قازاقستان رەسپۋبليكاسى دەنساۋلىق

ساقتاۋ ءمينيسترى ە.ا ءبىرتانوۆ مىرزاعا

اشىق حات

قۇرمەتتى، ەلجان امانتايۇلى!

ءوزىڭىز بىلەتىندەي، بۇرىنعى وڭتۇستىك قازاقستان وبلىسى «تۇركىستان» اتاۋىنا يە بولىپ، تۇركىستان قالاسى وسى جاڭا وبلىستىڭ ورتالىعى بولىپ بەكىدى. تۇرعىندار سانى 1 ميلليونعا جەتىپ، مەگاپوليسكە اينالعان شىمكەنت تىكەلەي رەسپۋبليكاعا باعىناتىن جەكە-دارا قالاعا اينالدى.

جالپى، بۇل - ۇلكەن تاريحي وقيعا. ەلباسىنىڭ شەشىمىن بۇكىل وبلىس حالقى، سونىڭ باسىندا بىزدەر دە، ورداباسىلىقتار دا قۋانا قولداپ وتىرمىز.

وبلىس ورتالىعىن تۇركىستان سياقتى شاعىن قالاعا كوشىرۋ بىرەر كۇندىك وڭاي شارۋا ەمەس. بۇل ءىس اسىرەسە ونداعان جىلدار بويى جۇمىس جاساپ، تاۋەلسىزدىك العان سوڭ جاقسى قالىپتاسقان وبلىستىق دەنساۋلىق ساقتاۋ سالاسىنا قيىنعا تۇسەتىن ءتۇرى بار.

شىمكەنت سياقتى ۇلكەن قالادا جۇمىس ىستەپ تۇرعان، ۋاقىت تالابىنا ساي دامىپ، كەمەلدەنگەن وبلىستىق ەمدەۋ مەكەمەلەرىن (وبلىستىق ونكولوگيالىق، تۋبەركۋلەز ديسپانسەرى، وبلىستىق كلينيكالىق اۋرۋحاناسى، وبلىستىق بالالار اۋرۋحاناسى جانە پەريناتالدىق ورتالىقتى) تەز ارادا تۇركىستانعا كوشىرۋ ماسەلەسى كۇن تارتىبىندە تۇر.

2 ميلليونعا جۋىق تۇركىستان وبلىسىنىڭ تۇرعىندارى  (جىلىنا 150 000 - 200 000-عا دەيىن) وسى كوپسالالى كلينيكالىق اۋرۋحاناسىندا ەمدەلەدى، ونىڭ ىشىندە 60 پايىزى اۋىر ناۋقاستار مەن جۇكتى ايەلدەر ەكەنىن ەسكەرۋ كەرەك. دەمەك، قازىردىڭ وزىندە جۇزدەگەن بىلىكتى دارىگەرلەردى تۇركىستان قالاسى اۋماعىنان تابۋ مۇمكىن ەمەستىگى انىق بايقالدى. مامانداردى تۇركىستان قالاسىنا ورنالاستىرۋ، شاقىرۋ، تۇركىستانعا كوشىرىپ اپارۋ دا بىرەر جىلدىڭ پروبلەماسى بولماسا كەرەك.

ەڭ باستىسى اسىعىس كوشىرۋ سالدارىنان وبلىس حالقى زارداپ شەكپەسە ەكەن دەيمىز. 

سەبەبى:

بىرىنشىدەن، كوپشىلىككە تۇركىستان شالعاي جاتىر.

ەكىنشىدەن، بوس عيماراتتار جوق، جاڭاسى سالىنعانشا كوپ ۋاقىت كەرەك.

ۇشىنشىدەن، كادر جەتىسپەۋشىلىگى ورىن الاتىنى بەلگىلى.

تورتىنشىدەن، وبلىستىق مارتەبەسىنە يە بولعان ونداعان دەنساۋلىق مەكەمەلەرىنىڭ ماتەريالدىق-تەحنيكالىق بازاسىن قالىپتاستىرۋعا دا ءبىرشاما ۋاقىت ، قارجى كەرەك.

وبلىستىق اۋرۋحانالار شىمكەنت قالاسىنىڭ قاراماعىنا وتكەننەن كەيىن دە اۋدانداردان كەلەتىن اۋرۋلاردى شاما-شارقىنا قاراي قابىلداي بەرۋدى قولعا العان ءجون. بىراق، مۇنداي جاعدايدا اۋرۋحانانىڭ قالا مەن وبلىسقا بىردەي كىزمەت ەتۋى كوپ تۇسىنبەۋشىلىكتەر مەن شاتاسۋشىلىقتار تۋدىرۋى مۇمكىن. ويتكەنى بۇرىنعى وڭتۇستىك قازاقستانداعى ەمحانالار مەن اۋرۋحانالار بىرىكتىرىلىپ، كوپ سالالى ەمدەۋ مەكەمەلەرىنە اينالعان ەدى. جوعارىدا اتالعان جاعدايدا وسى قالىپتاسقان جۇيە بۇزىلىپ، پورتال ءادىسى دە تىعىرىققا تىرەلەتىنى بەلگىلى. تىزە بەرسەك، اتالعانداي پروبلەمالار كوپ-اق. ءبىز ەمدەۋ مەكەمەلەرىن ساتىلاپ، كەزەك-كەزەگىمەن كوشىرۋدى ۇسىنعىمىز كەلەدى. 

قورىتا ايتقاندا، قۇرمەتتى ەلجان امانتايۇلى!

وبلىستىق دارەجەدەگى ەمدەۋ مەكەمەلەرىنىڭ بارلىعىن تۇركىستان وبلىستىق دەنساۋلىق ساقتاۋ دەپەرتامەنتىنىڭ قۇرامىندا قالدىرعانى ەكى جاققا دا ءتيىمدى بولار ەدى. بۇل باعىتتا مينيستىرلىك تۇركىستان وبلىسى جانە شىمكەنت قالا اكىمشىلىكتەرى بىرلەسىپ، ارنايى مامىلەگە كەلىپ، كوشىرۋگە قاتىستى ۋاقىتتى بەلگىلەنگەن جوسپار جاساسا، حالىق قينالماس ەدى دەپ ويلايمىز.

قۇرمەتپەن، 

ك. تاجەنوۆ، زاڭگەر، ورداباسى اۋدانى، شۇبارسۋ اۋىلىنىڭ تۇرعىنى، زەينەتكەر

و.ەسقاراەۆ، ورداباسى اۋدانىنىڭ مەديتسينا سالاسىنىڭ ارداگەرى، زەينەتكەر، اۋداننىڭ قۇرمەتتى ازاماتى

ي.ورازباەۆ،  ورداباسى اۋدانىنىڭ مەديتسينا سالاسىنىڭ ارداگەرى، زەينەتكەر، اۋداننىڭ قۇرمەتتى ازاماتى

ا.ايتباەۆ،  ورداباسى اۋدانىنىڭ مەديتسينا سالاسىنىڭ ارداگەرى، زەينەتكەر، اۋداننىڭ قۇرمەتتى ازاماتى 

ءا.وتىزباەۆ، ورداباسى اۋدانىنىڭ مەديتسينا سالاسىنىڭ ارداگەرى، زەينەتكەر، اۋداننىڭ قۇرمەتتى ازاماتى

ءا.ۋتەنوۆ، ورداباسى اۋدانىنىڭ مەديتسينا سالاسىنىڭ ارداگەرى، زەينەتكەر، اۋداننىڭ قۇرمەتتى ازاماتى

Abai.kz