ءماجىلىس دەپۋتاتى زاۋرەش امانجولوۆا قىرعىزستانمەن شەكارادا سەگىز وتكىزۋ بەكەتى بارىن، بىراق "قورداي" جانە "قاراسۋ" تەكسەرۋ-وتكىزۋ بەكەتتەرىنەن وتەتىن جولاۋشىلار مەن كولىك قوزعالىسى جىلدا قيىندايتىنىن ايتقان. ول اسىرەسە جاز مەزگىلىندە شەكارادا كەزەك ۇلعاياتىنىن ايتىپ، بۇل ماسەلەنى رەتتەۋدە قانداي شارالار اتقارىلىپ جاتقانىن سۇرادى.

ۇلتتىق قاۋىپسىزدىك كوميتەتى شەكارا قىزمەتىنىڭ ديرەكتورى دارحان ءدىلمانوۆ "قورداي" بەكەتىنەن ەكى ەل جاعىنان دا ادام مەن ترانسپورت كوپ وتەتىنىن، بۇعان دەيىن تولقۇجات تەكسەرۋ ورنى سانى 18-دەن 36-عا دەيىن كوبەيتىلگەنىن، قايتا قۇرىلىمداۋدان سوڭ ونىڭ سانى 60-قا ارتاتىنىن ايتتى. ونىڭ سوزىنشە، شەكارادا وتكىزۋ بەكەتتەرىن اشۋعا ينۆەستيتسيا جانە دامۋ مينيسترلىگى جاۋاپتى، ال شەكارا قىزمەتى بەكەتتەر سانىن ۇلعايتۋعا قارسى ەمەس.

بۇدان سوڭ نۇرلان نىعماتۋلين سىرتقى ىستەر مينيسترلىگى بۇل ماسەلەنى رەتتەۋدە ءتيىستى ورگاندار جۇمىسىن ۇيلەستىرۋى ءتيىس ەكەنىن، پروبلەمانى كەشەندى تۇردە شەشۋ كەرەگىن ايتتى.

ءماجىلىس وسى وتىرىستا "قازاقستان-قىرعىزستان شەكاراسىن دەماركاتسيالاۋ تۋرالى شارتتى راتيفيكاتسيالاۋ تۋرالى" زاڭ جوباسىن ماقۇلدادى. ءماجىلىس تاراتقان اقپارات بويىنشا، قازاقستان مەن قىرعىزستان اراسىندا ەكى ەل شەكاراسىن بەكىتۋ تۋرالى شارتقا 2017 جىلى 25 جەلتوقساندا الماتىدا قول قويىلعان. شارت ەكى ەل شەكاراسىن حالىقارالىق قۇقىقتىق تۇرعىدان بەكىتۋ ماقساتىندا قابىلدانعان.

Abai.kz