ادامداردىڭ كەي-كەيدە ءوزىن ءبىر جىلت ەتكىزىپ كورسەتىپ قالۋ ءۇشىن قانداي دا ءبىر داراقىلىقا باراتىندىعىن كورگەندە «بۇل دۇنيە نە بولىپ كەتتى؟» دەپ قايران قالماسقا امالىڭ جوق. ءسىرا، ەڭبەكسىز، تەگىن كەلگەن بايلىق قاي پەندەنىڭ دە بەت بەينەسىن ايقىن كورسەتىپ، پارىقسىزدىعى مەن تەكسىزدىگىن ءدۇيىم جۇرتقا جايىپ سالماي قويمايدى ەكەن. مىنە، ءبىزدىڭ قالتاسىنا قوماقتى قارجى تۇسكەن بايشىكەشتەرىمىز وزدەرىنە جاقسى ءبىر «ەرمەك» تاپقان سىڭايلى. ونىسى، وزدەرىنە ءۇنايتىن، بىلايعى جۇرت تاڭ قالاتىنداي ماشينانىڭ «ادەمى» ءنومىرى ءۇشىن ءبىر شاشىلىپ قالۋ سەكىلدى سۇيكىمسىزدەۋ قىلىق كورىنەدى. ال بۇعان كەتكەن ەسىل اقشانى ەستىگەنىڭدە جاعاڭدى ۇستايتىنداي جاعىمسىز سەزىم بويىڭدى شارپىپ وتەرى ءسوزسىز. ماسەلەن، «ۇكىمەت ازاماتار ءۇشىن» دەپ اتالاتىن مەملەكەتتىك كورپوراتسيانىڭ وكىلى مۇرات جۇمانبايدىڭ ايتۋكىنا قاراعاندا جىل باسىنان بەرى وزدەرى كەرەمەت دەپ سانايتىن الگىندەي نومىرلەردى الۋعا اناۋ-مىناۋ ەمەس ءبىر ميلليارد تەڭگەدەن استام اقشانى ەش قىسىلماستان بەرە سالىپتى. ال مۇنداي «مىرزالىقتى» ەڭ الدىمەن استانا مەن الماتى قالاسىندا تۇراتىن قالتالىلار ىستەسە كەرەك.

-بۇل سوما بىلتىرعى جىلدىڭ وسى كەزەڭىمەن سالىستىرعاندا  ءۇش ەسەدەن اسىپ وتىر. ماسەلەن، بىلتىرعى جىلى «ادەمى» نومىرلەرگە اڭسارى اۋاتىندار وعان بارلىعى 587مىڭ 406 تەنگە جۇمساسا، بيىلعى جىلى ولار سوزگە كەلمەستەن ءبىر ميللياردان استام تەڭگەنى بەرە سالعان،-دەيدى كورپوراتسيا باسشىسى.

جوعارىداعى ەكى شاھاردى ايتپاعاندا، «كەرەمەت» ءنومىر ءۇشىن تالاسقا ەلىمىزدىڭ وبلىستارى دا قىزۋ كىرىسىپ كەتسە كەرەك. ونىڭ كوش باسىندا تۇركىستان وبلىسى تۇر ەكەن. ونىمەن تىزگىن تىرەستىرگەن جامبىل وبلىسى دا ەشكىمگە دەس بەرمەيتىن كورىنەدى. اقشانى سۋداي شاشقان وسى جارىستا ءبىزدىڭ قوستاناي وبلىسى جۇلدەلى ءۇشىنشى ورىندى يەلەنىپ، ايدى اسپانعا ءبىر-اق شىعارىپتى.

بىزدەگى جەلوكپەلەر الگىندەي «ادەمى» ءنومىردى يەلەنۋ ءۇشىن 90 ميلليون تەڭگەنى ەش قينالماستان بەرە سالعان. بىزدە اسىرسە «001» دەگەن نومىرلەر ەرەكشە سۇرانىسقا يە ەكەن. اقشاسى كوپ بولسا دا اقىلى ازداۋ بۇل مىقتىلار ەگەر وسىنداي نومىرلەر السا، وزدەرىن وبلىس اكىمى مەن وبلىستىق ىشكى ىستەر دەپارتامەنتىنىڭ باسشىسى قاتارىنان ويىپ تۇرىپ ورىن الامىن دەگەن ويدا بولسا كەرەك. ويتكەنى الگى ەكەۋىنىڭ ماشيناسى وسىنداي تسيفرلاردان باستالادى. ال ەندى مۇنداي داراقىلىقا كۇلەسىڭ بە، جىلايسىڭ با؟

ەرەكشە ءنومىر ءۇشىن قىرقىسىپ جاتقان ادامداردى كورىپ وتىرىپ، بۇلاردى وزدەرىنىڭ كىندىك قانى تامعان، تۋعان ولكەسىنە  جانى اشىماي ما دەپ ويلاپ قالاسىڭ. ايتپەسە ءبىزدىڭ وبلىس كەشە عانا وتكەن استانا كۇنىنە ارناپ، كەرەمەت ۆەلوترەك سالامىن دەپ جارتى ميلليارد تەڭگە جۇساپ، قالتاسى مىقتاپ قاعىلسا كەرەك. ەندى وبلىسىمىزداعى 500-دەن استام مەكتەپكە كۇردەلى جوندەۋ جۇرگىزۋگە اقشا تاپپاي قينالىپ وتىر. مىنە، ەرەكشە نومىرگە قۇمار، اقشاسى قالتاسىنا سيماي جۇرگەن  الگىندەي جاندارىڭ ءبىرى وزدەرى بىتىرگەن مەكتەپتىڭ ءبىرىن جوندەۋگە قول ءۇشىن بەرسە تاعىنان ءتۇسىپ قالمايتىن شىعار. قايتا ساۋاپقا قالماي ما؟..

وسى ورايدا مىناۋ كورشىمىز - اقتوبە وبلىسىندا ءبىر كاسىپكەردىڭ مۋزەيگە دەپ 635 ميلليون تەڭگە بەرگەندىگىن ەستىگەندە ءبىر قۋانىپ، ءبىر قىسىلىپ قالدىق. قۋانعانىمىز «بىزدە دە اتىمتاي جومارت سەكىلدى ازاماتار بار ەكەن عوي» دەپ مارتەبەمىز وسسە،  وبلىسىمىزداعى ءوز بايلىعىن قايداعى ءبىر تۇككە تۇرمايتىن قاڭىلتىرعا جۇمساعاندىعىن كورىپ، جەرگە كىرەردەي بولعانىمىزدى جاسىرىپ قايتەمىز.

جايبەرگەن بولاتوۆ

قوستاناي

Abai.kz