بۇل تۋرالى «نۇر وتان» پارتياسى باستاۋىش پارتيا ۇيىمدارىنىڭ ءبىرىنشى رەسپۋبليكالىق فورۋمىندا ايتىلدى.

جيىننىڭ پلەنارلىق وتىرىسىندا ەلباسى، «نۇر وتان» پارتياسىنىڭ توراعاسى نۇرسۇلتان نازارباەۆ فورۋم قاتىسۋشىلارىن ارنايى قۇتتىقتادى. ەلباسىنىڭ قۇتتىقتاۋ ءسوزىن پارتيا توراعاسىنىڭ ءبىرىنشى ورىنباسارى ماۋلەن اشىمباەۆ وقىپ بەردى.

مەملەكەت باسشىسى بارشا قاتىسۋشىلاردى «نۇر وتان» پارتياسىنىڭ 20 جىلدىق مەرەيلى بەلەسىنە وراي وتكىزىلىپ وتىرعان فورۋمنىڭ اشىلۋىمەن قۇتتىقتاپ، بۇل ايتۋلى وقيعا پارتيانىڭ ەڭ باستى رەسۋرسى ونىڭ مۇشەلەرى، ياعني وتانىمىزدىڭ دامۋىنا، وركەندەپ، گۇلدەنە تۇسۋىنە ەلەۋلى ۇلەس قوسىپ كەلە جاتقان قوعامنىڭ ەڭ بەلسەندى ءارى جاۋاپتى وكىلدەرى ەكەنىن كورسەتەتىنىنە نازار اۋدارعان.

سونداي-اق ەلباسىنىڭ قۇتتىقتاۋ سوزىندە بۇگىندە الدىمىزدا قازاقستاندى الەمدەگى باسەكەگە قابىلەتتى 30 مەملەكەتتىڭ قاتارىنا قاتارىنا ەنگىزەتىن جاڭا دامۋ مودەلىن قالىپتاستىرۋ مىندەتى تۇرعانى، بۇل ماقساتتارعا قول جەتكىزۋ ءۇشىن پارتيانىڭ ءوزى دە جەتىلىپ، زاماناۋي ۇردىستەر مەن تالاپتارعا ساي جۇمىس ىستەۋگە بەيىمدەلۋى كەرەكتىگى ايتىلعان.

– ساياسي كەڭەستىڭ بيىلعى ماۋسىم ايىنداعى كەڭەيتىلگەن وتىرىسىندا ءبىز پارتيانىڭ جۇيەلى جاڭعىرۋ ۇدەرىسىن باستادىق. ونىڭ باستى باعىتتارىنىڭ ءبىرى – باستاۋىش پارتيا ۇيىمدارىنىڭ جۇمىسىن جانداندىرۋ. بۇگىنگى باسقوسۋ پارتيا قىزمەتىنە تىڭ سەرپىن بەرىپ، جۇمىس تاسىلدەرىن جەتىلدىرۋ جولىنداعى ماڭىزدى قادام بولادى دەپ سەنەمىن. تاجىريبەسى مول جەرگىلىكتى ساياسي كوشباسشىلار جەتەكشىلىك ەتىپ وتىرعان باستاۋىش پارتيا ۇيىمدارى – كادرلىق رەزەرۆتى قالىپتاستىرۋدىڭ نەگىزگى كوزى. ولار سونداي-اق ازاماتتارمەن جانە قوعامدىق ۇيىمدارمەن ىقپالداستىق ورناتۋدىڭ دا ماڭىزدى بۋىنى بولۋعا ءتيىس، – دەلىنگەن مەملەكەت باسشىسىنىڭ قۇتتىقتاۋىندا.

سونىمەن قاتار جيىندا پارتيا توراعاسىنىڭ ءبىرىنشى ورىنباسارى پارتيانىڭ ورتالىق اپپاراتى مەن بارلىق فيليالدارىنىڭ جانە باستاۋىش ۇيىمدارىنىڭ الدىندا تۇرعان باسىم باعىتتارعا توقتالىپ ءوتتى.

– بىرىنشىدەن، ەلباسى جولداۋىنىڭ ستراتەگيالىق ماڭىزىن ەسكەرە وتىرىپ، «نۇر وتان» پارتياسى ونىڭ ءتيىمدى جۇزەگە اسىرىلۋىن قامتاماسىز ەتەتىن نەگىزگى كۇشكە اينالۋى ءتيىس. وسى باعىتتا قوعامدىق باقىلاۋ جۇمىستارىن كۇشەيتىپ، ونىڭ ءمانى مەن ماڭىزىن ءار قازاقستاندىققا جەتكىزۋدە بەلسەندى ارەكەت ەتۋىمىز كەرەك. ەكىنشىدەن، پارتيانىڭ كادرلىق الەۋەتىن ارتتىرۋ ءۇشىن باستاۋىش ۇيىمداردىڭ بەلسەندى مۇشەلەرى مەن كوشباسشىلارىنىڭ بىلىكتىلىگىن مولىنان پايدالانۋىمىز كەرەك. پارتيانىڭ كادرلىق رەزەرۆىن قالىپتاستىرۋدا وسى ماسەلەنى مىندەتتى تۇردە ەسكەرگەن ءجون. ۇشىنشىدەن، باستاۋىش ۇيىمدارىمىزدىڭ حالىقپەن جۇمىس تيىمدىلىگىن ودان ءارى ارتتىرۋ قاجەت. ول ءۇشىن جەتەكشىلەردىڭ وزدەرى ساياسي تاجىريبەگە باي، يدەولوگيا، مەنەدجمەنت، پسيحولوگيا سياقتى سالالاردا ساۋاتتى بولۋى ءتيىس. تورتىنشىدەن، باستاۋىش پارتيا ۇيىمدارىنىڭ ماتەريالدىق-تەحنيكالىق بازاسىن كۇشەيتۋ كەرەك. بەسىنشىدەن، پارتيا جۇمىسىندا تسيفرلىق تەحنولوگيالاردى كەڭىنەن قولدانىپ، «تسيفرلى پارتيا» جوباسىن جۇزەگە اسىرۋدا بەلسەندى ارەكەت ەتۋگە ءتيىسپىز. التىنشىدان، بەلسەندى ازاماتتار مەن جاستاردى جۇمىلدىرۋ ارقىلى پارتيا جۇمىسىن كۇشەيتۋدىڭ ماڭىزى زور، – دەدى ماۋلەن اشىمباەۆ.

اbai.kz