جەكسەنبى, 2 قازان 2022
ءسۇيىنشى! 3370 10 پىكىر 16 قازان, 2018 ساعات 20:57

ءسۇيىنشى، الاش! سانكت-پەتەربوردا اليحانعا ەسكەرتكىش تاقتا قويىلادى!

ءسۇيىنشى، الاش ۇرپاقتارى، ءسۇيىنشى! وسىدان تۋرا جارتى ساعات بۇرىن عانا سانكت-پەتەربوردان قۋانىشتى جاڭالىق كەلىپ جەتتى. التى الاش كوسەمى ءاليحان بوكەيحاننىڭ 1890-1894 جىلدارى وقىپ بىتىرگەن بۇرىنعى يمپەراتورلىق ورمان ينستيتۋتى، قازىرگى سانكت-پەتەربور مەملەكەتتىك ورمان-تەحنيكالىق ۋنيۆەرسيتەتىنىڭ عىلىمي كەڭەسى باس عيماراتىنىڭ ماڭدايىنا ءوزىنىڭ داڭقتى تۇلەگى، 2015 جىلى يۋنەسكو باس كونفەرەنتسياسىنىنىڭ 38-سەسسياسى «بۇكىل الەمدىك شىنايى داڭقتى قايراتكەر» دەپ تانىعان ءاليحان بوكەيحان تۋرالى ەستەلىك تاقتا ورناتۋ تۋرالى ۇسىنىستى 27 داۋىسپەن قولداپ، 7 داۋىس قارسى، 5 داۋىس قالىس قالىپ، باسىم كوپشىلىك داۋىسپەن ماقۇلدادى.

ەسكەرتكىش تاقتا ورناتۋدى قر اۋىل شارۋاشىلىق مينيسترلىگىنىڭ قىزمەتكەرى، وسى جوو-نىڭ تاعى ءبىر قازاق تۇلەگى مايكەن ازەنوۆ ۇسىنىپ، عىلىمي كەڭەستىڭ قاراۋىنا ءاليحان بوكەيحان تۋرالى بارلىق تاريحي انىقتاما-مالىمەتتى وسى جولداردىڭ اۆتورى جازىپ بەرىپ، ۇسىنىستى «اق جول» دەمپارتياسىنىڭ ازات پەرۋاشەۆ باستاعان پارلامەنتتىك فراكتسياسى ورمان-تەحنيكالىق ۋنيۆەرسيتەتىنىڭ رەكتورىنا ارنايى حات جولدادى.

ناتيجەسىندە وسىنداي قۋانىشتى شەشىم قابىلداندى. ەسكەرتكىش تاقتانى جاساتىپ، ورناتۋدى «اق جول» پارتياسى ءوز جاۋاپكەرشىلىگىنە الىپ وتىر.
ودان بولەك ۇلت كوسەمىنىڭ قيان-كەسكى كۇرەسكە تولى عۇمىرىنىڭ اقىرعى 15 جىلىن (1922-1937 جج.) وتكىزگەن ماسكەۋدەگى ب. كيسلوۆسكي ورامى، 4 ءۇيى مەن سامارا قالاسىنداعى 1909-1917 جىلدارى تۇرعان كازانسكايا كوشەسى، 30 (قازىر 32 ءۇي) ۇيىنە دە ەستەلىك تاقتا ورناتۋ ءىسى قولعا الىندى.

«اق جول» پارتياسىنىڭ ماجىلىستەگى فراكتسياسىنان ماسكەۋدەگى ەلشىلىككە تيەسىلى حات جولداندى. ەندى ماسكەۋدەن حابار كۇتىپ وتىرمىز.

قۇتتى بولسىن! الاش قايراتكەرلەرىنىڭ ارۋاقتارى جار بولسىن، الاش ۇرپاقتارى!

Cۇلتان حان اقۇلى

Abai.kz

10 پىكىر