كەڭەستە پرەمەر-ءمينيستردىڭ ءبىرىنشى ورىنباسارى ا.مامين جانە تۇركىستان وبلىسىنىڭ اكىمى ج.تۇيمەباەۆ بايانداما جاسادى. بۇل تۋرالى اقوردانىڭ رەسمي سايتىندا حابارلاندى.

باياندامالاردى تىڭداعان سوڭ قازاقستان پرەزيدەنتى قابىلدانعان جول كارتاسىن ساپالى ءارى ۋاقتىلى جۇزەگە اسىرۋ، سونداي-اق وبلىستىق باسقارۋ ورگاندارى تاراپىنان بارلىق مەملەكەتتىك قىزمەتتەردىڭ ۇزدىكسىز كورسەتىلۋىن قامتاماسىز ەتۋ قاجەتتىگىن اتاپ ءوتتى.

نۇرسۇلتان نازارباەۆ ءوڭىر باسشىلىعى نازار اۋدارۋعا ءتيىس جەكەلەگەن ماسەلەلەرگە توقتالدى.

– وبلىستىڭ قارجىلىق تۇراقتىلىعىن نىعايتۋ قاجەت. شىمكەنتتىڭ وبلىس قۇرامىنان شىعۋىنا بايلانىستى ايماقتىڭ ەكونوميكالىق بازاسى تومەندەدى. بۇگىنگى تاڭدا وبلىس بيۋدجەت قاجەتتiلiكتەرىنىڭ 20 پروتسەنتىن عانا ءوز كۇشىمەن قامتاماسىز ەتەدى. نەگىزگى مىندەت – ءوسىمنىڭ جاڭا رەزەرۆتەرiن جانە ءوڭىر بيۋدجەتىنiڭ كiرiس بولىگىن تولىقتىرۋ كوزiن تابۋ، – دەدى مەملەكەت باسشىسى.

قازاقستان پرەزيدەنتى حالىقتى جۇمىسپەن قامتۋدىڭ، سونداي-اق كاسىپكەرلىكتى وركەندەتۋ، اۋىل شارۋاشىلىعىن دامىتۋ جانە كولىك-لوگيستيكا قىزمەتتەرىنىڭ ساپاسىن ارتتىرۋ ءۇشىن جاعداي جاساۋدىڭ ماڭىزدىلىعىن اتاپ ءوتتى.

– «ورتالىق ازيا» حالىقارالىق ساۋدا ايماعىن قۇرۋ مۇمكىندىگىن قاراستىرعان ءجون. بۇل تۇركىستان وبلىسىمەن قاتار جالپى رەسپۋبليكا ەكونوميكاسىنىڭ دا وركەندەۋىنە تىڭ سەرپىن بەرەدى. 2020 جىلعا قاراي وزبەكستانمەن اراداعى تاۋار اينالىمىن 5 ميلليارد اقش دوللارىنا دەيىن ارتتىرۋعا الەۋەتىمىز جەتەدى. وسىعان بايلانىستى ۇكىمەتكە تۇركىستان وبلىسىنىڭ اكىمدىگىمەن بىرلەسىپ، وزبەكستان تاراپىمەن حالىقارالىق ساۋدا ايماعىن جانە جاڭا «تۇركىستان» حالىقارالىق وتكىزۋ بەكەتىن قۇرۋ ماسەلەسىن پىسىقتاۋدى تاپسىرامىن، – دەدى نۇرسۇلتان نازارباەۆ.

مەملەكەت باسشىسى ىشكى ءتۋريزمدى وركەندەتۋ جانە ءتيىستى تۋريستىك ينفراقۇرىلىم دايىنداۋ ماسەلەلەرىنە توقتالدى.

قازاقستان پرەزيدەنتى وبلىستى دامىتۋ جانە قۇرىلىس جۇرگىزۋ ىسىنە جەرگىلىكتى بيزنەس وكىلدەرىن، سونداي-اق ۇلتتىق كومپانيالار مەن كۆازيمەملەكەتتىك سەكتور كاسىپورىندارىنىڭ باسشىلارىن بەلسەندى اتسالىسۋعا شاقىردى.

جيىندا قازاقستان پرەزيدەنتى ۇكىمەت پەن ايماق باسشىلىعىنا وبلىس ورتالىعىن ودان ءارى دامىتۋ جونىندە بىرقاتار ناقتى تاپسىرما بەردى.

نۇرسۇلتان نازارباەۆ ينۆەستيتسيا تارتۋ ارقىلى قالا ىشىندەگى جولداردى جوندەۋ، سونداي-اق شىمكەنت جانە قىزىلوردا باعىتتارىنا ارنالعان اۆتوۆوكزال سالۋ جۇمىستارىن قامتاماسىز ەتۋدى تاپسىردى.

– شاھار تۇرعىندارى سانىنىڭ وسۋىنە جانە تۋريستەردىڭ كوپتەپ كەلۋىنە بايلانىستى، اكىمدىككە «سامۇرىق-قازىنا» ۇلتتىق ءال-اۋقات قورىمەن، ينۆەستيتسيالار جانە دامۋ مينيسترلىگىمەن بىرلەسىپ، تۇركىستان قالاسىنىڭ تەمىرجول ۆوكزالىن رەكونسترۋكتسيالاۋ، ونىڭ وتكىزۋ مۇمكىندىگىن ۇلعايتۋ، سونداي-اق اەروپورت سالۋ جانە اۋە قاتىناستارىن قامتاماسىز ەتۋ ماسەلەلەرىن قاراستىرۋدى تاپسىرامىن، – دەدى قازاقستان پرەزيدەنتى.

سونىمەن قاتار، مەملەكەت باسشىسى الەۋمەتتىك نىسانداردى دامىتۋ، تۇرعىن ءۇي، ءبىلىم بەرۋ جانە دەنساۋلىق ساقتاۋ مەكەمەلەرىن سالۋ، ينجەنەرلىك ينفراقۇرىلىمدى، سونىڭ ىشىندە گازبەن جانە جىلۋمەن قامتاماسىز ەتۋ سالالارىن ىلگەرىلەتۋ ماسەلەلەرىنە توقتالدى. وسىعان وراي نۇرسۇلتان نازارباەۆ بالامالى ەنەرگيا كوزدەرىن پايدالانۋ مۇمكىندىگىن قاراستىرۋدى تاپسىردى.

– كاسىپكەرلىكتى دامىتۋ جانە ينۆەستيتسيا تارتۋ ءۇشىن جاعداي جاساۋ كەرەك. جاڭا قوناق ۇيلەردىڭ، مەيرامحانالار مەن ءدامحانالاردىڭ، ساۋدا ويىن-ساۋىق ورتالىقتارىنىڭ جانە باسقا دا نىسانداردىڭ قۇرىلىسىن باستاۋ قاجەت، – دەدى قازاقستان پرەزيدەنتى.

نۇرسۇلتان نازارباەۆ تۇركىستاندا تۋريزم، قۇرىلىس جانە ءوندىرىس سالالارىنداعى بيزنەستى وركەندەتۋ ءۇشىن قولايلى جاعداي قالىپتاستىراتىن ارنايى ەكونوميكالىق ايماق قۇرۋدىڭ وزەكتىلىگىن اتاپ ءوتتى.

– تۇركىستاندى زاماناۋي تەحنولوگيالاردى قولدانا وتىرىپ، ءوز مادەنيەتىمىزگە ساي قايتا جاڭعىرتۋ كەرەك. بۇل ورايدا ونىڭ ەجەلگى ساۋلەت ونەرىن ساقتاپ قالۋ قاجەت. ۇكىمەتكە، وبلىس اكىمدىگىنە حالىق سانىنىڭ ءوسۋ قارقىنىن ەسەپكە الا وتىرىپ، قالانىڭ باس جوسپارىن دايىنداۋدى تاپسىرامىن، – دەدى مەملەكەت باسشىسى.

سوڭىندا قازاقستان پرەزيدەنتى تۇركىستاندى دامىتۋدىڭ باس جوسپارىنىڭ تۇجىرىمداماسىن بەكىتۋ، سونداي-اق «TURKISTAN» ارنايى ەكونوميكالىق ايماعىن قۇرۋ تۋرالى جارلىقتارعا جاريا تۇردە قول قويدى.

Abai.kz