كەشە الماتىعا پرەزيدەنت كەلدى. وتكەندە ەلباسى قىرعىزستانعا ساپارلاپ بارعان ەدى. ەلباسى تۇركى تىلدەس ەلدەرى ىنتىماقتاستىق كەڭەسىنىڭ VI سامميتىنە قاتىسىپ، دۇنيەجۇزىلىك كوشپەندىلەر ويىنىنىڭ اشىلۋىندا بولىپ قايتقان ەدى.

الماتىعا استانادان قىرعىزستان جاقىن (گەوگرافيالىق ورنالاسۋى جاعىنان) بولعاندىقتان دا ەلباسى قىرعىزعا جاساعان ءار ساپارىنان سوڭىندا الماتىعا ات باسىن بۇرىپ تۇرادى. ءتىپتى، جيەنبەكوۆ جەڭەتىن سايلاۋدىڭ دوداسى دولدانىپ تۇرعان تۇستا، قىرعىز تاعىنا ءۇمىتتى بابانوۆتى الماتىعا شاقىرتىپ ەدى عوي. ەسىمىزدە. بۇل جولى دا سولاي بولدى. پرەزيدەنت كەلدى الماتىعا.

باۋىرجان قىدىرعاليۇلى دا قاراپ قالعان جوق. الا جازداي الەكتەنىپ ءجۇرىپ ءارىن كىرگىزگەن كوشەلەردى كورسەتتى. جاساعان جۇمىسىنىڭ ەسەپ-قيسابىن تۇگەندەپ، «اكەسىنىڭ كلاستاسى»، ءوزىنىڭ باستىعى – پرەزيدەنتكە ەسەپ بەردى.

ءيا، ءسويتتى. اقوردانىڭ ءباسپاسوز قىزمەتى پرەزيدەنت نۇرسۇلتان نازارباەۆتىڭ الماتىداعى رەكونسترۋكتسيادان وتكەن كوشەلەردى كورىپ قايتقانىن حابارلادى.

سونىمەن باۋىرجان بايبەك پرەزيدەنتكە قاي كوشەلەردى كورسەتتى؟ اباي جانە فۋرمانوۆ، وي كەشىرىڭىزدەر، نازارباەۆ داڭعىلىن كورسەتكەن ەكەن. ونى دا اقوردا ايتتى.

ءيا، رەكونسترۋكتسيا جاسالدى. جاياۋ جانە ۆەلوجۇرگىنشىلەرگە قولايلى ەتىپ جاسالدى. ينفراقۇرىلىم وزگەردى. قالانىڭ ارحيتەكتۋرالىق اۋىس-ءتۇيىسى جاسالدى. كوشەلەردى جارىقتاندىرۋ، اباتتاندىرۋ جۇمىستارى جۇرگىزىلدى.

قالا اكىمى باۋىرجان بايبەك مەملەكەت باسشىسىنا شاھار تىرشىلىگىن ساۋلەت-قۇرىلىس جۇرگىزۋ تۇرعىسىنان رەتتەۋ ءۇشىن پيلوتتىق رەجىمدە ەنگىزىلگەن جاڭا ديزايىن-كود ءادىسى جونىندە مالىمدەدى. بۇل ءادىس مەگاپوليستىڭ بىرىڭعاي ءستيلىن قالىپتاستىرۋعا ارنالعان، ءارى ءبىر قۇجاتتا ناقتىلانعان ەرەجەلەر مەن ۇسىنىمداردى ايقىندايدى.

سونىمەن قاتار، نۇرسۇلتان نازارباەۆ جالپى ۇزىندىعى 8,7 شاقىرىمدى قامتيتىن تيميريازەۆ جانە جاندوسوۆ كوشەلەرىنىڭ بويىمەن تارتىلعان BRT كوشە-جول جەلىسىمەن تانىستى.

سونىمەن، پرەزيدەنت نۇرسۇلتان نازارباەۆ ءوزىنىڭ اتىمەن اتالاتىن نۇرسۇلتان نازارباەۆ داڭعىلىمەن ءجۇرىپ ءوتتى. اقپارات وسىمەن ءتامام.

ەسكەرتە كەتەيىك، 2017 جىلدىڭ 30-قاراشاسىندا الماتى قالالىق ءماسليحاتى جيىن وتكىزىپ، فۋرمانوۆ كوشەسىنە نۇرسۇلتان نازارباەۆتىڭ ەسىمىن بەرۋدى ءبىر اۋىزدان ماقۇلداعان.

فۋرمانوۆ اتاۋى 1956 جىلى بەرىلىپتى. سودان مىنە، 61 جىل دەگەندە سوۆەتتىك توڭكەرىسشىنىڭ اتى ءوشتى.

الماتىداعى ورتالىق كوشە - قازاقستان پرەزيدەنتىنە بەرىلگەن العاشقى كوشە ەمەس.

2015 جىلى تۇركيانىڭ ادانا قالاسىندا نۇرسۇلتان نزاارباەۆ كوشەسى اشىلدى. ودان بولەك تۇركيانىڭ قىرشەحير، نەۆشەحير، گەبزە قالالارىندا دا نازارباەۆ كوشەلەرى بار. ءدال سول جىلى تاتارستاننىڭ قازان قالاسىنداعى «ەسپەرانتو» كوشەسى – «نۇرسۇلتان نازارباەۆ» كوشەسى بولىپ وزگەردى. ال وسىدان 10-جىلدان استام ۋاقىت بۇرىن يوردانيانىڭ استاناسى اممان قالاسى مەن شەشەنستاننىڭ گروزنىي قالالارىندا «نۇرسۇلتان نازارباەۆ» كوشەسى اشىلعان.

ايتپاقشى، ينگۋشەتيانىڭ ماگاس قالاسىندا دا قازاقستان پرەزيدەنتىنىڭ اتىندا كوشە بار.

بۇعان قوسا، گوللانديا مەن جاپونيادا قازاقستان پرەزيدەنتىنىڭ ەسىمى قىزعالداق جانە حريزانتەما تۇرلەرىنە بەرىلگەن. 2014 جىلى «قازاقستان پرەزيدەنتى» اتتى گوللاند قىزعالداعى پايدا بولدى.

نازارباەۆ ەسىمى بەرىلگەن العاشقى نىسانداردىڭ ءبىرى – نۇرسۇلتان شىڭى. ول تيان-شاننىڭ ىلە الاتاۋى سىلەمىنىڭ سولتۇستىگىندە ورنالاسقان. 1998 جىلعا دەيىن بۇل شىڭ كومسومول شىڭى دەپ اتالعان بولاتىن.

قازاقستاندى كەڭەس بودانىنان شىعىپ، تاۋەلسىزدىك العان جىلداردان بەرى باسقارىپ كەلە جاتقان پرەزيدەنت نۇرسۇلتان نازارباەۆتى (رەسمي قر تۇڭعىش) ءوز ەلىمىزدە دە اجەپتاۋىر ۇلىقتاپ ءجۇرمىز. وزگەلەردەن كەم قالعانىمىز جوق.

2017 جىلى استانا كۇنى قارساڭىندا ۇكىمەت استانا اۋەجايىن «حالىقارالىق نۇرسۇلتان نازارباەۆ اۋەجايى» دەپ اتاۋ تۋرالى قاۋلى قابىلدادى. قازاقستاننىڭ بىرنەشە قالاسىندا تۇڭعىش پرەزيدەنت ساياباقتارى بار. استانادا تۇڭعىش پرەزيدەنت مۇراجايى، نازارباەۆ ۋنيۆەرسيتەتى، وزگە قالالاردا نازارباەۆ زياتكەرلىك مەكتەپتەرى جۇمىس جاسايدى.

نازارباەۆتىڭ ءوزى اتاۋلاردى ونىڭ قۇرمەتىنە وزگەرتۋگە قارسى ەكەنىن تالاي مارتە ايتقان، بىراق پرەزيدەنت تۋرالى فيلمدەر ءتۇسىرىپ، وعان ەسكەرتكىشتەر ورناتۋ ءالى جالعاسىپ كەلەدى.

نۇرگەلدى ابدىعانيۇلى

Abai.kz