قاراشا ايىندا مەديتسينالىق ساقتاندىرۋ قورىنا 8,64 ملرد تەڭگەدەن استام جارنا ءتۇستى. جۇيە ىسكە قوسىلعان 2017 جىلدىڭ 1 شىلدەسىنەن 2018 جىلدىڭ 30 قاراشاسىنا دەيىنگى ارالىقتا جيناقتالعان جارنانىڭ جالپى سوماسى 122,47 ملرد تەڭگەگە جەتكەن.

ونىڭ 113,83 ملرد تەڭگەسى (شامامەن 93%) جۇمىس بەرۋشىلەردىڭ اۋدارىمدارى بولسا، قالعان 8,64 ملرد تەڭگە (7%) – جەكە كاسىپكەرلەر مەن ازاماتتىق-قۇقىقتىق كەلىسىمشارت نەگىزىندە ەڭبەك ەتەتىن تۇلعالارعا تيەسىلى.

ايماقتىق تۇرعىدان العاندا، جارنا تولەۋ جاعىنان بۇرىنعىشا الماتى، استانا قالالارى مەن قاراعاندى وبلىسى كوش باستاپ تۇر.

جيناقتالعان قارجى ۇلتتىق بانكتە ساقتالادى. بولاشاقتا بۇل قارجى ءمامس پاكەتى شەڭبەرىندەگى قىزمەتتەر اقىسىن تولەۋگە جۇمسالادى. ەلىمىزدىڭ باس بانكىمەن قارجىنى سەنىمگەرلىك باسقارۋ تۋرالى كەلىسىم بەكىتىلگەن.

ايتا كەتەيىك، قازاقستاندا مىندەتتى مەديتسينالىق ساقتاندىرۋ ۇلگىسىن تاڭداعاندا 50-دەن استام ەلدىڭ تاجىريبەسى قارالىپ، ەسكەرىلگەن. بۇگىندە بۇكىل الەمدە دەنساۋلىق ساقتاۋدىڭ ءۇش ءىرى  قارجىلاندىرۋ مودەلى قولدانىلۋدا: بيۋدجەتتىك، ساقتاندىرۋ جانە ارالاس بيۋدجەتتىك مودەل.

بۇل مودەلدەر ۇلىبريتانيا، يسپانيا، يتاليا، شۆەتسيا سياقتى ەلدەردە بار. قوعامدىق الەۋمەتتىك ساقتاندىرۋ گەرمانيا، فرانتسيا، بەلگيا، كورەيا، جاپونيا، سلوۆاكيا، شىعىس ەۋروپا ەلدەرىندە بارلىعى 30 ەلدە جۇمىس جاسايدى جانە جەكە ساقتاندىرۋ امەريكا قۇراما شتاتتارىندا بار. الايدا، كوپتەگەن ەلدەر «بيۋدجەتتىك» جانە «ساقتاندىرۋ» مودەلدەرى ءوز تيىمدىلىگىن دالەلدەگەندىكتەن سولارعا جۇگىنەدى. قازاقستان ۇزدىك حالىقارالىق تاجىريبەنى ەسكەرە وتىرىپ، مەديتسينالىق ساقتاندىرۋدىڭ ارالاس مودەلىن ەنگىزەتىن بولادى.

بۇل قامتاماسىز ەتەدى:

- دەنساۋلىق ساقتاۋدىڭ قارجىلىق تۇراقتىلىعىن;

- مەديتسينالىق قىزمەتتەردىڭ ساپاسى مەن قول جەتىمدىلىك جوعارى دەڭگەيىن;

- دەنساۋلىق ساقتاۋ پاكەتىن;

قازاقستاندا قولدانىستاعى زاڭناماعا سايكەس ۇلەس ستاۆكاسىنىڭ مولشەرى - جۇمىس بەرۋشىلەر 2020 جىلدان باستاپ 5% مولشەرىندە، قىزمەتكەرلەر - 2% بولعان. گەرمانيادا جۇمىس بەرۋشىنىڭ سالىمدارى - 8,2%، جۇمىسشىلاردىڭ 7,3%  قۇرايدى. تيىسىنشە سلوۆاكيادا 10% جانە 4%، ليتۆادا 3% جانە 6% بولعان.

Abai.kz