بۇگىن سولتۇستىك قازاقستان وبلىسىنىڭ ورتالىعى قىزىلجار قالاسىندا قر مادەنيەت جانە سپورت مينيسترلىگى، تۋريزم جانە يندۋستريا كوميتەتى باس بولىپ ۇيىمداستىرعان «قازاقستان مەن رەسەي ءتۋريزمىن دامىتۋدىڭ جاڭا جولدارى مەن ۇردىستەرى» اتتى حالىقارالىق فورۋمنىڭ رەسمي اشىلۋى بولدى.

فورۋمنىڭ رەسمي اشىلۋىنا قر مادەنيەت جانە سپورت ءمينيسترى ارىستانبەك مۇحامەديۇلى، رف روستۋريزم اگەنتتىگىنىڭ توراعاسى ولەگ سافونوۆ پەن سقو اكىمى قۇمار اقساقالوۆ قاتىسىپ، قۇتتىقتاۋ ءسوز سويلەدى. قىزىل لەنتانى قيدى. قازاقستان مەن رەسەيدىڭ تۋريستىك الەۋەتىن تانىتاتىن حالىقارالىق كورمەنى ارالاپ كوردى.

اتالعان كورمەگە قازاقستاننىڭ 14 وبلىسى مەن الماتى جانە استانا قالالارى قاتىسسا، رەسەيدىڭ 12 ولكەسى كەلگەن. ولار:

قازاقستان رەسپۋبليكاسىنان: اقمولا، اقتوبە، الماتى، اتىراۋ، شىعىس قازاقستان، جامبىل، باتىس قازاقستان، سولتۇستىك قازاقستان، قاراعاندى، قوستاناي، قىزىلوردا، ماڭعىستاۋ، پاۆلودار، تۇركىستان وبلىستارى مەن الماتى، استانا قالالارى، شارىن مەملەكەتتىك ۇلتتىق تابيعي پاركى، «Chimbulak Development» شاڭعى كۋرورتى، «Kazakh Invest»، «Kazakh Tourism»، «تريۋمف Sat group travel» كومپانيالارى،  «Oi-Qaragai lesnaya skazka» تاۋ شيپاجايى، «Qazaqgeography» قوعامدىق بىرلەستىگى، «است كازاحستان» تۋروپەراتورى، «كوچەۆنيك» ۇلتتىق تۋريستىك كومپانياسى مەن  قر دەنساۋلىق ساقتاۋ مينيسترلىگى ءوز پاۆيلوندارىن اشقان.

ايتا كەتەيىك، كورمەگە قازاقستانداعى مەديتسينالىق ءتۋريزمدى دامىتۋدىڭ كىلتى بولىپ تابىلاتىن 12 جەتەكشى مەديتسينالىق جانە ساناتورلىق-كۋرورتتىق ۇيىم قاتىسۋدا.

رەسەي فەدەراتسياسىنان: التاي ولكەسى، كراسنودار ولكەسىنىڭ كۋرورتتارى، ومبى، ورىنبور، ساراتوۆ، تۇمەن وبلىستارى، التاي، قىرىم، تاتارستان رەسپۋبليكالارى، پەتەربور قالاسى مەن يامالو-نەنەتسكي اۆتونوميالىق وكرۋگى ءوز پاۆيلونارىن ورنالاستىرعان.

ءتۋريزمدى دامىتۋ ماسەلەلەرى مەملەكەتارالىق دەڭگەيدە تۇڭعىش رەت تالقىلانىپ وتىر

ارىستانبەك مۇحامەديۇلى، قر مادەنيەت جانە سپورت ءمينيسترى:

-شىن مانىندە اتالعان فورۋم ەكى ەل ءۇشىن دە ۇلكەن ماڭىزعا يە. بۇل تەك قازاقستان مەن رەسەي اراسىندا تۋريزم سالاسىن دامىتۋ ءۇشىن ۇيىمداستىرىلىپ وتىرعان فورۋم ەمەس، بۇل قازىرگى كۇنگە دەيىن قالىپتاسقان مەملەكەتارالىق ىنتىماقتاستىقتىڭ قانداي دەڭگەيگە كوتەرىلگەنىنىڭ كورىنىسى. ءبىز كورشىلەس ورنالاسقان مەملەكەتپىز. قازاقستان مەن رەسەيدىڭ اراسىنداعى شەكارا الەمدەگى ەڭ ۇزىن قۇرلىقتىق شەكارا ەكەنى بەلگىلى. 7 مىڭ شاقىرىمنان اسادى. وسى ۋاقىت ىشىندە ەكى ەل اراسىنداعى گەوساياسي احۋال ەڭ جوعارعى دەڭگەيگە جەتىپ وتىر.

وسى جولعى فورۋم تۋريزم تاقىرىبىنا ارنالىپ وتىر. ەكى كۇن بويى مەملەكەتارالىق ىنتىماقتاستىق پەن ەكى ەل اراسىنداعى ءتۋريزمدى دامىتۋدىڭ ماسەلەلەرى ءسوز بولادى. قازاقستان مەن رەسەي بىرلەسىپ ۇيىمداستىرىلىپ وتىرعان مۇنداي جيىندار از ەمەس. دەگەنمەن تۋريزم سالاسىن دامىتۋعا ارنالعان فورۋم تۇڭعىش رەت بىزدە، وسى پەتروپاۆلدە وتكىزىلىپ وتىر. بيىلعى وڭىرارالىق فورۋمدى ءدال وسى سولتۇستىك قازاقستاندا، پەتروپاۆلدە وتكىزۋدى بىلتىر ەلباسى نۇرسۇلتان نازارباەۆ ۇسىنعان بولاتىن.

ال ءبىز شەتەلدىك تۋريستەرگە، سونىڭ ىشىندە رەسەيدەن كەلەتىن تۋريستەرگە نە ۇسىنامىز دەگەنگە كەلسەك، بۇگىنگى كورمەگە رەسپۋبليكانىڭ بارلىق ايماقتارىنان دەلەگاتتار كەلىپ، ءوز پاۆيلوندارىن ورناتتى. ءوز وڭىرلەرىندەگى تاريحي، مادەني ەرەكشەلىكتەرىن تانىستىرىپ جاتىر.

ونىڭ ۇستىنە، بىزدە بيىل كوشپەلى تۋريزم 33 پايىزدى قۇراسا، رەسەيدە بۇل كورسەتكىش 25 پايىز مولشەرىندە بولىپ وتىر.

بىزدە ءتۋريزمدى دامىتۋعا مۇمكىندىك وتە جوعارى. ءتىپتى، ءبىز جىلدىڭ ءتورت مەزگىلىندە دە تۋريستەر قابىلداۋعا قاۋقارلىمىز. تابيعي ەرەكشەلىكتەرىمىز دە، تاريحي، مادەني ورىندارىمىز دا جەتكىلىكتى. ءبىز ءالى دە وسى باعىتتا جۇمىستار اتقارۋىمىز كەرەك.

ونىڭ ۇستىنە، مەملەكەتارالىق دەڭگەيدە ءتۋريزمدى دامىتۋ ماسەلەلەرى تۇڭعىش رەت تالقىلانىپ وتىر. ال ءبىزدىڭ ەلدەر تۋريزم ءۇشىن قاۋىپسىز ەلدەر قاتارىنا جاتادى.

3,5 ميلليون قازاقستاندىق رەسەيگە تۋريستىك ماقساتتا بارادى

ولەگ سافونوۆ، رف ءتۋريزمدى دامىتۋ جونىندەگى فەدەرالدىق اگەنتتىك توراعاسى:

-جالپى مەن قازاقستانعا بوتەن ەمەسپىن. بۇرىنعى تسەلينوگراد قالاسىندا تۋعانمىن. سوندىقتان، قازاقستاندى ءوزىمنىڭ تۋعان وتانىم دەپ ەسەپتەيمىن. باسقاسىن ايتپاسام دا، ءوزىم تۋعان ءوڭىردىڭ تاريحي ورىندارىن بىلەمىن دەپ ايتا الامىن.

ءبىز قازاقستان مەن رەسەي اراسىندا ءتۋريزمدى دامىتۋ ماسەلەسىن سول ءۇشىن دە تالقىعا سالىپ، وسىنداي فورۋم وتكىزىپ وتىرمىز. قازاقستاندىقتار رەسەيگە، بىزدىكىلەر سىزدەرگە كەلىپ، تاريحي ورىنداردى ارالاپ، مادەني مۇرالارمەن تانىسۋى كەرەك.

بۇل فورۋمنىڭ ەرەكشەلىگى ءبىز وسى ەكى كۇن بويى تەك تۋريزم تۋرالى ايتامىز. ءار قالا، ءار ءوڭىر ءوز مۇمكىندىكتەرىن كورسەتەدى. وسى سالاداعى تۇيتكىلدى ماسەلەلەر ايتىلادى.

قازاقستان مەن رەسەيدىڭ قازىرگى مەملەكەتارالىق بايلانىسى ستراتەگيالىق سيپاتقا يە. ىنتىماقتاستىقتى دامىتۋ ءتۇرلى باعىتتار بويىنشا ىسكە اسىرىلىپ جاتىر. سونىڭ ىشىندە، ەرەكشە ماڭىزعا يە وسى تۋريزم سالاسى بولماق.

مەن ءبىر مىسال ايتايىن، ءتۋريزمدى دامىتۋدىڭ سينەتگەتيكالىق ىقپالى دا جوعارى. جىل سايىن 3,5 ميلليون قازاقستاندىق رەسەيگە تۋريستىك ماقساتتا بارادى. ال رەسەيدەن قازاقستانعا قىدىرىپ كەلەتىندەر 3 ميلليونان اسادى. مەنىڭشە ءبىز بۇل تسيفرلاردى ودان ارى كوتەرۋىمىز كەرەك. راس، بىزدە ءتۋريزمدى دامىتۋعا ۇلكەن مۇمكىندىكتەر بار. دەگەنمەن، ءبىز سول مۇمكىندىكتەردى تولىق ىسكە اسىردىق دەپ ويلامايمىن. بۇگىنگى كورمەنىڭ ءوزى ەكى ەلدىڭ ءتۋريزمدى دامىتۋداعى پوتەنتسيالىن انىق كورسەتىپ وتىر. مينيستر مىرزا ايتپاقشى، قازاقستان مەن رەسەي اراسىنداعى قۇرلىقتىق شەكارا سىزىعى الەمدەگى ەڭ ۇزىن شەكارا دەپ تانىلعان. رەسەي جاقتان 11 ءوڭىر، قازاقستان جاقتان 7 ءوڭىر وسى شەكارالىق ايماقتا ورنالاسقان. دەمەك، ەكى ارادا قارىم-قاتىناس تا ايتارلىقتاي جوعارى ەڭگەيدە. ءبىز وسىنى ءتيىمدى پايدالانۋىمىز كەرەك.

2 جىلدا رەسەيدەن قازاقستانعا كەلۋشىلەردىڭ سانى ەكى ەسەگە ارتتى

قۇمار اقساقالوۆ، سقو اكىمى:

-قازاقستان مەن رەسەي اراسىنداعى وڭىرارالىق ىنتىماقتاستىق فورۋمىنىڭ ءدال ءبىزدىڭ وڭىرىمىزدە ءوتىپ جاتقانى ءبىز ءۇشىن مارتەبە. اتالعان فورۋمنىڭ تاقىرىبىنىڭ ءوزى «ءتۋريزمدى دامىتۋدىڭ جاڭا جولدارى» دەپ اتالادى. بۇل فورۋم ارقىلى ءبىز دە وڭىرىمىزدەگى تاريحي ورىنداردا ءتۋريزمدى دامىتۋ ءۇشىن ءوز مۇمكىندىكتەرىمىزدى كورسەتۋگە مۇمكىندىك الىپ وتىرمىز.

ءار ءوڭىردىڭ ءوزىنىڭ تاريحي ماقتانىشى بار. ءبىزدىڭ ماقتانىپ ايتار جەرىمىز – يمانتاۋ-شالقار كۋرورتتىق ايماعى.  ءبىز قازىر وسى ايماققا تۋريستەر تارتۋ ماقساتىندا بىرقاتار جۇمىستار اتقارۋدامىز.سونىڭ ىشىندە، رەسەيدەن دە تۋريستەر تارتۋىمىز كەرەك دەپ ەسەپتەيمىن.

بۇدان بولەك، بىزدە جوعارى ەمدىك قاسيەتكە يە ەكى كول بار. ونىڭ مينەرالدىق قۇرامى تەڭىز سۋىنا ءتان.

تابيعاتى ەرەكشە جەرلەر از ەمەس. ءبىز رەسەيمەن شەكتەسىپ جاتقان ءوڭىرمىز. ءوڭىردىڭ ءتۋريزمدى قولعا الۋ پوتەنيالى جوعارى. تەك، ونى دامىتۋ ءۇشىن ينفراقۇرىلىمدى رەتتەۋ كەرەك. ءبىزدى ءىرى قالالارمەن بايلانىستىراتىن جولداردى جاڭارتۋىمىز كەرەك.

مىسالى، ءبىز رەسەيدىڭ، تۇمەن، ومبى، قورعان وبلىستارىمەن بايلانىساتىن جولداردا رەتتەۋدى قولعا الدىق.

سونىڭ ناتيجەسىندە، سوڭعى 2 جىلدا رەسەيدەن قازاقستانعا قىدىرىپ كەلۋشىلەردىڭ سانى ەكى ەسەگە ارتتى. ارينە، ماسەلەلەر جوق ەمەس. اسىرەسە، تۋريستەر كوپ كەلەتىن جازعى ماۋسىمداردا شەكارالىق راسىمدەۋ ماسەلەسىندە كوپتەگەن  كەدەرگىلەر پايدا بولادى. ونى دا رەتكە كەلتىرۋ كەرەك.

بۇگىنگى، ەرتەڭگى جيىنداردا اتالعان ماسەلەلەر تۇگەل قامتىلادى دەپ ەسەپتەيمىن.

ال ەندى فورۋمعا دايىندىق ماسەلەسىنە كەلسەك، جوسپار بويىنشا مىندەتتەلگەن جۇمىستار تولىق اقارىلدى. جاڭاعى ءوزىڭىز ايتىپ وتىرعان وقۋشىلار سارايى ەلباسىنىڭ ارنايى تاپسىرماسىمەن سالىندى. ول عيمارات تولىقتاي IT تەحنولوگيالارمەن جابدىقتالعان. وقۋشىلار سارايى ءۇش ءتۇرلى كونتەنتكە، كىشكەنە بالالارعا، ورتا جانە جوعارعى سىنىپ وقۋشىلارىنا ارنالعان.

ايتا كەتەيىك، اتالعان كورمە قازاقستان-رەسەي وڭىرارالىق ىنتىماقتاستىعىنىڭ  XV-فورۋمىنىڭ اياسىندا وتكىزىلىپ وتىر.

وڭىرالالىق فورۋمنىڭ اياسىندا 9-قاراشا كۇنى پلەنارلىق وتىرىس وتەدى. وعان قازاقستان پرەزيدەنتى نۇرسۇلتان نازارباەۆ پەن رەسەي پرەزيدەنتى ۆلاديمير پۋتين كەلىپ قاتىسادى.

ايتپاقشى، نۇرسۇلتان نازارباەۆ پەن ۆلاديمير پۋتين قىزىلجاردا جاڭا سالىنعان وقۋشىلار سارايىندا كەزدەسەدى. ونىڭ قۇرىلىسىنا 3,6 ميلليارد تەڭگە جۇمسالعان. ال ءىت جابدىقتارعا بيۋدجەتتىڭ 2 ميلليارد تەڭگەسى بولىنگەن.

ەستەرىڭىزگە سالا كەتەيىك، وسىعان دەيىنگى قازاقستان-رەسەي اراسىنداعى وڭىرارالىق ىنتىماقتاستىق فورۋمى رەسەيدىڭ چەليابى قالاسىندا وتكەن. ال كەلەر جيىن رەسەيدىڭ استراحان قالاسىندا وتكىزىلەدى دەپ جوسپارلانعان.

نۇرگەلدى ابدىعانيۇلى

قىزىلجار

Abai.kz