«Junior Eurovision Song Contest»  -  حالىقارالىق  تەلەۆيزيالىق بالالار ءان بايقاۋى. بۇل بايقاۋ العاش رەت 2003 جىلى كوپەنگاگەندە (دانيا) ءوتىپتى. وندا 16 مەملەكەتتىڭ وكىلدەرى باق سىناعان ەكەن. باستاپقىدا جەڭىمپازدى ترانسلياتسيا ارقىلى انىقتاسا، 2008 جىلدان باستاپ  تەلەكورەرمەندەر  مەن  قازىلار القاسى بىرلەسىپ تاڭدايتىن بولعان.  

وسى حالىقارالىق جوباعا  قازاقستان بيىل العاش رەت قاتىسپاق. وعان «حابار» اگەنتتىگىنىڭ  ەۋروپالىق حابار تاراتۋ وداعىنا  (EBU)  مۇشە  بولۋى ىقپال ەتكەن. ءسويتىپ، حالىقارالىق كەلىسىم شارتتار ناتيجەسىندە، ەڭ ايتۋلى جوباعا قازاقستان دا جولداما الدى.

اتالعان ارنا  ۇيىتقى بولىپ وتىرعان بۇل شاراعا، اۋەلى  رەسپۋبليكا  اۋماعىندا  وتىنىشتەر قابىلدانعان. سولاردىڭ ىشىنەن 9 بەن 14 جاس ارالىعىنداعى 10 ۇمىتكەر ىرىكتەلىپ، فينالعا شىقتى.

ولار:

زەرە امىربەكوۆا – (الماتى)

مەيىرجان جيدەباي – (اقتوبە)

ماريا زاتۆارنيتسكايا – (پاۆلودار)

سۇيكىم قابىلبەك – (استانا)

جانەليا قالدىبەك – (استانا)

دانەليا تۋلەشوۆا – (الماتى)

ەرجان ماكسيم – (ورال) 

دينار ناديربەكوۆا – (شقو)

اسۋات سانات – (اتىراۋ) 

بينۋرا ساۋداباي -  (استانا)

بايقاۋدىڭ شارتى بويىنشا،  ۇمىتكەر بۇرىن ەش جەردە ايتىلماعان ءوز ءانىن جاندى داۋىستا ورىندايدى. جانە سول  انگە ساي ساحنالىق قويىلىم  ۇيىمداستىرادى.

ال، جەڭىمپازدى 50 پايىز كورەرمەندەردىڭ داۋىسى، 50 پايىز ءادىل قازىلار القاسى انىقتادى. قازىلار القاسىندا، روزا رىمباەۆا، تامارا اسار، باعىم مۋحيتدەنوۆا، رينات گايسين، ءلايلا سۇلتانقىزى، ءمادينا سادۋاقاسوۆا  جانە الان اجيباەۆ بولدى.

ناتيجەسىندە حالىقتىڭ 12, قازىلار القاسىنىڭ تاراپىنان 10 داۋىس جيناعان  دانەليا تۋلەشوۆا ىرىكتەۋ كەزەڭىنىڭ جەڭىمپازى اتاندى. ول فينالدا  ءوزى سواۆتور بولعان “وزىڭە سەن” دەگەن شىعارمانى ورىندادى.ء(سوزى: كاميلا دايروۆا، دانەليا تۋلەشوۆا، ارتەم كۋزمەنكوۆ، ءانىن جازعان – يۆان لوپۋحوۆ)

ءسويتىپ، دانەليا 25 قاراشادا مينسكتە وتەتىن ءان دوداسىندا قازاقستاننىڭ اتىنان شىعاتىن بولادى.

بيىل بايقاۋعا قاتىسۋعا 19 ەل ءوتىنىش بىلدىرگەن. ولاردىڭ قاتارىندا البانيا، ارمەنيا، اۋستراليا، ازەربايجان، بەلارۋس، فرانتسيا، ماكەدونيا، گرۋزيا، يرلانديا، يزرايل، يتاليا، قازاقستان، مالتا، پولشا، پورتۋگاليا، رەسەي، سەربيا، نيدەرلاندى، ۋەلس بار.

ال، بۇل جوبانى قازاقستاندىق كورەرمەندەر تەك «حابار» تەلەارناسى ارقىلى كورە الادى.

نۇربيكە بەكسۇلتانقىزى

Abai.kz