باسقا مەملەكەتتىڭ باسشىلارى ءبىر-بىرىنە قارۋ، قانجار سىيلاپ جاتادى. قازاقتىڭ قارۋى – قامشى. اۋىلدا ءالى كۇنگە دەيىن قامشىسىز جۇرمەيدى.

قىستى كۇنى قۇتىرعان بۋرا شاۋىپ، قاسقىرعا كەزدەسىپ قالعاندا – قامشىمەن جاسقاپ، قامشىمەن-اق قاسقىر سوعىپ العان قارۋلى جىگىتتەر بولعان. وندايدى تالاي رەت كوردىك تە، ەستىپ تە وستىك.

ەلباسىنىڭ پۋتينگە قامشى سىيلاعانىنان ەشقانداي ەرسىلىك كورىپ تۇرعان جوقپىن. قازاقتا قامشىعا بايلانىستى ايتىلاتىن اڭگىمە كوپ. سوعىسقا كەتىپ بارا جاتقاندا قاتىنى ارتىنان ءىلەسىپ جۇگىرسە، كۇيەۋى ونى قامشىمەن ءبىر تارتادى ەكەن دە، كەتە بەرەدى ەكەن. ەگەر كۇيەۋى سودان قايتىپ ورالماسا، «ولەرىن ءبىلىپ، كەۋىلىڭ سۋىسىن دەگەن ەكەنسىڭ عوي»، - دەپ، جوقتاۋ ايتىپتى جەسىر قالعان كەلىنشەگى.

تاريح دەگەن قىزىق نارسە. قىرىمنىڭ حانى داۋلەتكەرەي ورىس پاتشاسىن جازالاۋ ءۇشىن ماسكەۋگە جورىققا اتتانىپ، ماسكەۋدى ورتەپ جىبەرەدى دە، يۆان پاتشا ارەڭ دەگەندە قاشىپ قۇتىلادى. تۇرىستىق بەرە الماي، مايدان دالاسىنان قاتىن قۇساپ قاشىپ كەتكەن يۆانعا داۋلەتكەرەي سوندا بىلاي دەپ حات جازىپ جىبەرىپتى: «يا سۆوي پلەتكا نا تۆوي ماسكۆا ۆەشال!» - «مەن سەنىڭ ماسكەۋىڭە قامشىمدى ءىلىپ كەتتىم!»...

قازىرگى تىلمەن ايتقاندا، مەن ساعان بىردەمە قويدىم دەگەن ءسوز.... پرەزيدەنتىمىز باسقا نارسە سىيلاسا دا بولاتىن ەدى. بىراق ول - قازاقتىڭ پرەزيدەنتى. بۇل ءسوزدى، «ناگايكا» (قامشى) دەگەننىڭ نە ەكەنىن بىلمەيتىن ورىس جوق.

مۇنى تۇسىنە قويعان ۋكراينالىقتار (ورىستاردىڭ ءوزى دە) ەلباسىنىڭ قولىنان قامشى العان ءپۋتيندى كۇلكىگە اينالدىرىپ جاتىر. «نازارباەۆ پۋتينگە قامشى سىيلاپ: -تارتىپكە سالۋعا كومەكتەسەدى!،- دەپ ەدى، - جاقسى نارسە ەكەن!،-دەپ، پۋتين وعان قاتتى قۋانىپ كەتتى» دەپ جازىپتى، گولوبۋتسكي دەيتىن ۋكراينالىق ساياساتتانۋشى.

قامشى ۇستاپ تۇسكەن سۋرەتىندە ءپۋتيننىڭ بويى ءبىزدىڭ پرەزيدەنتتەن بيىكتەۋ بولىپ كورىنىپ قالعان. بويىنىڭ الاسالىعىنا پۋتين قاتتى ۇيالادى. سوندىقتان فوتوگرافتارى پرەزيدەنتىن ۇنەمى وزگەلەردەن بويشاڭداۋ ەتىپ كورسەتۋگە تىرىسىپ، ادەيى ونى وسىنداي ىڭعايلى راكۋرستا سۋرەتكە ءتۇسىرىپ الۋعا تىرىسادى. كەيدە وسى قورتىقتىعىن بىلدىرمەس ءۇشىن وكشەسى بيىكتەۋ اياق كيىم كيىپ الادى. وڭتۇستىك وسەتيانىڭ پرەزيدەنتى اناتولي بيبيلوۆپەن كەزدەسكەندە، پۋتين تۋرا سونداي وكشەسى بيىك ءتوپلي كيىپ كەلگەن.

پرەزيدەنتىمىزدىڭ پۋتينگە قامشى سىيلاعانىن ورىستار وزدەرىنشە جورىپ جاتىر ەكەن. ءبىر ماقالانىڭ استىنداعى كوممەنتكە بىرەۋى ءبۇي دەپ: «ءبىزدىڭ تاريحىمىزدا حانداردان قامشى الىپ، سوناۋ جەردەگى وردادان بيلىگىن زاڭداستىرىپ قايتقان ادامدار دا بولعان. قامشى – بيلىكتىڭ سيمۆولى.. قامشى سەكىلدى مۇنداي نارسەنى نازارباەۆ ەمەس، پۋتين سىيلاۋى كەرەك ەدى وعان. پۋتين اقورداعا ءجاي بارماي، جامان ىرىم جاساپ، قوجاينىنىڭ قولىنان قامشى (كنۋت) الىپ قايتقانداي بولىپ قالدى» جازىپتى...

ديپلوماتيانىڭ ءتىلى – تۇسپالداپ ايتاتىن ءتىل. پرەزيدەنتىمىز قامشى سىيلاپ، قازاق باياعى ماسكەۋگە قامشىسىن ءىلىپ كەتكەن وردالىقتاردىڭ، ءبىر كەزدەرى وزدەرىن باعىنىشتى قىلىپ ۇستاعانداردىڭ تۇقىمى ەكەنىن تۇسپالداپ تۇرعانداي بولىپ كورىندى...

جولىمبەت ماكىش

Abai.kz