ەكى ليدەردىڭ كەزدەسۋىنە دايىندىق جۇمىستارىن اقش مەملەكەتتىك حاتشىسى مايك پومپەو رەسەي سىرتقى ىستەر ءمينيسترى سەرگەي لاۆروۆپەن تالقىلادى. ەكى ساياساتكەر سيرياداعى جاعداي مەن سولتۇستىك كورەياداعى شيەلەنىستىڭ باسەڭدەگەنىن ءسوز ەتكەن.

ماسكەۋ مەن ۆاشينگتون قارىم-قاتىناسى سوڭعى ۋاقىتتا "قىرعي-قاباق سوعىسى" جىلدارىنداعى دەڭگەيگە جەتكەن. بۇل رەسەيدىڭ 2014 جىلى ناۋرىز اۋىندا قىرىمدى اننەكتسيالاۋىمەن، سيرياداعى جانجالعا رەسەيدىڭ قاتىسىمەن جانە ۋكراينا شىعىسىنداعى احۋالمەن بايلانىستى. سونىمەن بىرگە 2016 جىلى رەسەي اقش-تاعى پرەزيدەنت سايلاۋىنا ارالاستى دەگەن داۋ ەكى ەلدىڭ قاتىناسىن ودان سايىن كۇردەلەندىردى.

2 شىلدەدە پەسكوۆ رەسەي پرەزيدەنتى ترامپپەن قىرىم تۇبەگىنەن باسقا كەز كەلگەن تاقىرىپقا اشىق ەكەنىن جەتكىزگەن. كرەمل قىرىم تۇبەگىن رەسەيدىڭ ءبىر بولشەگى دەپ سانايدى.

رەسمي اقش ازىرگە ەكى مەملەكەت ليدەرىنىڭ كەزدەسۋىندە 2016 جىلعى امەريكاداعى پرەزيدەنت سايلاۋىنا رەسەيدىڭ ارالاسۋى جايىندا ماسەلە ءسوز بولاتىنى، نە بولمايتىنى جايىندا قانداي دا ءبىر بولجام ايتىپ جاتقان جوق. امەريكالىق ارنايى قىزمەتتىڭ مالىمەتى بويىنشا، پۋتين اقش-تاعى سايلاۋلاۋشىلارعا ىقپال ەتۋدى تاپسىرعان. بىراق ترامپ مۇنى جوققا شىعارىپ كەلەدى.

Abai.kz