بىشكەكتە قىتاي ەلشىلىگىنىڭ الدىندا ميتينگ ءوتتى. اكتسياعا قاتىسۋشىلار قحر بيلىگىنەن قىتايداعى ەتنيكالىق قىرعىزداردى قۋدالاۋ مەن قايتا تاربيەلەۋ لاگەرلەرىنەن بوساتۋدى تالاپ ەتتى، — دەپ حابارلايدى tengrinews.kz باسىلىمى 24.kg سايتىنا سىلتەمە جاساپ.

«سونىمەن قاتار ءبىز بۇكىل شەتەلدىك ازاماتتاردى قىرعىزستاننان ءبىر اي ىشىندە كەتۋىن تالاپ ەتەمىز. سوڭعى 10 جىلدا شەتەلدىك ازاماتتارعا قر ازاماتتىعىن بەرۋ زاڭدىلىعىن تەكسەرۋ ءۇشىن كوميسسيا قۇرىلسىن»، — دەدى «كىرك چورو» قوعامدىق قوزعالىسىنىڭ توراعاسى زاميربەك كوچورباەۆ.

كaktus.media مالىمەتىنشە، ميتينگكە شىققاندار قىرعىزستاندىقتاردىڭ لاگەردە جاتقانى تۋرالى ناقتى مالىمەتتىڭ جوقتىعىن جانە تەك ينتەرنەت ارقىلى بىلگەنىن ايتقان.

«ۇكىمەت وسىنىڭ شىن نە وتىرىك ەكەنىن ءبىلسىن. ەگەر جالعان بولسا، حالىقتى تىنىشتالدىرسىن، ءبىز الاڭداپ وتىرمىز. ەگەر شىن بولسا، وندا شارا قولدانسىن»، — دەيدى ەرەۋىلگە شىققاندار.

«كىرك چورو» ۇيىمى ءوز تالاپتارىن ورىنداۋعا 30 كۇن ۋاقىت بەردى. وسى مەرزىم اياقتالعاننان كەيىن ولار وزدەرى قىتايلار جۇمىس ىستەۋى مۇمكىن كەڭسەلەر مەن كومپانيالارعا بارىپ تەكسەرەتىندەرىن ايتتى.

«بۇل ءبىرىنشى، بىراق سوڭعى اكتسيا ەمەس، وسى باعىتتا بىرنەشە اكتسيا وتكىزۋدى جوسپارلاپ وتىرمىز. ءوز وتانداستارىمىزدى باسقا ەلدە ەزگى كورۋىنە جول بەرمەيمىز. بۇل شامامەن 50 مىڭ قىرعىز»، — دەدى شۋ وبلىستىق قوزعالىس كورديناتورى باكتىبەك نۋرالى ۋلۋ.

تاياۋدا ەل پرەزيدەنتى سوورونباي جەەنبەكوۆ قىتايداعى قايتا تاربيەلەۋ لاگەرلەرى تۋرالى ۇندەۋلەرگە بايلانىستى اباي بولۋدى جانە قىتاي ازاماتتارىنىڭ ەكسپانسياسى تۋرالى قوعام اراسىندا دۇرلىكتىرۋ شارالارىنان باس تارتۋدى سۇراعان.

Abai.kz