12 قاراشا قىرعىزدىڭ اتاقتى جازۋشىسى شىڭعىس ايتماتوۆتىڭ دۇنيەگە كەلگەنىنە 90 جىل تولدى. ايىر قالپاقتى اعايىندارىمىز ايتۋلى تۇلعانىڭ مەرەيتويىن اتاۋسىز قالدىرعان جوق. ءوز دەڭگەيىندە دۇبىرلەتىپ تويلاپ جاتىر. ايتماتوۆتىڭ 90 جىلدىعىن قازاقستان، تاجىكستان سەكىلدى تۋىسقان ەلدەر دە ۇمىت قالدىرماي، سالتاناتتى شارالار ۇيىمداستىرۋدا.

قىرعىز جۇرتى ءبىرتۋار ۇلىنىڭ مەرەيتويىن جوعارى دەڭگەيدە اتاپ ءوتىپ جاتقانىن ايتتىق. وسى كۇندەرى بىشكەك قالاسىندا «شىڭعىس ايتماتوۆ جانە تەاتر» اتتى حالىقارالىق تەاتر فەستيۆالى وتۋدە. فەستيۆال اياسىندا ءبىزدىڭ ەلدىڭ تەاترلارى دا ونەر كورسەتتى. بۇدان بولەك، 29 قازان كۇنى قىرعىزستان ۇلتتىق بانكى شىڭعىس ايتماتوۆتىڭ 90 جىلدىعىنا ارنالعان كوللەكتسيالىق تيىندى قولدانىسقا ەنگىزگەنىن حابارلاعان بولاتىن.

بۇنىڭ ءبارى دۇرىس عوي. بىراق اعايىندىق كوڭىلىمەن ءادىلىن ايتساق، قىرعىز باۋىرلارىمىز باس جازۋشىسىنىڭ 90 جىلدىعىنا جاسالاتىن ناعىز سىيلىقتى ءالى بايقاماعان سەكىلدى. قىرعىزستان استاناسى بىشكەك قالاسى «لەنين»، «وكتيابر»، «ءبىرىنشى ماي»، «سۆەدرلوۆ» سىندى ءتورت اۋدانعا بولىنەدى ەكەن. بايقاپ وتىرعاندارىڭىزداي، ءبارى كەڭەستىك اتاۋلار. قىرعىز بيلىگى ەلدىڭ رەسمي ورتالىعى بولىپ تابىلاتىن بىشكەك قالاسىنداعى اۋدان اتتارىن قالاي اتايتىنىندا ءبىزدىڭ قاقىمىز جوق. الايدا، «ادامزاتتىڭ ايتماتوۆى» اتانعان جازۋشىنىڭ ەسىمىن وسى اۋدانداردىڭ بىرىنە بەرسە، جاراسىپ-اق كەتەر ەدى. بۇنداي ايتۋلى وقيعا جازۋشىنىڭ 90 جىلدىق مەرەيتويىمەن تۇسپا-تۇس كەلىپ جاتسا، ءتىپتى عانيبەت.

ءبىزدىڭ ەلدە دە كەڭەستىك قىپ-قىزىل شاپانىن شەشپەگەن ەلدىمەكەندەر جەتىپ جاتىر. ايتا بەرسەك، اۋدان ەمەس، بىرقانشا ءىرى قالا، وبلىستارىمىز ءارىسى پاتشالىق رەسەي، بەرىسى كەڭەس وداعى قويعان اتتارىنان قۇتىلا الماي كەلەدى. سولتۇستىكتەگى پاۆلودار وبلىسى مەن پەتروپاۆل قالاسى وسى ءسوزىمىزدىڭ دالەلى. بۇلار ەندى باسقا اڭگىمە. ۋاقىتى كەلگەندە ءوز شەشىمىن تابادى دەپ ۇمىتتەنەمىز.

ءبىزدىڭ بۇگىن ايتپاعىمىز، باۋىرلاس قىرعىز ەلى الەمگە ايگىلى جازۋشى شىڭعىس ايتماتوۆتىڭ اتىنا ەل استاناسىنان ءبىر اۋداندى قيسا ەكەن دەگەن ۇسىنىس. ءوز ءجونىمىزدى جوندەپ الماي، وزگە ەلگە اقىل ايتقانىمىز ەمەس. "سىرت كوز سىنشى" دەگەن. قازاق تۋعاندارىنىڭ وسى ۇسىنىسى قىرعىز جۇرتشىلىعىنان قولداۋ تاۋىپ جاتسا، قانەكي!

قۋانىش قاپپاس

Abai.kz