«قازمەديا ورتالىعىندا» اۋىل شارۋاشىلىعى مينيسترلىگىنىڭ باستاماسىمەن اگروونەركاسىپ كەشەنى فورۋمىنىڭ العاشقى كۇنى ءوتتى، دەپ حابارلايدى قازاقپارات.

فورۋم اياسىندا اۋىلداعى ۇكىمەتتىك ەمەس ۇيىمداردى (ۇەۇ) دامىتۋ ماسەلەلەرى بويىنشا «ازاماتتىق قوعام جانە مەملەكەت: سەرىكتەستىك، ديالوگ جانە جاۋاپكەرشىلىك» اتتى رەسپۋبليكالىق كونفەرەنتسيا ۇيىمداستىرىلدى.

سونداي-اق شارا اياسىندا اۋىلدىق ۇەۇ كواليتسيانىڭ قۇرىلتاي كونفەرەنتسياسى مەن تۇقىم ءوسىرۋ شارۋاشىلىعىن دامىتۋ بويىنشا ديالوگ الاڭى وتكىزىلدى.

اتالعاندارمەن قوسا اگروونەركاسىپ كەشەنىنىڭ سالالىق، ايماقتىق جانە ينفراقۇرىلىمدىق باعدارلامالارى، اگرارلىق عىلىم مەن بيزنەستى بىرىكتىرۋ بويىنشا بىرقاتار سەسسيالار ۇيىمداستىرىلدى.

جەردى ءتيىمدى پايدالانۋ بويىنشا سەسسيادا مودەراتور رەتىندە م.تايجان ءسوز سويلەدى.

قوعام بەلسەندىلەرىنىڭ باستاماشىل توبىنىڭ اتىنان ءسوز سويلەگەن ول تەك قازاقستان تۇرعىندارى ءۇشىن جەكەمەنشىك مۇلىك ينستيتۋتىنىڭ ورنىنا جالعا الۋ ينستيتۋتىن ەنگىزۋدى، بىرىڭعاي اگرارلىق سالىقتى ورناتىپ، جەردى جەرسەرىك ارقىلى باقىلاۋدى زاڭداستىرۋدى ۇسىندى. جينالعاندار ونى تولىق قولدادى.

شارانى قورىتىندىلاي كەلە، قر اۋىل شارۋاشىلىعى ۆيتسە-ءمينيسترى ب.بيسەنعاليەۆ قر جەر كودەكسىنە ەنگىزىلىپ وتىرعان تۇزەتۋلەر قوعام بەلسەندىلەرىنىڭ قاتىسۋىمەن جانە جازىلعان شارالاردى كەزەڭ-كەزەڭمەن ىسكە اسىرۋ ارقىلى وتەتىنىن ايتتى.

Abai.kz