سəكەنگە ادامزاتتىق سانا دەڭگەيىنەن قاراۋ كەرەك
الاشوردا زامانى مەن سəكەن عۇمىر كەشكەن ءدəۋىردى ءəدىل بەزبەندەۋگە ءبىزدىڭ قازاقتىڭ ساناسى ءəلى جەتكەن جوق. وعان ءəدىل كوزقاراس، تەرەڭ تالداۋلى عىلىم، اۋقىمدى تاريحي-قوعامدىق ءبىلىم، سəۋلەلى، جارقىن، ازات سانا، ەڭ باستىسى مول پاراسات كەرەك.
ءبىزدىڭ عىلىمدا وسى بەسەۋى دە جوق. بۇل جاعىنان ءبىز ءəلى دامۋدىڭ تومەنگى ساتىسىندامىز. قاراپايىم تىلمەن ايتساق، ءبىر عالىمىمىز فيلولوگ - ول فيلولوگتىڭ كوزىمەن قارايدى، ءبىر عالىمىمىز تاريحشى - تاريحشىنىڭ كوزىمەن قارايدى. ءبىر عالىمىز نۇروتاننىڭ كوزىمەن، ەندى ءبىر عالىمىمىز رۋشىل - رۋشىلدىقتىڭ كوزىمەن قارايدى، سəكەنگە. وسىنداي كوزقاراسپەن كىمدى وڭدىرامىز؟
سəكەن ءتىپتى ۇلتتىق سانامەن دە قاراۋعا كەلمەيتىن تۇلعا. سəكەنگە وركەنيەتتى ەلدىڭ عالىمدارى قۇساپ، ادامزاتتىق سانا دەڭگەيىنەن قاراۋ كەرەك. ال قازىرگى مىنا ۇرى-قارى جايلاعان قاسقىر زاماندا قازاقتا ادامزاتتىق ساناعا كوتەرىلمەك تۇگىلى ۇلتتىق ساناعا جەتكەن تۇلعالار قاداۋ-قاداۋ عانا. تىم بولماسا، سəكەننىڭ ءəنىن ۇعىپ، اياۋلى اقىننىڭ جان تەرەڭىنە بويلاي الاتىن ادام بار مە ەكەن ارامىزدا؟! كۇمəنىم بار.
سəكەن - باقاي ەسەپ بلوگەرلەر مەن جارياشىل جۋرناليستەردىڭ، رۋشىل زەرتتەۋشىلەردىڭ، تار ايالى عالىمداردىڭ قۇشاعىنا ەش سىيمايدى. كەشە سəكەندى بوتا تىرسەك بوزبالار داتتاپ جاتىر وسىندا. ۋاي، سولار ومىرىندە ۆىترەزۆيتەلگە ءتۇسىپ كورگەن جوق قوي، انەنكوۆتىڭ "ازاپ ۆاگونى" تۇگىلى. ال ەندى سول "ۇيكۇشىك باتىرلاردىڭ" نكۆد جەندەتتەرى تۇرمەگە اپارىپ سəكەننىڭ مۇرتىن جۇلعىزاتىن پيونەرلەردەن قاي جەرى ارتىق. ايتشى ءوزىڭ؟!
وكىنىشكە قاراي، ءبىز ءəلى كۇنگە دەيىن ۇلتتىق قۇندىلىقتاردان ادا، ەشتەڭەنىڭ پارقىن بويلاپ بىلە المايتىن، كورىپ تاني المايتىن، ءəرتۇرلى "يزمدەرمەن" ساناسى سانسىراعان، əسىرەدىنشىلدىكپەن ۋلانعان قاراڭعى مەشەۋ قوعامدا ءومىر ءسۇرىپ وتىرمىز. بۇل قاراتۇنەكتەن امان شىقسىن دەيىك، حالىق...
مىنا وتپەلى كەزەڭ ءوتسىن، ءبىر زامان كەلەدى، سول كەزدە بəرىنە ءəدىل باعا بەرىلمەك...
ەرلان تولەۋتايدىڭ facebook پاراقشاسىنان
Abai.kz
