سەنبى, 21 قىركۇيەك 2019
الاڭ 2531 18 پىكىر 4 جەلتوقسان, 2018 ساعات 12:17

كومسومولدى تويلاعان قازاق بيىل الاش قايراتكەرلەرىنە ارناپ نە ىستەدى؟

بىلتىر «الاشتىڭ 100 جىلدىعى» دەيتىن ايشىقتى داتانى ەل بولىپ اتاپ وتتىك. اتاپ وتتىك دەپ داليتىپ دارداي قىپ ايتقانىمىزبەن، قازاقتىڭ ازاتتىعى جولىندا اقتىق دەمى ۇزىلگەنشە كۇرەسكەن الاش قايراتكەرلەرىنە، بابالار رۋحىنا ءبىز، بۇگىنگى ۇرپاق، بۇگىنگى قازاقستان لايىقتى قۇرمەت كورسەتە الدىق پا؟ بىرەۋلەر «ءيا، كورسەتتىك» دەيدى، ەندى بىرەۋلەر كەرىسىنشە.

الاش پا، كومسومول ما؟

بيىل ءبىز سول ارىستارىمىزدى اياۋسىز، قاساقانا قىرىپ سالعان كەڭەستىك جۇيەنىڭ باستاۋىش سىنىبى سانالاتىن «كومسومولدىڭ 100 جىلدىعىن» اجەپتاۋىر اسپەتتەدىك. قاڭقاسى قۋراپ، ەشكىمگە كەرەكسىز قالعان كەڭەستىڭ سول ءبىر داتاسىن مەملەكەتتىك ماسششتابتا اتاپ وتتىك. ازاتتىقتىڭ التىن بەسىگى اتانعان الماتىدا دۇركىرەتىپ دۋمان وتكىزدىك. تاۋەلسىز قازاقستان پارلامەنتىنىڭ «مەن» دەگەن دەپۋتاتتارىن، قالا بەردى رەسەيدەن ەلشىمىزدى الدىرتىپ استا-توك توي قىلدىق. قازاقستاننىڭ حالىق ارتيستەرىن اكەلىپ اۋەلەتىپ ءان سالدىردىق. تاۋەلسىز قازاقستاننىڭ اسكەرىنە كەڭەستىڭ، كومسومولدىڭ تۋىن ۇستاتىپ، ونى قورعاتتىق.

كومسومولدىڭ 100 جىلدىعىن الماتىدا دۇركىرەتىپ تويلاعان ءولى كومسومولدىڭ ولمەگەن وكىلدەرى بۇل تويدى قازاقستاننىڭ وڭىرلەرىندە دە اتاپ ءوتتى.

سوراقى بولعاندا قازاقستاننىڭ نەگىزگى زاڭ شىعارۋشى ورگانى سانالاتىن ماجىلىستە دەپۋتاتتار ءبىر-ءبىرىن قۇتتىقتاپ، ەسكى وداقتى كوكسەدى. ول جيىنعا كىمدەر بارعانىن بۇعان دەيىن دە جازدىق. «قىزىلداردىڭ قۇيىرشىقتارى مەم-قىزمەتتەن كەتسىن» دەدىك، تاۋەلسىزدىكتى تارك ەتكەن شەندىلەرى تاۋەلسىزدىك ۇرپاقتارىنان كەشىرىم سۇراسىن دەدىك. «ءلام-ميم» دەگەن دەپۋتات تابىلمادى. بىلق ەتكەن بىرەۋ بولعان جوق. كەرىسىنشە، «جاستار تاريحتى ۇمىتپاۋى كەرەك» دەپ كولگىرسىدى. ءجا، ول تۋرالى قايتالاپ جاتپايىق، مىنە سىلتەمە: https://abai.kz/post/79906

كەڭەستىك جۇيە بيلەپ-توستەگەن 100 جىلدا قازاق قولدان جاسالعان ەكى اشارشىلىقتى، رەپرەسسيانى، دۇنيەجۇزىلىك سوعىستى وتكەردى. كەڭەستىك جۇيە قازاقتىڭ 3/1-ءىن قاسقانا ءولتىردى. كەڭەستىك جۇيەنىڭ كەز كەلگەن ەلەمەنتىن ۇلىقتاۋ – تاۋەلسىزدىكتى مويىنداماۋمەن تەڭ ەدى.

وكىنىشكە وراي قازاقستاننىڭ، قازاقتىڭ تاۋەلسىزدىگىنىڭ جولىندا قۇربان بولعان اتالارىمىزدى مۇنشا قۇرمەتتەگەن جوق ەدىك. مەم-مىنبەردە كومسومولدى اقتاعانداي، الاش قايراتكەرلەرىن اقتاعان دەپۋتات بولدى ما، ايتىڭىزدارشى؟ جوق. ويتكەنى، بوجكو، سەيدۋمانوۆ، سۇلتانوۆ، جۇماعۇلوۆ، ءايتىموۆا، احمەتبەكوۆ، كوسارەۆ، سميرنوۆا، سىزدىقوۆ، زۆولسكي مەن مۋرادوۆتاردىڭ ميلارىنىڭ قىرتىس-قىرتىسىن ءالى كۇنگە سول كەلمەسكە كەتكەن كەڭەستىڭ ەلەسى كەزىپ ءجۇر. وكىنىشتى بولسا دا شىندىق سول!

ال بيىل نە ىستەدىك؟

بيىل الاشتىڭ ءجۇز ءبىرىنشى جىلى. جو-جوق، تۇك بىتىرگەن جوقپىز دەمەيمىز. ازدى-كەم اتقارعان شارۋالار بار. ەندى سولارعا توقتالايىق.

ءبىز «الاش» دەپ سويلەيمىز. ءبىزدىڭ شەندى-شەكپەندىلەردىڭ دە اۋزىندا «الاش» بار. وكىنىشكە وراي، قۇرعاق اۋىز، كوپىرمە ءسوزدى اركىم ساپىرادى. ال ناقتى ىستە شە؟ ايتامىز، قازىر.

«اق جول» الاش ءۇشىن نە ىستەدى؟

قازاقستاننىڭ قازىرگى پارلامەنتىندە «اق جول» دەموكراتيالىق پارتياسى بار. «اق جول» پارتياسى الاشتىڭ ءىزباسارىمىز دەيدى، وزدەرىن. الاش قايراتكەرلەرىنىڭ رۋحىنا ارناپ اتقارعان شارۋالارى دا جوق ەمەس. وعان كوزىمىزدى جۇما المايمىز. ءسوزىمىز سۇيىق شىقپاس ءۇشىن ءبىز اتالعان پارتيانىڭ بيىلعى جىلعى باعدارلاماسىن قاراپ شىقتىق.

«اق جول» دەموكراتيالىق پارتياسى جانە ەلدەگى احۋال» اتتى ساياسي باعدارلاماسىنىڭ «اق جول» پارتياسىنىڭ قازىرگى زامانداعى ءرولى مەن ورىنى» دەيتىن تاراۋىندا بىلاي دەپ جازىلىپتى:

«ءبىزدىڭ پارتيا ۇلتتىق مەملەكەتتىلىكتى قالىپتاستىرۋدىڭ ىرگەلى نەگىزدەرىن قالاعان،  ۇلتتىق مۇددەلەرىمىزدى الەمدىك وركەنيەتتىڭ ۇزدىك جەتىستىكتەرىمەن ۇشتاستىرۋ نەگىزىندە، قازاق قوعامىن ەۋروپالىق جولمەن  جاڭعىرتۋدى ءوزىنىڭ ماقساتى ەتكەن «الاش» ۇلت-ازاتتىققوزعالىسىنىڭ ىزباسارى بولىپ تابىلادى.  «الاش» قوزعالىسىنىڭ بازالىق قۇندىلىقتارى – ۇلتتىق دەربەستىك، ليبەراليزم، دەموكراتيا، جەكە تۇلعانىڭ قۇقىقتارى مەن بوستاندىقتارى، ءونىمدى نارىقتى ەكونوميكا، ەتنوستار مەن دىندەردىڭ تەڭ قۇقىقتىلىعى - ءبىزدىڭ باعدارلارىمىز بولىپ  قىزمەت ەتۋىن جالعاستىرادى». 

ءارى قاراي، «قازاقستان حالقىنىڭ رۋحاني جانە مادەني سالالارىنىڭ دامۋى» دەيتىن تاراۋدا:

«الاش» قوزعالىسى قايراتكەرلەرىنىڭ يدەيالىق كوزقاراستارىن زەردەلەۋ جانە كوپشىلىككە، سونىڭ ىشىندە ءورىستىلدى اۋديتوريالارعا دا تاراتۋ جانە ولاردىڭ ءححى عاسىردا، اسىرەسە قازاقستاندىق قوعامدى ەۋروپالىق جولمەن الەۋمەتتىك، ساياسي جانە ەكونوميكالىق جاڭعىرتۋ بولىگىندە قاجەتتىلىگى جونىندە باعدارلاما قابىلداۋ»، دەپ پارتيانىڭ اتقارۋعا ءتيىس شارالارىن وزىنە مىندەتتەيدى.

مىنە، سول مىندەتتى پارتيا قانشالىقتى اتقاردى، بيىل؟ رەت-رەتىمەن جازايىق:

2018 اقپان. «ورەنبۋرگسكي پۋت احمەتا بايتۋرسۋنوۆا» اتتى كىتاپتىڭ تۇساۋ كەسەرى بولدى.  الاش زيالىلارى رەسەي تاريحشىلارىنىڭ نازارىندا اتتى جيىنى ءوتتى. وندا  ورىنبور مەملەكەتتىك پەداگوگيكالىق ۋنيۆەرسيتەتى تاريح كافەدراسىنىڭ مەڭگەرۋشىسى، پروفەسسور سەرگەي ليۋبيچانكوۆسكي مەن وسى كافەدرا دوتسەنتى تاتيانا تۋگاي، ورىنبورداعى «بايتەرەك» قايىرىمدىلىق قورىنىڭ جەتەكشىسى ساۋلە سوۆحوزوۆنا، «اق جول» پارتياسىنىڭ الماتى وبلىستىق فيليالىنىڭ توراعاسى مەيراش شىناسىلوۆا، توراعا ورىنباسارى ەرلان اقجولوۆ قاتىستى.

2018 ءساۋىر. «اق جول» دەموكراتيالىق پارتياسى 2018 جىلعى «ححI عاسىرداعى الاشتىڭ اق جولى» جالپىۇلتتىق بايقاۋىنىڭ باستالعانىن جاريالادى.

ازات پەرۋاشەۆ قۋعىن-سۇرگiنگە ۇشىراعان اتالارىنىڭ سۋرەتتەرiمەن شەرۋگە شىعۋدى ۇسىندى

2018 مامىر. 31 مامىر –  ساياسي قۋعىن-سۇرگىن مەن اشارشىلىق كۇنى – «اق جول» دەموكراتيالىق پارتياسىنىڭ دەپۋتاتتارى مەن ورتالىق كەڭسەسىنىڭ قىزمەتكەرلەرى قۋعىن – سۇرگىن قۇرباندارىنا ارنالعان «الجير» قاسىرەت كەشەنىندە بولىپ، گۇل شوقتارىن قويدى. ءماجىلىس دەپۋتاتى ازات پەرۋاشەۆ ارiپتەستەرiنە كەلەشەكتە وسى كۇنi قۋعىن-سۇرگiنگە ۇشىراعان اتالارىنىڭ سۋرەتتەرiمەن شىعۋدى ۇسىندى. (بەسسمەرتنىي پولكتىڭ انالوگى رەتىندە)

2018 تامىز. ورال قالاسىندا الاشتانۋشى، تاريح عىلىمدارىنىڭ كانديداتى، باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ پروفەسسورى دامەتكەن سۇلەيمەنوۆانىڭ «جاھانشا دوسمۇحامەدوۆ ءھام قازاق اۆتونومياسى» اتتى جاڭا كىتابى جارىق كوردى. دەمەۋشىلىك جاساپ، كىتاپتى شىعارعان «اق جول» پارتياسى.

2018 قىركۇيەك. ازات پەرۋاشەۆ سانكت-پەتەربۋرگ ورمان تەحنولوگيالىق ۋنيۆەرسيتەتىنىڭ رەكتورىنا وسى وقۋ ورنىنىڭ تۇلەگى ءاليحان بوكەيحاننىڭ مەموريالدى تاقتاسىن ورناتۋ تۋرالى ۇسىنىسىن جولدادى.

2018 قىركۇيەك. «XXI عاسىرداعى الاشتىڭ اق جولى» جالپىۇلتتىق بايقاۋىنا ۇسىنىلاتىن جۇمىستاردى قابىلداۋ مەرزىمى كوپشىلىكتىڭ ءوتىنىشى بويىنشا 2018 جىلدىڭ 1 قاراشاسىنا دەيىن ۇزارتىلدى.

2018 قازان. ەرەيمەنتاۋ وڭىرىندە پەرۋاش كارىمۇلىنا جانە الاش ۇستانىمى ءۇشىن قۇربان بولعان ارىستارعا ارنالعان رەسپۋبليكالىق جارىس ءوتتى.

پەتەربوردا اليحانعا ەسكەرتكىش تاقتا ورناتىلادى

2018 قازان. «اق جول» پارتياسىنىڭ ۇسىنىسىمەن سانكت-پەتەربوردا اليحانعا ەسكەرتكىش تاقتا ورناتىلاتىن بولدى. بۇل ۇسىنىستى، ياعني ەسكەرتكىش تاقتا ورناتۋدى «اق جول» دەموكراتيالىق پارتياسىنىڭ توراعاسى، ءماجىلىس دەپۋتاتى ازات پەرۋاشەۆ باستاعان پارلامەنتتىك فراكتسيا ۇسىنىپ، اتالمىش ۋنيۆەرسيتەتتىڭ رەكتورىنا ارنايى حات جولداعان بولاتىن. ناتيجەسىندە وسىنداي ءساتتى دە، قۋانىشتى شەشىم قابىلداندى.

2018 قاراشا. اقتوبەدە «XXI عاسىرداعى الاشتىڭ اق جولى» اتتى جالپىۇلتتىق بايقاۋدىڭ ەكىنشى كەزەڭى ءوتتى.

2018 قاراشا. ازات پەرۋاشەۆتىڭ ءاليحان بوكەيحانعا ارنالعان ەستەلىك تاقتانى ورناتۋ ۇسىنىسى بويىنشا جولداعان حاتىنا قازاقستان رەسپۋبليكاسىنىڭ رەسەيدەگى ەلشىسى ي. تاسماعامبەتوۆ جاۋاپ بەردى.

بۇدان بولەك قر پارلامەنتى ءماجىلىسىنىڭ  «اق جول» فراكتسياسى بىلتىر دا، بيىل دا دەپۋتاتتىق ساۋال جولداپ، ۇلت كوسەمى ءاليحان بوكەيحان شىعارمالارىنىڭ تولىق جيناعىن جانە الاشتانۋشى عالىمداردىڭ 20-عا جۋىق زەرتتەۋ ەڭبەكتەرىن شىعارۋعا بيۋدجەتتەن قوسىمشا قارجى ءبولۋدى سۇرادى. ناتيجەسىندە، بيىل قر مادەنيەت جانە سپورت مينيسترلىگى اتالعان شىعارمالاردى باسىپ شىعارۋعا قۇلىق تانىتتى.

وسى رەتتە جىل سايىن ءداستۇرلى ۇيىمداستىرىلىپ كەلە جاتقان «XXI عاسىرداعى الاشتىڭ اق جولى» اتتى جالپىۇلتتىق بايقاۋى جايلى ءبىر اۋىز ءسوز ايتقانىمىز ءجون بولار.

بيىل بۇل بايقاۋعا ۇزىن-ىرعاسى 150 ادام قاتىسقان ەكەن. بۇل ءجۇز ەلۋى الاش قايراتكەرلەرىنىڭ مۇراسىن زەرتتەپ جۇرگەن جيىرماداعى جاستار.

راسىندا، بۇل بايقاۋدىڭ سانالارى كەڭەستىك كەسىر يدەولوگيامەن ۋلانباعان، الاش ارىستارىن، ءاليحان بوكەيحان باستاعان ۇلت زيالىلارىن ءپىر تۇتاتىن تاۋەلسىز سانالى ازات ۇرپاقتى تاربيەلەۋدە ماڭىزى ەرەكشە.

الاش قايراتكەرلەرىن ۇلىقتاپ، كەلەر ۇرپاققا ناسيحات ەتىپ جۇرگەن جالعىز «اق جول» دەسەك تاعى جاراسپاس. ۇكىمەت، حالىقارالىق ۇيىمدار مەن جەكەلەگەن ازاماتتاردىڭ دا اتقارعان از-كەم شارۋالارىن ايتايىق.

تۇركسوي

تۇركسوي حالىقارالىق ۇيىمى بيىلعى جىلدى ماعجان جۇماباەۆتىڭ 125 جىلدىعى مەن قىرعىز جازۋشىسى شىڭعىس ايتماتوۆتىڭ 90 جىلدىعىنا ارنادى.

2018 اقپان. تۇركى اكادەمياسى حالىقارالىق ۇيىمى (TWESCO) استانادا «تۇركى الەمىندە تۇلعالار تاعىلىمى» سەرياسى بويىنشا الاشوردانىڭ 100 جىلدىعىنا وراي «الاش اسكەرى: تاريحتان تاعىلىم» تاقىرىبىندا ەكىنشى سەمينار ۇيىمداستىردى.

2018 اقپان. ب. ابدىعاليۇلىنىڭ «الاشوردانىڭ اسكەري قۇرىلىمى (1917-1920 جج.)» اتتى كىتابىنىڭ تانىستىرىلىمى ءوتتى. تۋىندىنىڭ ىشىندە 11000 فاميليا كەزدەسەدى.

2018 ءساۋىر. پاريجدەگى يۋنەسكو-نىڭ شتاب-پاتەرىندە ميچيگان شتاتىنىڭ ۋنيۆەرسيتەت پروفەسسورى تيمۋر كوجاوعلى ءوزىنىڭ «ماعجان - وتتىڭ، ەركىندىك پەن ماحابباتتىڭ اقىنى» اتتى كىتابىن تانىستىردى.

2018 قازان. ماعجاننىڭ تاڭدامالى تۋىندىلارى قىرعىز تىلىندە جارىق كوردى.

2018 قازان. تۇركسوي حالىقارالىق ۇيىمى ماكەدونيانىڭ سكوپە جانە گوستيۆار قالالارىندا «تۇركى الەمىنىڭ ۇلى پەرزەنتتەرى» اتتى حالىقارالىق عىلىمي كونفەرەنتسيالار وتكىزدى.

وندا سكوپە قالاسىنداعى ماكەدونيا مەملەكەتتىك ۋنيۆەرسيتەتىنىڭ تۇركولوگيا بولىمىندە جانە گوستيۆار قالاسىنداعى ۆيزيون ۋنيۆەرسيتەتتەرىندە وتكىزىلگەن كونفەرەنتسيالاردىڭ ناتيجەسىندە ماعجان جۇماباەۆتىڭ مۇرالارىن ماكەدون تىلىنە اۋدارۋ كەلىسىلدى.

جەكەلەگەن ازاماتتار

2018 اقپان. «تار زامان» تەلەحيكاياسى ۇلتتىق ارنادا ناۋرىز ايىندا كورسەتىلە باستادى. «تار زامان» تەلەحيكاياسى 14 ەپيزودتان تۇرادى. ونىڭ كەيىپكەرلەرى - ءبىر عاسىر بۇرىن ازاتتىق ءۇشىن كۇرەسكەن الاشوردا قوزعالىسىنىڭ كوسەمى مەن مۇشەلەرى. بۇل سەريالدا جالپى 37 تاريحي كەيىپكەر بەينەلەنگەن.

2018 اقپان. بەلگىلى تاريحشى بەرىك ابدىعاليدىڭ «الاشوردانىڭ اسكەري قۇرىلىمى» مەن «ۆويسكو الاش» كىتابىن ەلىمىزدەگى اسكەري كافەدراسى بار جوعارى وقۋ ورىندارىنىڭ باعدارلاماسىنا ەنگىزۋ ۇسىنىلدى. ۇسىنىس اۆتورى ءماجىلىس دەپۋتاتى اباي تاسبولاتوۆ.

2018 ءساۋىر. بەلگىلى جۋرناليست جانبولات ماماي «الاش رەسۋپبليكاسى جەڭگەندە...» اتتى دەرەكتى فيلم ازىرلەپ شىقتى.

2018 ماۋسىم. ورالدا اعارتۋشى-ويشىل، الاش قايراتكەرى عۇمار قاراش شىعارمالارىنىڭ ءۇش تومدىعى تانىستىرىلدى. جوبا اۆتورى - «جايىق پرەسس» جشس باس ديرەكتورى جانتاس سافۋللين.

2018 قاراشا. «الاش تۋى استىندا» دەرەكتى ءفيلمى جارىق كوردى. ءفيلىمنىڭ ستسەناريىن جازعان – بولات ءمۇرسالىم. رەجيسسەرى – ەرگەن توقمۋرزين. ءفيلمنىڭ تۇساۋكەسەرى قاراشا ايىندا استانادا ءوتىپ، وعان بىرقاتار ساياساتكەرلەر مەن تانىمال تۇلعالار قاتىستى. فيلم قر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق «ەل» پروديۋسەرلىك ورتالىعىمەن بىرلەسە وتىرىپ تۇسىرىلگەن.

ۇكىمەت پەن جەرگىلىكتى باسقارۋشى ورگاندار

قىزىلوردا

2018 ءساۋىر. قىزىلوردادا كورنەكتى مەملەكەت جانە قوعام قايراتكەرى مۇستافا شوقاي جايىندا تۇسىرىلگەن «ارداعى ەدى تۇركىنىڭ» اتتى دەرەكتى فيلم كورەرمەنگە جول تارتتى.

پاۆلودار

2018 مامىر. پاۆلوداردا №25 جالپى ورتا ءبىلىم بەرۋ مەكتەبىندە وڭىردەگى تۇڭعىش «شاكارىمتانۋ» ورتالىعى اشىلدى. ورتالىق شاكارىم قۇدايبەردىۇلىنىڭ 160 جىلدىعى اياسىندا جۇزەگە اسقان.

قىزىلجار

2018 ماۋسىم. قىزىلجاردا قازاقتىڭ ۇلى اقىنى، الاش قوزعالىسىنىڭ قايراتكەرi ماعجان جۇماباەۆتىڭ 125 جىلدى اتالىپ ءوتتى. عىلىمي-پراكتيكالىق كونفەرەنتسيا ءوتتi. كونفەرەنتسيانىڭ اشىلۋىندا ءسوز سويلەگەن وبلىس اكiمi قۇمار اقساقالوۆ وڭiردە اقىننىڭ مەرەيتويىنا وراي 450-دەن اسا ءتۇرلi شارا وتكiزiلiپ جاتقاندىعىن اتاپ ءوتتi. بۇدان بولەك، ماعجان جۇماباەۆقا ارنالعان ءۇش كiتاپتىڭ تۇساۋى كەسىلدى.

2018 ماۋسىم. ماعجان جۇماباەۆتىڭ 125 جىلدىعىنا ارنالعان پوشتا ماركاسى شىقتى.

2018 ماۋسىم. پەتروپاۆلدا اقىننىڭ تاعى ءبىر ەسكەرتكىشى اشىلدى.

الماتى

2018 ماۋسىم. الماتىدا 1920-30 جىلدارداعى اشارشىلىق پەن ساياسي قۋعىن-سۇرگىنگە ارنالعان «الاش ارىستارى جانە اشارشىلىق» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى.

قاراعاندى  

2018 تامىز. قاراعاندىداعى ورتا ءبىلىم بەرەتىن №41 مەكتەپكە قازاقتىڭ قوعام جانە مەملەكەت قايراتكەرى احمەت بايتۇرسىنوۆتىڭ اتى بەرىلدى.

ءبىلىم وشاعىنا الاش ارداقتىسىنىڭ ەسىمىن بەرۋ قر ۇكىمەتىنىڭ 11 تامىز 2018 جىلعى №500 قاۋلىسىمەن بەكىتىلدى.

سەمەي

2018 قاراشا. سەمەيدە 8 مەكتەپكە تانىمال تۇلعالار مەن «الاش» پارتياسى قايراتكەرلەرىنىڭ ەسىمى بەرىلەتىن بولدى.

اتاپ ايتقاندا № 49 مەكتەپكە قازاقتىڭ باس اقىنى اباي قۇنانباەۆ،  № 3 مەكتەپكە جازۋشى مۇحتار اۋەزوۆ، №2 مەكتەپ گەولوگ-عالىم قانىش ساتپاەۆتىڭ، №34 مەكتەپ كەڭەس وداعىنىڭ باتىرى، جازۋشى باۋىرجان مومىشۇلىنىڭ، №37 مەكتەپ ىبىراي التىنسارين، №39 مەكتەپ ءاليحان بوكەيحانوۆتىڭ، 47 مەكتەپ احمەت بايتۇرسىنوۆ جانە 29 مەكتەپ پەداگوگ تاشبەك قۇتجانوۆتىڭ ەسىمىمەن اتالاتىن بولادى.

ءتۇيىن. 2016 جىلى ۇلت كوسەمى ءاليحان بوكەيحاننىڭ 150 جىلدىعى مەن بىلتىر «الاشتىڭ 100» جىلدىعىن جەتىم قىزدىڭ تويىنداي وتكىزگەن ەدىك. ەسەسىنە بيىل «كومسومولدىڭ 100» جىلدىعىن اسقان داراقىلىقپەن تويلادىق. ءجاي تويلاپ قويمادىق، جاس وسكىن، جاڭا بۋىن ساناسىنا كۇشتەپ ناسيحاتتادىق. ول جايلى جوعارىدا ەگجەي-تەگجەيلى ايتتىق، قايتالاپ جاتپايىق.

ءبىز بۇگىن بيىل الاش قايراتكەرلەرىنىڭ رۋحىنا ارناپ، الاشقا ارناپ نە ىستەدىك، نە ىستەي الدىق دەگەن سۇراققا جاۋاپ ىزدەدىك. ونى جوعارىدان كوردىڭىزدەر. ءبىز بيىل جاسالعان جۇمىستاردى تولىق قامتىدىق دەي المايمىز. ەگەر اتقارىلعان شارۋالاردىڭ ىشىندە ايتىلماي قالعانى بولسا، تولىقتىرا جاتارمىز. دەسە دە ايتپاعىمىز مىناۋ ەدى:

بيىل اتاپ وتەرلىك ايتۋلى داتالار جوق ەمەس ەدى. بارلىعىن تولىق قامتىماساق تا، ءبىرسىپىراسىن جازايىق. بىلە ءجۇرسىن دەگەن نيەتپەن، ارينە.

بيىل:

-قازاقتىڭ ۇلى اقىنى، الاش قايراتكەرى ماعجان جۇماباەۆتىڭ 125 جىلدىعى,

-قازاقتىڭ اقىنى، اعارتۋشى-دەموكراتى سۇلتانماحمۇت تورايعىروۆتىڭ 125 جىلدىعى,

-قازاقتىڭ ويشىل اقىنى، الاشتىڭ اتاسى شاكارىم قۇدايبەردىۇلىنىڭ 160 جىلدىعى,

-الاش قايراتكەرى، ۇستاز، عالىم حالەل دوسمۇحامەدوۆتىڭ 135 جىلدىعى,

-الاشوردا ۇكىمەتى توراعاسىنىڭ ورىنباسارى حالەل عابباسوۆتىڭ 130 جىلدىعى,

-الاشوردانىڭ جەتىسۋدان سايلانعان مۇشەسى، زاڭگەر بازارباي مامەتوۆتىڭ 130 جىلدىعى,

-الاشتىڭ حالىق كەڭەسىندە كانديدات بولىپ سايلانعان ەرەجەپ يتباەۆتىڭ 145 جىلدىعى,

-الاش قايراتكەرى، زاڭگەر مۇقىش بوشتاەۆتىڭ 130 جىلدىعى,

-الاشتىڭ حالىق كەڭەسىندە كانديدات بولىپ سايلانعان سالىمگەرەي نۇرالىحانوۆتىڭ 140 جىلدىعى,

-جەتىسۋ وڭىرىندە الاش قوزعالىسىنىڭ جەتەكشىلەرىنىڭ ءبىرى بولعان ساتىلعان ساباتاەۆتىڭ (قۇجاتتاردا جانەكە، جاپەكە) 140 جىلدىعى,

-الاش قايراتكەرى، «اق جول» گازەتىنىڭ رەداكتورى ەسىم بايعاسكيننىڭ 125 جىلدىعى,

-باتىس الاشوردا قايراتكەرى باقىتجان بايتاقوۆتىڭ 120 جىلدىعى,

-قازاقتىڭ ۇلتشىل قىزى، الاش قايراتكەرى اققاعاز دوسجانوۆانىڭ 125 جىلدىعىن

-الاشپەن يدەيالاس بولعان ءماشھۇر ءجۇسىپ كوپەەۆتىڭ 160 جىلدىعىن لايىقتى دەڭگەيدە اتاپ وتتىك پە؟ جوق. ەسەسىنە ءبىز «كومسومولدىڭ 100» جىلدىعىن تويلادىق. مىنە، جاعداي سولاي...

نۇرگەلدى ابدىعانيۇلى

Abai.kz

18 پىكىر