الماتى وبلىسىنىڭ ورتالىعى – تالدىقورعان قالاسىنىڭ اكىمى داستان شالتاباەۆتىڭ جاڭا قىزمەتكە تاعايىندالعانىنا بۇگىن، مىنە، 100 كۇن تولدى. اتالعان مەرزىم ىشىندە داستان تۇراربەكۇلى نە ىستەدى، جاڭا اكىمنىڭ بەت الىسى قالاي دەگەن سۇراق ەل اراسىندا مىندەتتى تۇردە قويىلۋى مۇمكىن. وسىعان وراي قالا اكىمىنىڭ 100 كۇندە اتقارعان 10 ءىسىن نازارلارىڭىزعا ۇسىنامىز:

1. داستان شالتاباەۆتىڭ اتالعان لاۋازىمعا تاعايىندالۋى مەكتەپ وقۋشىلارىنىڭ جازعى دەمالىسقا شىعۋىمەن بارابار كەلگەندىكتەن قالا اكىمى بالالارعا 1500 دوپ تاراتىپ، جاس وسپىرىمدەردى سالاۋاتتى ءومىر سالتىن ۇستانۋعا باستادى.

2. اتالعان ۋاقىت ارالىعىندا ەكى ارەندالىق جانە ءبىر كوممۋنالدىق ءۇي سالىنىپ ءبىتىپ، قالا تۇرعىندارىنىڭ پايدالانۋىنا 180 پاتەر بەرىلدى.

3. جاز ايلارىندا 100 جانە 75 ورىندىق ەكى جەكە مەنشىك بالاباقشا قولدانىسقا بەرىلىپ، بۇلدىرشىندەردىڭ شاتتىق كۇلكىسى مەكتەپكە دەيىنگى عيماراتتان شىعىپ جاتىر. بۇگىنگى كۇنى قالادا بالالاردى بالاباقشامەن قامتۋ 97%.ورىندالدى. وسى ايدا شاھارىمىزدا تاعى ءبىر بالاباقشا اشىلادى دەپ كۇتىلۋدە.

4. جاڭا وقۋ جىلىندا جاڭادان بوي كوتەرىپ كەلە جاتقان ەكى اۋداننىڭ جاعدايىنا بايلانىستى 1200 ورىندىق ەكى مەكتەپ سالىنىپ، ءبىرىنشى قىركۇيەك كۇنى وقۋشىلار جاڭا وقۋ جىلىن جاڭا مەكتەپتە باستادى. سونىمەن قاتار، قالامىزدا ءۇش اۋىسىمدى مەكتەپ مۇلدە جوق ەكەنىن اتاپ وتۋگە بولادى.

5. داستان تۇراربەكۇلى قالا اكىمدىگىنە قىزمەتكە كەلگەندە اۋىلشارۋاشىلىق جەرلەردىڭ ەلەكتروندى كارتاسى 21% بولسا، بۇگىنگى كۇنى 100 پايىزعا تولىقتى.

6. بيىل استانانىڭ 20 جىلدىعىنا وراي تالدىقورعاندا استانا جانە قادىرعالي جالايري داڭعىلدارى جانە زىليقا تامشىباي مەن بايكەن ءاشىموۆ كوشەلەرى اشىلدى.

7. كەز كەلگەن قالانىڭ نەگىزگى ماسەلەسى – زاڭسىز، جابايى ساۋدا ەكەنى بارشاعا ايان. داستان شالتاباەۆ قىزمەتكە كەلگەن ۋاقىتتان باستاپ وسى ماسەلەمەن اينالىسىپ، قالانىڭ ارحيتەكتۋرالىق كەلبەتىنە ساي كەلمەيتىن دۇڭگىرشەكتەردى الدىرىپ، جابايى ساۋداعا تيىم سالدى.

8. تالدىقورعان قالاسىنىڭ جول قۇرىلىسى جاسالىنىپ، بۇگىنگى كۇنگە 10 كۇردەلى جوندەۋ جۇمىسى اياقتالسا، جەكە تۇرعىن ءۇي ماسسيۆتەرىندە 21 كوشەنىڭ جوندەلۋى جوسپارلانىپ، ونىڭ 12 كوشەسى ءبىتتى. جىل سوڭىنا دەيىن قالعان  9 كوشەنىڭ دە جوندەۋ جۇمىستارى اياقتالادى دەپ كۇتىلۋدە.

9. داستان تۇراربەكۇلىنىڭ تاعايىندالۋىمەن قالانىڭ قۇرىلىس بارىسى جاندانىپ، ارتتا قالىپ كەلە جاتقان نىسانداردىڭ ءبارى ءبىر قالىپقا كەلتىرىلدى.

10. اتالعان ءجۇز كۇننىڭ ىشىندە شاعىن جانە ورتا بيزنەس وكىلدەرى قالادا 31 نىسان اشىپ، 200-دەن استام ادامعا جۇمىس ورنىن تاۋىپ بەردى.

وسىلايشا جاڭا قىزمەتكە كەلگەن قالا اكىمى داستان شالتاباەۆ 100 كۇن ىشىندە 10 ەلەۋلى ءىس اتقاردى. اكىمدىك قىزمەتىن ەندى عانا باستاعان داستان تۇراربەكۇلى ءالى دە كوپتەگەن جۇمىستار اتقارىپ، قالا تۇرعىندارىنىڭ ىقىلاسىنا بولەنەتىنىنە سەنىمىمىز مول.

Abai.kz