قازاق گازەتتەرىنىڭ دۇڭگىرشەكتەردە از، ءتىپتى كەرەك دەسەڭىز، وتە سيرەك كەزدەسۋى بۇرىننان بەلگىلى جايت، بۇگىن دە ەشكىمگە تاڭسىق ەمەس. كوپ جاعدايدا ايتىلاتىن باستى سىلتاۋ - سۇرانىستىڭ تومەندىگى. راسىندا دا، سولاي ما؟!

تاياۋدا ءبىر جايتتىڭ كۋاسى بولدىق. ەلوردادان شىققان قازاق تىلىندەگى جاڭا باسىلىمداردىڭ ءبىرىنىڭ وكىلى ەلىمىزدىڭ باتىس ءوڭىرىن ارالاي كەلە، ات باسىن اقتوبەگە دە تىرەدى. قالاداعى ساناۋلى عانا تاراتۋ نۇكتەلەرىن ارالاي ءجۇرىپ، گازەتتەردى تاراتۋ بويىنشا كەلىسسوزدەردىڭ الماتى نە استانادا جۇرگىزىلەتىنىن بىلدىك.

ورتالىقتا قازاقتىلدى باسىلىمنىڭ تاعدىرى قالاي شەشىلىپ جاتقانىن بىلمەگەن سوڭ، ول تۋرالى ەشتەڭە ايتا المايمىز. ال اقتوبەدەگى ءبىر تاراتۋ مەكەمەسىنىڭ باسشىسى دۇڭگىرشەكتەرىنىڭ تارلىعىن ايتىپ، ونسىز دا وتپەي جاتقان گازەتتەرىنىڭ كوپتىگىن العا تارتىپ، الگى جاڭا باسىلىم وكىلىنىڭ ۇسىنىسىنا ارەڭ قۇلاق استى.
- ەگەر گازەتتەرىڭنىڭ جارناماسى كەرەمەت بولسا، مەن ونى تاراتۋعا الامىن. جارناماسى جاداعاي بولسا، ونى ەشكىم بىلمەسە، باسىلىم تاراتۋ نۇكتەلەرىندە بوسقا جاتىپ قالادى. ءارى، وتپەگەن سوڭ، بىزگە دە پايدا جوق، - دەگەن سارىندا زار يلەپ قويا بەردى.
سويتسەك، قىزىعى الدا ەكەن.
- ەگەر گازەتتەرىڭىز ءوتسىن دەسەڭىزدەر، دۇڭگىرشەكتىڭ ماڭداي تۇسىنا، حالىقتىڭ كوزى تۇسەتىن جەرگە ءىلىپ قويا الامىز. بىراق بۇل قىزمەت - اقىلى. ءبىر دۇڭگىرشەكتەگى ءبىر ورىن - ايىنا 1 مىڭ تەڭگە. ەگەر، باسىلىمنىڭ لوگوتيپى بەينەلەنگەن ستيكەر ىلەمىز دەسەڭىزدەر، ول دا اقىلى. ول دا ايىنا 1 مىڭ تەڭگە، - دەپ جالعاستىردى ءسوزىن الگى تاراتۋ مەكەمەسىنىڭ باسشىسى.
ونىڭ سوزىنەن ۇققانىمىز، قازاق تىلىندەگى گازەتتەر ءوتىمسىز ەكەن. سوندىقتان ونى قابىلداپ الىپ، بوسقا ورىن ۇستاپ تۇرۋدىڭ بەكەر ءىس ەكەندىگى. بالكىم، ول كوممەرتسيالىق پايدانى كوزدەپ تە تۇرعان شىعار. بيزنەس تۇرعىسىنان العاندا، كەز كەلگەن كاسىپكەرلىك نىسان  تابىس ءتۇسىرۋدى كوزدەيدى ەمەس پە؟
ەندى وسى جەردە مىناداي وي تۋىندايدى. قازاق گازەتتتەرىنىڭ دۇڭگىرشەكتەردە وتە از كەزدەسۋى قازاق باسىلىمدارىنىڭ تەك وقىلمايتىندىعىمەن تۇسىندىرىلە مە؟ الدە تابىس ءتۇسىرۋدى كوزدەگەن تاراتۋشىلاردىڭ «ءبارىبىر وتپەيدى» دەگەندى جەلەۋ ەتىپ، ولارمەن كەلىسىمشارتقا وتىرۋدان باس تارتۋى ما؟
بۇل رەتتە ايتا كەتەيىك، مۇنداي جايت تەك اقتوبەدە عانا ەمەس، ەلىمىزدىڭ كەز كەلگەن قالاسىندا كەزدەسەدى. الماتى، استانا، اتىراۋ، اقتاۋ قالالارى تۋرالى ءسوزىم جوق، اندا-ساندا جولىمىز تۇسكەندە بايقايتىنىمىز، نە رەسپۋبليكالىق، نە جەرگىلىكتى قازاقتىلدى گازەتتەردىڭ كەزدەسپەۋى. الماتىدا ءبىر كۆارتالدا ءبىر دۇڭگىرشەك بار دەگەن كۇندە دە، قازاق گازەتتەرىن تاۋىپ الۋ ءۇشىن ون كۆارتال وتەتىنىڭدى ايتساڭشى. استانادا، شىنىمدى ايتسام، ساناۋلى قازاق گازەتىن تەك تەمىرجول ۆوكزالى مەن اۋەجايدان عانا تابا الاسىڭ. وندا دا، جەر-جەردە 15-25 تەڭگەگە ساتىلاتىن كۇندەلىكتى باسىلىمداردى استانا ۆوكزالى مەن اۋەجايىندا كەمى 80-100 تەڭگەدەن الاسىڭ.
بىردە استانادا اقپارات مينيسترلىگى وكىلدەرىمەن وتكەن كەزدەسۋدە قازاقستان باس رەداكتورلارى كلۋبىنىڭ باسشىلىعىندا قىزمەت جاسايتىن اعايلارىمىزدىڭ ءبىرى - قازاق گازەتتەرىنىڭ جاعدايى وتە كەرەمەت ەكەندىگىن العا تارتتى. جاسىراتىنى جوق، ۇلكەنمەن قارسىلاسايىق دەمەدىك، بىراق شىندىقتى ايتۋدى ءجون كوردىك. سول جيىندا-اق، باسقانى قوزعامادىق، اقتوبەدەگى جايتتى بايانداپ بەردىك. قاي گازەتتىڭ قالاي، شامامەن قانشا تارالىممەن  تارالىپ جاتقانىن دا سانامالاپ بەردىك. وڭىرىمىزدەگى كەي قازاق گازەتتەرىنىڭ جاساندى جولمەن تاراتىلماۋى، سۇراعان باسىلىمنىڭ ورنىنا باسقا گازەتتى تىقپالاۋى، ءتىپتى جازدىرتىپ العان كۇندە، پوشتا قىزمەتكەرلەرىمەن كۇنارا سوزگە كەلىپ، ىزدەپ ءجۇرىپ وقيتىن باسىلىمدارىمىزدى ارەڭ قولعا تۇسىرەتىنىمىزدى، الىس اۋىلداعى اعايىننىڭ، ءبىر اپتادا ءبىر رەت، قىس مەزگىلى كىشكەنە مىنەزىن تانىتسا، ايىنا ءبىر رەت قانا گازەت الاتىنىن جەتكىزدىك. اقپاراتتارى ەسكىرگەن گازەتتى، ايتەۋىر، وقىلاتىن ءبىر دۇنيە تابىلار دەگەن ويمەن اۋىل قازاعى، ارينە، وقيدى.
جاسىراتىنى جوق، «حالىقتى وقىتۋ كەرەك» دەگەن وي ايتقان مەديا-مەنەدجەر مەيىرحان اقداۋلەتۇلىنىڭ دا باسى بالەگە قالا جازدادى. ول تۋرالى «جاس قازاق» بەتىندە جازىلدى. وبلىستىق ەكى، اۋداندىق ون شاقتى گازەتكە جەتەكشىلىك ەتىپ وتىرعان، ول قازاقتىلدى باسىلىمداردى تاراتۋدىڭ بالاما جولىن قاراستىرۋ قاجەتتىلىگى جونىندە ويلارىن دا ايتتى.   
ارىپتەسىمىز سەرىك ابدىبەك قازاق گازەتتەرىن شىعارىپ قانا قويماي، ونى تاراتۋعا مەملەكەتتىڭ دە ارالاسۋى قاجەتتىگىن ايتادى.
- قازاق گازەتتەرىن شىعارىپ وتىرعانداردىڭ ءونىمى ساتىلىپ جاتسا، بايىپ كەتپەسى انىق. بۇل جەردە قازاق وقىرماندارىنىڭ اقپارات الۋدا قيىندىق كورەتىنىن ايتقان ءجون، - دەيدى ول.
ال قازاق گازەتىن تەگىن تاراتۋ ارقىلى ەش قيىندىققا كەزىكپەي وتىرعانىن العا تارتقان «نۇرداۋلەت» گازەتىنىڭ قۇرىلتايشىسى ءارى «نۇرداۋلەت» مەشىتى» قايىرىمدىلىق قورىنىڭ توراعاسى ماقسات بايجارقىنوۆ، وزگە ەمەس، ناق «قازپوشتانىڭ» «نۇرداۋلەت» گازەتىن نەگە تىركەۋگە الماعانىن تۇسىنبەيتىنىن جەتكىزدى. 
- مەن گازەتتى ساتپايمىن. 1000-1500 دانامەن شىعارامىن دا، تەگىن تاراتامىن. قايىرىمدىلىق قورى اتىنان كەتەدى. ساتپاعان سوڭ، ەشقانداي قيىندىق جوق.
- ءبىر كەزدەرى گازەتىڭىزدى دۇڭگىرشەكتەردەن ساتىپ الىپ جۇردىك قوي...
- ساتىلعان كەزى بولعان شىعار، كەيدە ارتىق شىعارساق، ساتقان شىعارمىز، جالپى تەگىن تاراتامىن. 
- «قازپوشتا» ارقىلى تاراتپايسىز با؟
- جوق! (اڭگىمەلەسۋشىمىزدىڭ داۋسى قاتتى شىقتى - اۆت.) ءبىز ءتىپتى «قازپوشتاعا» تىركەتپەدىك. ولاردىڭ ءبىزدى نەگە تىركەمەگەنىن  بىلمەدىم. ال، ادىلەت مينيسترلىگى تاراپىنان، ارينە، تىركەلدىك.  
قازاق گازەتتەرىن وڭاي تاباسىز با؟
- ىزدەسەڭ تابىلادى. كەز كەلگەن گازەتتى ىزدەسەڭ تابىلادى. راس، دۇڭگىرشەكتەردە جوقتىڭ قاسى، بىراق مەن ىزدەيمىن. «حالىق ءسوزى» دەگەن گازەتتى  كۇنى كەشە «نۇرداۋلەتتىڭ» قاسىنان ساتىپ الدىم. قازىر قولىمدا «اقتوبە»، «ايقىن»، «التىن عاسىر»، «التىن وردا»، «دات» گازەتتەرى جاتىر. تەك ىزدەۋ كەرەك.
بىراق ماقسات اقساقال گازەتتەردى قانشا ۋاقىت ىزدەيتىنىن ايتپادى.

اقتوبە وبلىسى

«جاس قازاق» گازەتى