2018 جىلدىڭ 12 قاراشاسىندا قازاقستان رەسپۋبليكاسى ءبىلىم جانە عىلىم مينيسترلىگىنىڭ باستاماسىمەن «بالالىق شاق – مەيىرىمدىلىك مەكەنى» ۇرانىمەن «زورلىق-زومبىلىقسىز بالالىق شاق» رەسپۋبليكالىق اقپاراتتىق ناۋقانى باستالدى، - دەپ حابارلايدى اباي-اقپارات.

رەسپۋبليكالىق اقپاراتتىق ناۋقان شەنبەرىندە ەلىمىزدىڭ ءار ايماعىندا وبلىستاردىڭ استانا، الماتى، شىمكەنت قالالارىنىڭ جەرگىلىكتى اتقارۋشى ورگاندارىمەن ۇكىمەتتىك ەمەس ۇيىمدارمەن:

*بالالارعا قاتىستى قاتىگەزدىكپەن قاراۋ ماسەلەلەرىنە قوعامنىڭ نازارىن اۋدارۋ جانە بالالارعا قاتىگەزدىك تانىتۋتىڭ، تاربيەلەۋدىڭ زورلىق ادىستەرىنە جول بەرىلمەۋ تۋرالى اقپارات تاراتۋ;

*اتا-انا جاۋاپكەرشىلىگىن ناسيحاتتاۋ;

*بالالارعا قاتىستى زورلىق- زومبىلىق جانە قاتىگەزدىكپەن قاراۋ جاعدايلارىندا كومەك كورسەتۋدىڭ قولجەتىمدىلىگىن قامتاماسىز ەتۋ جانە تيىمدىلىگىن ارتتىرۋ بويىنشا ءىس-شارالار وتكىزىلەدى.

ەلىمىزدىڭ بارلىق وڭىرلەرىندە سەمينارلار، كەزدەسۋلەر، كونفەرەنتسيالار، فلەش-موبتار، دەمالىس كۇنى مەرەكەلەرى، رەيدتىك ءىس-شارالار وتكىزىلەدى جانە ءبىلىم بەرۋ مەكەمەلەرىندە كورمەلەر ۇيىمداستىرىلادى.

اقپاراتتىق ناۋقان 2018 جىلدىڭ 23 قاراشاسىنا دەيىن جالعاسادى.

بالا تاربيەسىندە تاربيەلىلىككە جەتۋدىڭ جولى - ەڭبەككە، ادەپتىلىككە، يناباتتىلىققا، ادامشىلىققا، قايىرىمدىلىققا ۇيرەتۋ كەرەك. وسىلاردىڭ بارلىعىن بالالاردىڭ بويىنا ءسىڭىرىپ، كۇندەلىكتى ومىردە ادەتكە اينالدىرۋ تاربيەنىڭ باستى ماقساتى بولماق. سونىمەن بىرگە بالا تاربيەسىندەگى تاربيەلىلىككە ۇيرەتۋدەگى پارمەندى ءتاسىل - ادامداردىڭ ءوزارا ءتالىمى مەن ۇلگىسى ەكەنىن ايتقانىمىز ءجون. حالىق دانالىعى – «ادامنان - ادام ءتالىم الادى، اعاشتان – اعاش ماۋە الادى» دەگەن ءسوز بەكەر ايتىلماعان.

ءۇزىلىسسىز ۇرپاق تاربيەسىندەگى قوس بوساعا - ءتارتىپ پەن مادەنيەت كۇللى ادام اتاۋلىنىڭ كۇندەلىكتى ادەتتەرىنە اينالعان كەزدە، بىزدەر مەيىرىمى مول قايىرىمدى قوعامدى قۇرىپ قانا قويماي، زورلىق - زومبىلىقسىز بالالىق شاقتىڭ شاڭىراعىن بيىكتەتە تۇسكەن بولار ەدىك. قازىرگى تاڭدا تاۋەلسىزدىك العان مەملەكەتىمىزدە زورلىق - زومبىلىققا جول جوق. ونىڭ ەتەك الۋى وتباسىنان باستالادى. وتباسىنداعى سالاۋاتتىلىق – وركەنيەتتى قوعامنىڭ تالابى، ويتكەنى ۇرپاقتان - ۇرپاققا جالعاسىپ كەلە جاتقان داستۇرلەر مەن مۇراتتار كوبىنەسە وتباسىندا دامىپ، قالىپتاسادى.

ادامدى ءوزارا تۇسىنىستىككە جەتكىزەتىن شىنايى دا، تۇراقتى سۇيىسپەنشىلىك داستۇرلەرى دە تەك سالاۋاتتى وتباسىندا عانا قالىپتاسادى. ەل پرەزيدەنتى نۇرسۇلتان ءابىشۇلى نازارباەۆ مەملەكەتىمىزدىڭ قانداي باعىتتا، قالاي دامۋى كەرەك ەكەندىگىن بەلگىلەپ بەردى. ارينە، وسى مىندەتتى بولاشاقتا جاستاردىڭ جۇزەگە اسىراتىندىعى كۇمانسىز. ولاي بولسا، سول جاستاردىڭ ءبىلىم دەڭگەيى، اتا - انادان العان ءتالىم - تاربيەسى قانداي دارەجەدە دەگەن سۇراق تۋىندايدى. بۇل سۇراققا تولىق، جان - جاقتى جاۋاپ بەرۋ ازىرگە قيىنداۋ، وعان دالەل – بۇگىنگى قوعامىمىزدا قىلمىستىڭ كۇننەن - كۇنگە كوبەيۋى. ءبىزدىڭ ويىمىزشا، ونىڭ سەبەبى جاستارىمىزعا ۋاقىتىندا ۇلتتىق تاربيەنى بەرە الماعانىمىزدان تۋىنداعانى جاسىرىن ەمەس. ارينە، قازىرگى تاڭداعى الەۋمەتتىك - تۇرمىستىق جاعدايدىڭ ناشارلاۋى دا بۇعان اسەر ەتۋدە. سونىمەن قاتار تاربيە سالاسىنا اسا ءمان بەرۋ بۇگىنگى كۇننىڭ وزەكتى ماسەلەسى بولىپ تابىلادى. بۇل ماسەلە جونىندە ءبىزدىڭ ۇلى بابامىز ءابۋ ناسىر ءال فارابي: "ادامعا ەڭ ءبىرىنشى ءبىلىم ەمەس، تاربيە بەرىلۋ كەرەك، تاربيەسىز بەرىلگەن ءبىلىم ادامزاتتىڭ قاس جاۋى"- دەگەن بولاتىن.

بالالار – ەلىمىزدىڭ بولاشاعى. ولاردى تاربيەلەۋ، وقىتۋ، ءبىلىم بەرۋ، بولاشاققا قادام باستىرتىپ وسى ومىردە ءوز ورنىن تاپتىرۋ ءار اتا - انانىڭ مىندەتى. انانىڭ بەسىك جىرىنان باستالاتىن قارىم - قاتىناسى، ءىس - ارەكەت، ادەت - عۇرىپ، سالت - ءداستۇر وسىلاردىڭ ءبارى ادامنىڭ دۇنيەتانىمىن، سانا - سەزىمىن، مىنەز - قۇلقىن قالىپتاستىراتىن تالىمدىك مۇرا ەكەنىن ەسكەرۋىمىز كەرەك. سوندىقتان دا، قازاقستان رەسپۋبليكاسى ءبىلىم جانە عىلىم مينيسترلىگىنىڭ باستاماسىمەن «بالالىق شاق – مەيىرىمدىلىك مەكەنى» ۇرانىمەن  وتەتىن «زورلىق-زومبىلىقسىز بالالىق شاق» رەسپۋبليكالىق اقپاراتتىق ناۋقانى ءساتتى بولارىنا سەنىمىمىز كامىل.

Abai.kz