دۇيسەنبى, 22 ءساۋىر 2019
865 1 پىكىر 7 تامىز, 2018 ساعات 14:21

ءسىم اقش-تا قازاقستان ازاماتتارى ۇستالعانىن راستادى

اقش-تا قازاقستاننىڭ ءۇش ازاماتى "سيرەك كەزدەسەتىن باعالى كولىكتەردى ساتۋدا الاياقتىق جاسادى" دەگەن كۇدىكپەن ۇستالدى دەپ حابارلادى قازاقستان سىرتقى ىستەر مينيسترلىگىنىڭ ء(سىم) ءباسپاسوز حاتشىسى ايبەك سمادياروۆ.

ۇكىمەت جيىنىنىڭ اراسىندا جۋرناليستەر ساۋالىنا جاۋاپ بەرگەن سمادياروۆ شىلدەنىڭ سوڭىندا نيۋ-يورك شتاتىندا 25 ادام ۇستالعانىن، ولاردىڭ اراسىندا 1994, 1991 جانە 1970 جىلى تۋعان قازاقستاندىق ءۇش ايەل بارىن ايتتى. 1970 جىلى تۋعان قازاقستاندىق دەنساۋلىعىنا بايلانىستى ەشقايدا كەتپەۋ تۋرالى قولحاتپەن بوساتىلعان، ەكەۋى قاماۋعا الىنعان. ۇستالعان 25 ادام 4,5 ميلليون دوللار كولەمىندە شىعىن كەلتىردى دەگەن كۇدىككە ىلىنگەن.

ۇستالعان قازاقستاندىقتار اقش-تا بىرنەشە جىل ىقتيارحاتپەن تۇرعان.

سمادياروۆتىڭ سوزىنشە، نيۋ-يوركتەگى قازاقستان كونسۋلدىعى قازاقستاندىقتارعا كونسۋلدىق جانە قۇقىقتىق كومەك كورسەتىپ جاتىر.

بۇعان دەيىن رەسەيلىك باق شىلدەنىڭ سوڭىندا اقش ادىلەت مينيسترلىگىنە سىلتەمە جاساپ، اقش-تا كولىك ساتۋدا الاياقتىق جاسادى دەگەن كۇدىكپەن 25 ادام ۇستالعانىن حابارلاعان. باق دەرەگىنشە، ولاردىڭ اراسىندا رەسەي، گرۋزيا، ازەربايجان، قازاقستان، ۋكراينا لاتۆيا، اقش جانە تۇركيا ازاماتتارى بار.

Abai.kz

1 پىكىر