بۇل پىكىر ازيا مەن ەۋروپانىڭ بىلىكتى مەديامەنەدجەرلەرىنىڭ قاتىسۋىمەن استانادا ءوتىپ جاتقان «ازيانىڭ مەديا ديالوگى» فورۋمى اياسىنداعى  تاراپتار كەزدەسۋى بارىسىندا ايتىلدى. «Qazaq radiolary» جسش-ءنىڭ باس ديرەكتورى ءمادي ماناتبەكۇلى مەن ۆەتنامدىق VOV3 مۋزىكالىق ارناسى ديرەكتورىنىڭ ورىنباسارى Mr.Tran Nhat Duong باستاعان توپ جەتەكشىلەرى الداعى ۋاقىتتا بىرلەسە اتقاراتىن ءوزارا ءتيىمدى جوبالاردى تالقىلاپ، ەكى جاقتى ىنتىماقتاستىق  مەموراندۋمىنا قول قويۋعا كەلىستى. ەندى كەلەشەكتە قازاقتىڭ كۇيلەرى مەن حالىق اندەرى ۆەتنام راديوسىنىڭ اۋە تولقىنىندا اۋەلەسە، ءبىز قازاق راديوسى ارقىلى ءمالىم دە بەيمالىم ۆيەت ەلىنىڭ اۋەنىن تىڭدايتىن بولامىز. تاراپتار سونىمەن قاتار مادەنيەت پەن ءتۋريزمدى دامىتۋعا باعىتتالعان تىڭ جوبالار ازىرلەۋگە ۋاعدالاستى.

«ۆەتنام راديوسى «قازاق راديولارى» سەرىكتەستىگى سەكىلدى الەۋمەتتىك جانە قوعامدىق باعىتتا جۇمىس ىستەيدى ەكەن. ولار دا راديولارىن سان سالاعا جىكتەپ-جىلىكتەپتى. ۆەتنامدىقتاردى ءبىزدىڭ ۇلتتىق جانە كلاسسيكالىق مۋزىكامىز قىزىقتىرىپ وتىر. ال، بىزگە ولاردىڭ تۋريزم باعىتىنداعى باعدارلاماسى كەرەك. ويتكەنى، ۆەتنام - قازاقستان ءۇشىن ءالى تولىق تانىلىپ ۇلگەرمەگەن ەل. سوندىقتان، ەكى ەلدىڭ راديولارى مادەنيەت جانە ساياحات سالاسىن قال-قادەرىنشە دارىپتەۋگە كەلىستىك»، - دەدى «Qazaq radiolary» جشس-ءنىڭ باس ديرەكتورى  ءمادي ماناتبەكۇلى.

ءوز كەزەگىندە ويىن ورتاعا سالعان  VOV مۋزىكالىق ارناسى ديرەكتورىنىڭ ورىنباسارى Mr.Tran Nhat Duong مىرزا:

«ءبىز قازاق ەلىنىڭ تورىندە تابىستى كەلىسىم جاساعانىمىزعا قۋانىشتىمىز. قۇشاق جايا قارسى العاندارىڭىزعا ايتار العىسىمىز شەكسىز. بولاشاقتا وسى كەزدەسۋدىڭ قورىتىندىسى بويىنشا ەكى تاراپ ىنتىماقتاستىق تۋرالى مەموراندۋمعا قول قوياتىن بولادى. بۇل قۇجات - ەكى ەلدىڭ مەملەكەتتىك راديولارى اراسىنداعى بايىپتى بايلانىستىڭ بەرىك ىرگەتاسى بولىپ قالاناتىنىنا سەنىمدىمىز. ەكى جاقتى كەلىسىم بولاشاقتا مادەنيەت پەن ءتۋريزمنىڭ دامۋىنا وزىندىك سەپتىگىن تيگىزەدى دەپ ويلايمىز. كەزدەسۋگە شاقىرعاندارىڭىزعا راحمەت! كەلەلى كەڭەس قۇرعان كەزدەسۋ قورىتىندىسى بويىنشا كوپ كۇتتىرمەي بىرلەسكەن جۇمىستى باستاۋعا كىرىسەمىز»،- دەپ شىنايى ريزاشىلىعىن ءبىلدىردى.

Abai.kz