وتكەندە "You tube" جەلىcىندە دىنمۇحامەد قوناەۆقا قاتىستى ۋكارين ءجۋرناليسىنىڭ جاساعان اقپارىنىڭ فراگمەنتى تارادى. سول تۋرالى جازباقپىز.

اۋەلى دميتري گوردون دەگەن كىم دەگەنگە توقتالايىق. دميتري گوردون ۋكراين ءجۋرناليسى. جاسى 50-دە. ساياسي شولۋ، وپپوزيتسيالىق سارىنداعى ماتەريالدارى ارقىلى جۇرتقا كەڭ تانىلعان. اسىرەسە، 2014 جىلدان بەرى ورىسپەن ەكى ارا سۋىعاننان سوڭ، ماسكەۋدىڭ سولاقاي ساياساتىنا سىني پىكىرلەر ايتىپ ءجۇر. 40-قا جۋىق كىتابى مەن سۇحباتتار جيناعى جارىق كورگەن. 60-قا جۋىق ءان جازعان. "ۆ گوستياح ۋ دميتريا گوردونا" دەگەن باعدارلاماسى بار.

مىنە، سول باعدارلاماعا كسرو باس پروكۋراتۋراسى جانىنداعى اس ماڭىزدى ىستەر جونىندەگى تەرگەۋشى ۆلاديمير كالينيچەنكو قوناق بوپ كەپتى.

كالينچەنكونىڭ جاسى 70-تە. رەسەيدىڭ ءۇشىنشى دارەجەلى مەملەكەتتىك كەڭەسشىسى. زەينەتكە شىققان سوڭ ادۆوكات بولعان. زاڭگەر ەكەن. ەندى كوپ قويىرتپاقتاماي، كالينيچەنكونىڭ سۇحباتىنا ورالايىق.

سول كالينيچەنكو دەگەن ءسوز اراسىندا سوۆەت بيلىگى كەزىندە قازاقستاندى باسقارعان مەملەكەت قايراتكەرى دىنمۇحامەد احمەتۇلى قوناەۆقا دا توقتالعان ەكەن. ونىڭ پاراقور بولعانىن ايتىپ، تۇتقىنداۋعا دا ءازىر بولعانىن ءسوز ەتكەن. ءبىز ەكەۋارا ورىس تىلىندەگى سۇحباتتى قازاقشاعا قوتارىپ بەرگەندى ءجون كوردىك.

اۋەلى ديما گوردون كالينيچەنكودان: "قوناەۆتى تۇتقىنداماق بولعانىڭىز راس پا؟ ول پاراقور بولعان با؟" دەپ سۇرايدى.

ەگەر مەن ونى تۇتقىندايتىن بولسام، ول سوتقا دەيىن ءتىرى قالمايتىن ەدى

"ماسەلە بىلاي عوي، بۇل كەزدە قوناەۆ قايداعى جوق بىرەۋ ەمەس، 3 دۇركىن سابەتتىڭ ەڭبەك ەرى ەدى. مەن ول ادامدى وتە جاقسى ءبىلدىم، جاقىن تانىستىم. جانىم اشىدى. بىلەسىز بە، مەن ونى ۇيىندە تەرگەدىم. تۇتقىنداۋعا دا نيەتىم بولدى.

الايدا، مەن مىنانى جاقسى ءتۇسىندىم. ەگەر مەن ونى تۇتقىندايتىن بولسام، ول سوتقا دەيىن ءتىرى قالمايتىن ەدى. ول كەزدە اڭگىمەنىڭ شەتى عانا شىققان كەز. ال سوتقا دەيىن، الدىن الا تەرگەۋ كەزىندە قايتىس بولسا، ول ءوز حالقى ءۇشىن حالىق باتىرى بولىپ اتى قالاتىن ەدى. ويتكەنى، ءوز حالقى ءۇشىن قوناەۆ ونسىز دا حالىق قاھارمانى ەدى.

ونىڭ پارا العانى راس تا بولۋى مۇمكىن. بىراق، ول كەزدە بارلىعى پارا الاتىن. سوندىقتان مەن ونى تۇتقىنداۋعا بارمادىم. ايتسە دە، تۇتقىنداۋعا سانكتسيام بولدى. ويتكەنى، ول كەزدە قوناەۆ ەشكىمگە كەرەك بولماي قالعان. گوربوچەۆقا كولبين كىرىپتى. قوناەۆتتىڭ كوزىن قۇرتايىق دەگەن ويمەن. گوربوچەۆ، مەنىڭ قولىمداعى دەرەكتەر جەتكىلىكتى بولسا، وزدەرىڭ بىلىڭدەر دەگەن.

ال ەندى بۇگىن سول قىلىعىم ءۇشىن وكىنەمىن بە دەگەن سۇراققا كەلسەك، جوق، وكىنبەيمىن. ويتكەنى، مەنىڭ قوناەۆقا دەگەن ادامي جاقىندىعىم بولدى. ىشكى سيمپاتيام بولدى. مەن جارالى ادامدى كوردىم. ءوز مەملەكەتى، ءوز ەلى ءۇشىن وتە كوپ جۇمىس جاساعان ادامدى كوردىم.

ول مەنى ءوز كابينەتىندە قارسى الدى. كابينەتتە ول مەنى قازاقستاننىڭ باسشىسى رەتىندە قابىلدادى.

ال ۇيىنە بارىپ، تەرگەگەن كەزدە قاراپايىم عانا كيىممەن، قاراپايىم ادام رەتىندە سويلەستىك. ونىڭ قاسىندا دارىگەر تۇردى. ءجيى كەلىپ دەنساۋلىعىن تەكسەرىپ وتىردى. ول وتە قاتتى سىرقات ەدى.

ونىڭ سول كەزدەگى اتاق ابىرويى مەن ساياسي بەدەلى وتە جوعارى ەدى. مەن قوناەۆتى تۇتقىنداعانىممەن، قۇددى پوليتبيۋرونىڭ ءبىرىنشى مۇشەسىن تۇتقىنداعان اداممەن تەڭ بولار ەم.

ەڭ سوڭىندا، پروتوكولعا قول قويىپ وتىرىپ، "بالام، سوندا سەن مەنى تۇتقىنداماقسىڭ با؟" دەدى.

مەن: "دىنمۇحامەت احمەتوۆيچ، ءسىز قازىر تەك كۋاگەرسىز" دەدىم. ول: "مەنى الدامايسىڭ با؟" - دەدى. مەن: "جوق" دەدىم.

بىلەسىز بە، بۇگىن اتتارىن اڭىز قىلىپ ايتىپ جۇرگەن سول كەزدەگى ادامداردىڭ ارقايسىسى ءار ءتۇرلى بولدى. ىشتەرىندە وڭباعان، يتتەر دە بولدى. بىراق، ءوز ىستەرىنە شىن بەرىلگەن ادامدار دا بولدى".

ءتۇيىن

سۇحبات بارىسىندا تەرگەۋشىنىڭ ادام رەتىندە قوناەۆتىڭ جاناشىرىنا اينالىپ كەتكەنىن بايقايسىز. "الدىن الا تەرگەۋ كەزىندە قايتىس بولسا، ول ءوز حالقى ءۇشىن حالىق باتىرى بولىپ اتى قالاتىن ەدى. ويتكەنى، ءوز حالقى ءۇشىن قوناەۆ ونسىز دا حالىق قاھارمانى ەدى", - دەيدى كالينيچەنكو. بۇل - كەز-كەلگەن قىزمەت ىستەگەن ادامعا بۇيىرا بەرمەيتىن باق. وسىنى ءبىزدىڭ شەنەۋنىكتەر بىلسە عوي دەپ ويلايسىڭ، كەيدە!

نۇرگەلدى ابدىعانيۇلى

ماتەريالدى پورتالدىڭ رۇقساتىنسىز كوشىرىپ باسۋعا بولمايدى

Abai.kz