قازاقستان رەسپۋبليكاسى مادەنيەت جانە سپورت مينيسترلىگى  ءتىل ساياساتى كوميتەتىنىڭ شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى  قازاق ءتىلىنىڭ لاتىن گرافيكاسىنا نەگىزدەلگەن جاڭا ەملە ەرەجەلەرى قاناتقاقتى جوباسىنىڭ سىناما جۇمىستارىن  2018 جىلعى 16 تامىزدا  الماتى قالاسىندا جالعاستىرادى.

ۇلتتىق كوميسسيا جانىنان قۇرىلعان ورفوگرافيالىق جانە ادىستەمەلىك جۇمىس توپتارى 2018 جىلعى 4-10 شىلدە قازاق ورفوگرافياسى ەرەجەلەرىنىڭ كونتسەپتسياسى نەگىزىندە  «لاتىن گرافيكاسى نەگىزىندەگى جاڭا قازاق ءالىپبيىنىڭ ەملە ەرەجەلەرىنىڭ جوباسىن» ساراپتاپ، تالقىلاۋدان وتكىزگەن بولاتىن.

شارانىڭ ماقساتى – قازاقتىلدى قاۋىم وكىلدەرى اراسىندا  ساۋالناما جۇرگىزۋ ارقىلى جاڭا ەملە ەرەجەلەرى جوباسىن ازىرلەۋ بارىسىندا تۋىنداعان ماسەلەلەردىڭ  تيىمدى جولدارىن انىقتاۋ. قازاق ءماتىنىن قۇرايتىن ءتول، كىرمە جانە شەتەل ءسوزىن لاتىن الىپبيىمەن تاڭبالاۋدا ءتىل قولدانۋشىلار باسىمدىق بەرگەن  جازبا-ۇلگىلەرى (ورفوگراممالار) سىناما قورىتىندىسى الىنادى.   قازاقتىلدى قاۋىمنىڭ شەت تىلدەردەن ەنگەن سوزدەردى جازۋ ارقىلى يگەرۋىن  انىقتاۋ–جاڭا ەملە ءۇشىن ماڭىزدى.

ساۋالناما ناتيجەسىندە انىقتالعان ستاتيستيكالىق ءارى ساپالىق مالىمەتتەر ەملە ەرەجەلەرىنىڭ جالپىحالىقتىق قولداۋعا يە نۇسقاسىن ازىرلەۋگە سەپتىگىن تيگىزەدى.

ساۋالناماعا الماتى قالاسىنداعى، بارلىق باسقارمالار، دەپارتامەنتتەر، اكىمدىكتەر قىزمەتكەرلەرى مەن اسكەري قىزمەتشىلەر،  جوو ستۋدەنتتەرى قاتىسادى. قاتىسۋشىلاردىڭ جالپى سانى 250 ادامدى قۇرايدى.

Abai.kz