپانوۆا ماحانبەت اتەكەەۆتىڭ ەسىك قالاسىنىڭ ورتاسىنداعى (اباي كوشەسى، 205 گ) ءۇيىن 40 مىڭ دوللارعا باعالاپ ساتىپ الادى. 2014 جىلدىڭ قازان ايىنىڭ اياعىنا دەيىن قولحات نەگىزىندە 20 مىڭ اقش دوللارىن تولەيدى دە، قالعان 20 مىڭ اقش دوللارىن 2015 جىلدىڭ سوڭىنا دەيىن تولەپ بىتەتىنى جونىندە قولحات بەرەدى.

سودان كەيىن قالعان سومانى ءۇيدى ساتىپ الۋشى تامارا وسپانوۆا وتەمەگەن. ەكىنشى توپتىڭ مۇگەدەگىن مازاقتاعانداي "8 مىڭ اقش دوللارى تۇراتىن اۆتوكولىكتى ال" دەپ ءوتىنىش جاساعان. ەگەر وسپانوۆا شىن مانىندە قالعان اقشانى تولەگىسى كەلسە، اتالعان كولىكتى ساتىپ، اقشاسىن باياعىدا-اق اقساقالعا بەرۋگە ءتيىس ەدى.

ماحانبەت اتەكەەۆ ادىلدىك ىزدەپ، زاڭ ورىندارىنا شاعىمدانادى.

زاڭ ورىندارى كەشەگى اقش دوللارىنىڭ كۋرسىن ەسەپتەمەي، بۇگىنگى كۋرسپەن تامارا وسپانوۆانىڭ قارجىسىن قايتارۋعا ءبىر جاقتى شەشىم شىعارىپ، اقساقالعا 5 ميلليون 580 مىڭ 480 تەڭگەدەن اسا ايىپپۇل تولەۋگە مىندەتتەپ تاستاعان.

ماحانبەت اتەكەەۆ، ەلباسىنىڭ قۇرداسى: 

- مەن، باسىما ءىس تۇسكەندە بازبىرەۋلەر سياقتى تانىستارىما جۇگىرگەن جوقپىن. ەلباسىمەن قازاقستان بولاتىن بىرگە بالقىتىپ، ءومىرىمىزدىڭ ەڭ قىزىقتى كەزدەرىن بىرگە وتكىزىپ ەدىك. قازىر ول كىسىگە جاعدايىمدى ايتىپ، جانايقايىمدى جەتكىزەمىن دەسەم، ورتاق تانىستارىمىز دا بار. بىراق، مەن ءبارىن ءادىل شەشىلسە دەگەن ويدا بولدىم. ءالى دە، جەكە باسىمنىڭ ماسەلەسى ءۇشىن كونەكوز دوسىمدى مازالاعىم كەلمەيدى. بىراق، زاڭ ورگاندارىنىڭ ماعان جاساپ وتىرعان ادىلەتسىزدىگى ءتوزىمىمدى تۇگەسىپ بارادى. 

ءۇيىمدى 40 مىڭ دوللارعا باعالاپ ساتتىم. ەندى ونى 4 جىل وتكەننەن سوڭ، 5 ميلليون تەڭگەدەن اسا قارجى تولەپ ساتىپ الۋىم كەرەك پە؟

بىرىنشىدەن، ءۇيدى ساتىپ العاندار ءتورت جىلدان بەرى ءۇيىمدى توزدىرىپ تاستادى. ءوز بىلگەندەرىمەن سارايلاردى بۇزدى، ماتەريالدارىن وتقا جاقتى. 

ەكىنشىدەن، ءتورت جىل بويى سول ۇيدە تۇرعانى ءۇشىن ءبىر تيىن تولەگەن جوق. وسپانوۆا قانداي زاڭ نەگىزىندە مەنىڭ ۇيىمدە 4 جىل تەگىن تۇرۋى قاجەت. 

ۇشىنشىدەن، مەنىڭ ءدال قازىر بەس جارىم ميلليون قارجى تابا الماسىمدى ءبىلىپ، زاڭ جولىمەن ءۇيىمدى تارتىپ الۋعا ارەكەت جاسالىپ جاتىر. 

تورتىنشىدەن، وسىدان 4 جىل بۇرىنعى اقش دوللارىنىڭ باعامى مەن بۇگىنگى باعامدى تەڭەستىرۋگە بولمايدى. 2015 جىلعا دەيىن تامارا وسپانوۆا قولحاتتاعى مىندەتىن ورىندامادى. ول سول ۋاقىتقا دەيىن مەنىڭ 20 مىڭ اقش دوللارىمدى قايتارۋعا مىندەتتى بولاتىن. ول جاعى نەگە سوتتا قارالمايدى؟ كەشەگى كۇننىڭ جاعدايى مەن بۇگىنگى كۇن مۇلدەم ۇيلەسپەيتىنى نەگە قاپەرگە الىنبايدى؟

م.اتەكەەۆتىڭ قازاقستان ماگنيتكاسىنىڭ 50 جىلدىعىنا العان مەدالى

ماحانبەت اتەكەەۆتىڭ ايتۋىنشا 4 جىل بويى ەشكىم ءوز ۇيىنە بىرەۋدى تەگىن تۇرعىزبايدى. تاۋەلسىز باعالاۋشىلاردىڭ باعالاۋىنا سۇيەنسەك، ءدال وسىنداي ءۇيدى ەسىك قالاسىندا ايىنا 40 مىڭ تەڭگەگە جالعا الادى ەكەن. 4 جىل جالعا وتىردى دەگەننىڭ وزىندە 2 ميلليوننان اسا اقشا شىعادى. سوت كەلىسىمشارتتى بۇزعان تامارا وسپانوۆانىڭ 4 جىل سول ۇيدە تۇرعانىن دا ەسەپكە الماعان. بۇزىلعان ساراي مەن بۇلىنگەن دۇنيەنى دە ەسكەرمەگەن.

ەندى تۇسىنىكتى تىلمەن ايتقاندا بىلاي: 

تامارا وسپانوۆا وسىدان ءتورت جىل بۇرىن 2 ميلليوننان ءسال اساتىن قارجىمەن ءۇيلى بولادى. قالعان قارىزدى وتەۋگە نيەت تە تانىتپايدى. ءتورت جىل الگى ۇيدە تەگىن تۇرادى. سوسىن 5 ميلليون 580 مىڭ تەڭگەنى قالتاسىنا باسادى دا، سۇتتەن - اق، سۋدان - تازا بولىپ شىعا كەلەدى.

ال، ەكىنشى توپتاعى مۇگەدەك اقساقال 4 جىل ۇيىندە تەگىن تۇرعان ادامدار ءۇشىن 5 ميلليون 580 مىڭ تەڭگە تولەۋگە مىندەتتى.

كۇلەسىز بە، جىلايسىز با؟

ءتۇيىن

قۇرمەتتى، قر جوعارى سوتىنىڭ توراعاسى جاقىپ قاجىمانۇلى اسانوۆ مىرزا! بالالىق شاعىندا جەتىمدەر ۇيىندە ءوسىپ، العاشقىلاردىڭ ءبىرى بولىپ قازاقستاننىڭ بولاتىن بالقىتقان، ەلباسىنىڭ دوسى ماحانبەت اتەكەەۆتىڭ جانايقايىنا ءسىز دە ءبىر مارتە قۇلاق اسساڭىز! قازاقتىڭ ءوندىرىسىنىڭ ورلەۋىنە اتسالىسقان اقساقالدى زارلاتىپ قويۋ - ەلدىگىمىزگە سىن! 

قانات بىرلىكۇلى

Abai.kz

4 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3563