ءبىز ءوزىمىزدىڭ قانشاما رەت «كەرەمەت ونەرلى حالىقپىز» دەپ بوركىمىزدى اسپانعا اتىپ،  ماقتانعانىمىزبەن ورەمىز  بيىك دەپ ايتا الماس ەدىك. وعان قازىر دۇنيەجۇزىنە اتاعى جايىلعان، شىن ماىنىدەگى «جارىق جۇلدىز»  دىنمۇحامەد (ديماش) قۇدايبەرگەنوۆتىڭ ءجۇرىپ وتكەن جولى كۋا. ءتىپتى كەزىندە «سلاۆيان بازارى» دوداسىندا باس جۇلدەنى قانجىعاسىنا بايلاعان بالامىزدى ءوز ەلىندە باعالاي المادىق. ول ءتىپتى وسىنداعى قاتارداعى جاي عانا ءان كونكۋرسىنان وتە المادى.

ديماشتىڭ مىڭ قۇبىلعان كەرەمەت داۋىسىن «باقىرعان، شاقىرعان» داۋىسپەن شاتاستىرىپ، كۇلكىگە قالدىق.   جوق، مەن بۇل ارادا سول كونكۋرسقا قازىلىق ەتكەن رينات پەن باعىمدى كىنالاعالى وتىرعان جوقپىن. مۇنداي ەرەكشە داۋىستى باعالاي الماۋ ولاردىڭ دەڭگەيىنىڭ تومەندىگىنەن ەمەس. حالقىمىزدىڭ ونەردىڭ ورىسىنەن كورىنە المايتىن، تالعامىنىڭ تىم تومەندىگىنەن. تەك قانا داستارقان باسىندا شايناڭداپ شايقالىپ وتىرىپ، ءىشىپ-جەپ قىزارا وتىرىپ، ءان تىڭدايتىن، سول ءۇشىن جيعان-تەرگەنىن دە شاشىپ جىبەرەتىن جەردە شىنايى ونەرگە جول بەرىلۋشى مە ەدى؟

اڭگىمە ءتىپتى الگى قازىلار القاسىنىڭ (جۇرت  ايتا بەرەتىن «ءادىل قازىلار» ەمەس) ديماشقا دەگەن دورەكى كوزقاراسىندا ەدى. ماسەلەن، جۇرت سىيلايتىن، تاماشا اقىن، باتىل ازامات ريناتتىڭ ديماشقا «سەن نەگە ميكروفوندى يەگىڭە جاقىن ۇستايسىڭ؟ ساحنادا دۇرىستاپ تۇر» دەپ جەكۋى قاي مادەنەتتىلىككە جاتادى؟ ونىڭ ونەرىن باعالاماساڭ، باعالاما، الايدا جاس بالاعا، ونىڭ بولاشاعىنا جاناشىرلىقپەن قاراۋ ءۇشىن قانداي بيىك تانىم كەرەك؟

وبالى نە، انا بيبىگۇل  مەن روزانىڭ «توي اندەرى ۇلكەن ونەر ەمەس» دەپ ۇنەمى ايتىپ كەلە جاتقانىن كىم قۇلاعىنا قىستىرىپتى؟ جوق، ءبىز ءۇشىن ول ۇلكەن ونەر، تالانتتىڭ تاۋسىلماس قاينار كوزى. ول ءۇشىن قايرات نۇرتاسقا ءبىر تويدا 8 مىڭ دوللاردى قىسىلماستان بەرە سالامىز. ونى ايتامىز-اۋ، جاقىندا جاڭا عانا تانىلىپ كەلە جاتقان ءادىجاپپار القوجا دەگەن ءانشى ءوزىنىڭ ءبىر تويدا عانا 20 ميلليون تەڭگە تابىس تاپقانىن ماقتانا جىر ەتىپ ءجۇر. ال ەندى ويلانىپ كورەلىكشى، تالعامىنىڭ وسىنداي دەڭگەيدەگى قوعامدا ديماش سەكىلدى ەرەكشە قۇبىلىستىڭ وزىنە لايىقتى اتاق-ابىرويعا بولەنۋى مىمكىن بە؟ جوق، مۇمكىن ەمەس. بىزدە قاشاندا قايرات نۇرتاس پەن تورەعالي ءتورالىلىنىڭ، ەرنار ايدار مەن بۇركىتتىڭ اتى قاشاندا وزىق كەلەدى. بۇل ورتادا ديماش سەكىلدىلەرگە ەشقاشاندا ورىن جوق.

تاعى دا قاداپ ايتامىن، بۇل جەردە الگى انشىلەردىڭ ەشبىر كىناسى جوق. ولار ديماشتىڭ اتاعىن قىزعانبايدى دا. ماسەلە، بىلايعى جۇرتتىڭ «كوڭىلگە ءتۇرلى وي سالاتىن» اندەردى تۇسىنە دە، تۇيسىنە دە المايتىنىندا. سوندىقتان دا قازاق ديماشتى تويعا شاقىرمايدى. قازاق راديوسىندا كۇندىز-ءتۇنى بەرىلىپ جاتاتىن كونتسەرتتە ديماشتىڭ اندەرى ەستىلمەيدى دە. ويتكەنى ونى تىڭدايتىن قۇلاق تا، وعان تەبىرەنەتىن جان-دۇنيە دە جوق. قازىرگى قازاققا كەرەگى داڭعازا ۋ-شۋ مەن فانەرشىلدەردىڭ قىرىلداپ ايتار ءبىر كۇندىك اندەرى عانا.

ھەندى كىمگە سەنەمىز، كىمگە ءۇمىت ارتامىز؟  وزىمىزدەن وق بويى ىلگەرى تۇرعان، ديماشتى الەمگە تانىتقان  قىتاي حالقى مەن ونەردىڭ نە ەكەنىن شىنايى باعالاي بىلەتىن ەۋروپا جۇرتشىلىعىنا عانا سەنەمىز. اششى بولسا دا، شىندىق وسى.

جايبەرگەن بولاتوۆ

Abai.kz