قازاقستان اۋىلشارۋاشىلىعى مينيسترلىگى ءباسپاسوز قىزمەتىنىڭ حابارلاۋىنشا، بۇل تۋرالى كونۆەنتسيا بيۋروسىنا قوسىلعان ەلدەردىڭ سەگىزىنشى سەسسياسى كەزىندە بەلگىلى بولدى.
"كونۆەنتسيا بيۋروسىنىڭ سەگىزىنشى سەسسياسىندا بيۋروعا 2019-2021 جىلدارى توراعالىق ەتۋ قازاقستان جاعىنا وتەدى. بۇل قازاقستاننىڭ حالىقارالىق قۇقىقتان اينىمايتىن ەل رەتىندەگى بەدەلىنىڭ بۇدان ارى نىعايۋىنا سەپتەسىپ، ترانسشەكارالىق وزەندەردى پايدالانۋ مەن قورعاۋ سالاسىنداعى جوبالاردى دايىنداپ، ىسكە اسىرۋدا ىنتىماقتاستىقتى دامىتادى" دەپ حابارلادى مينيسترلىكتىڭ ءباسپاسوز قىزمەتى.
600-دەن استام ساراپشى، بۇۇ-عا مۇشە 90 ەلدىڭ مينيسترلەرى، حالىقارالىق جانە ۇكىمەتتىك ەمەس ۇيىمداردىڭ وكىلدەرى ءۇش كۇن بويى كليماتتىڭ وزگەرۋىنە بەيىمدەلۋ، سۋ رەسۋرستارى، ازىق-تۇلىك، قۋات كوزدەرى مەن ەكوجۇيە اراسىنداعى بايلانىس، ترانسشەكارالىق سۋ رەسۋرستارىنداعى ىنتىماقتاستىق جانە قارجىلاندىرۋ ماسەلەلەرىن تالقىلايدى.
ترانسشەكارالىق سۋ رەسۋرستارى جونىندەگى كونۆەنتسيا ترانسشەكارالىق سۋلاردى ءتيىمدى پايدالانۋ جانە قورعاۋدا ىنتىماقتاستىق ورناتۋدىڭ قۇقىقتىق بازاسىن تۇزەتىن حالىقارالىق قۇجات سانالادى.
Abai.kz
