مينسكىدە رەسمي ساپاردا جۇرگەن قازاقستان پارلامەنتى سەناتىنىڭ توراعاسى قاسىم-جومارت توقاەۆ بەلارۋستىڭ ۇلتتىق جينالىسى رەسپۋبليكا كەڭەسىنىڭ توراعاسى ميحايل مياسنيكوۆيچپەن كەلىسسوز جۇرگىزدى. بۇل تۋرالى سەناتتىڭ ءباسپاسوز قىزمەتى حابارلادى.

جۇزدەسۋشىلەر ەكى مەملەكەتتىڭ زاڭ شىعارۋ ورگاندارى ىنتىماقتاستىعىنىڭ جاي-كۇيى مەن كەلەشەگىن تالقىلادى.

ق.توقاەۆ قازاقستان پرەزيدەنتى ن.نازارباەۆتىڭ تاياۋداعى جولداۋىنىڭ نەگىزگى باعىتتارىن، ونداعى ءبىزدىڭ ازاماتتارىمىزدىڭ ءال-اۋقاتىن ارتتىرۋ مەن ەكونوميكانىڭ ورنىقتى ءوسۋىن قامتاماسىز ەتۋ جونىندەگى ءبىرىنشى كەزەكتەگى مىندەتتەردى شەشۋ ماقساتتارى كوزدەلگەنى تۋرالى بەلارۋس تاراپىن حاباردار ەتتى.

تمد، ۇقشۇ جانە ەقىۇ-نىڭ پارلامەنتارالىق بىرلەستىكتەرىن پارلامەنتتىك ديپلوماتياداعى نەگىزگى باعىتتار رەتىندە اتاعان ق.توقاەۆ ءبىزدىڭ ەلدەرىمىز وسى حالىقارالىق ۇيىمداردىڭ اياسىندا كۇش-جىگەردى ۇيلەستىرىپ ءارى ءبىر-بىرىنە ءوزارا قولداۋ كورسەتىپ وتىرعانىن اتاپ ءوتتى.

قازاقستان دەلەگاتسياسى باسشىسىنىڭ پىكىرىنشە، ءبىزدىڭ مەملەكەتتەرىمىزدىڭ كوپتاراپتى بايلانىستارىنا پارلامەنتشىلەر قوسىمشا سەرپىن بەرە الادى.

كەلىسسوز بارىسىندا ەكى مەملەكەتتىڭ ينۆەستيتسيالىق جانە عىلىمي-تەحنيكالىق ىنتىماقتاستىعىن دامىتۋعا باسا نازار اۋدارىلدى.

م.مياسنيكوۆيچ ەكىجاقتى تاۋار اينالىمىن 1 ميلليارد دوللارعا دەيىن جەتكىزۋ جانە ەكى ەلدىڭ ەكونوميكالىق، ساۋدا جانە عىلىمي-تەحنيكالىق ىنتىماقتاستىعىن بەلسەندى جۇرگىزۋ، ستۋدەنتتەر الماسۋىن دامىتۋ، تۋريستىك ساياحاتتاردى دامىتۋ قاجەتتىگى تۋرالى ايتتى. رەسپۋبليكا كەڭەسىنىڭ توراعاسى قازىرگى كەزدە قازاقستان بەلسەندى تۇردە قاتىسىپ جاتقان قىتايلىق «ءبىر بەلدەۋ، ءبىر جول» ستراتەگياسىن ىسكە اسىرۋ اياسىندا بەلارۋستىڭ كولىك-لوگيستيكالىق الەۋەتىن پايدالانۋ ماڭىزدى ەكەنىن اتاپ ءوتتى. اتاپ ايتقاندا، بەلارۋس ارقىلى وتەتىن جانە قىتايدى ەۋروپا وداعى ەلدەرىمەن بايلانىستىراتىن ترانسقۇرىلىقتىق باعداردىڭ جاڭا سولتۇستىك تارماعىن دامىتۋعا مينسك مۇددەلى بولىپ وتىر.

ق.توقاەۆ اتاپ وتكەندەي، «ءبىر بەلدەۋ، ءبىر جول» ستراتەگياسى قازاقستانسىز جۇزەگە اسپايدى. قحر توراعاسى سي تسزينپين جاھاندىق گەوساياساتتى وزگەرتە الاتىن ءوز ستراتەگياسىن العاش رەت استانادا جاريا ەتكەن بولاتىن. 2020 جىلعا دەيىن قازاقستان جىلىنا ترانزيتتەن تۇسەتىن كىرىستى 5 ميلليارد دوللارعا دەيىن جەتكىزۋ تۋرالى ماقسات قويۋى دا ءبىزدىڭ ەلىمىزدىڭ ماڭىزدى ءرولىن كورسەتىپ وتىر.

سەنات توراعاسى بەلارۋستىق ارىپتەسىن قازاقستانعا رەسمي ساپارمەن كەلۋگە شاقىردى.

قازاقستان پارلامەنتتىك دەلەگاتسياسىنىڭ باسشىسى بەلارۋس ۇلتتىق جينالىسى وكىلدەر پالاتاسىنىڭ توراعاسى ۆلاديمير اندرەيچەنكومەن دە كەزدەستى. كەزدەسۋگە قاتىسۋشىلار قازاقستان مەن بەلارۋس قاتىناستارىنىڭ دامۋ قارقىنىن، پارلامەنتارالىق ۇنقاتىسۋ ونىڭ ماڭىزدى بولىگى ەكەنىن اتاپ ءوتتى. ق. توقاەۆ قازاقستان ساياسي جۇيەسىندەگى سەناتتىڭ ورنى تۋرالى حاباردار ەتىپ، مەملەكەت باسشىسى ن.نازارباەۆتىڭ باستاماسىمەن جۇزەگە اسقان ساياسي جانە الەۋمەتتىك-ەكونوميكالىق رەفورمالاردى پالاتا دەپۋتاتتارىنىڭ زاڭنامالىق تۇرعىدا قولداۋى ماڭىزدى ەكەنىن ايتتى.

سەنات توراعاسى جەڭىس ەسكەرتكىشىندەگى ماڭگىلىك الاۋعا گۇل قويدى جانە بەلارۋس مەملەكەتتىك ۇلى وتان سوعىسىنىڭ تاريحى مۇراجايىندا بولدى.

Abai.kz