بەيسەنبى, 22 تامىز 2019
1571 25 پىكىر 9 قاڭتار, 2019 ساعات 10:15

قازاقستان مەن ارمەنيانىڭ قاۋىپسىزدىك كەڭەسى حاتشىلارى تىلدەسكەن

ارمەنيا قاۋىپسىزدىك كەڭەسىنىڭ حاتشىسى ارمەن گريگوريان قازاقستاندىق ارىپتەسى عابيت بايجانوۆپەن تەلەفون ارقىلى سويلەسكەن. كەڭەس حاتشىسىنىڭ ءباسپاسوز حاتشىسى ارەگ كوچينياننىڭ حابارلاۋىنشا، تاراپتار قاراعاندىداعى وقيعانى تالقىلاعان.

ارمەن گريگوريان "قازا بولعان جىگىتتىڭ تۋىستارىنا كوڭىل ايتقان".

ەكى ەلدىڭ دە قاۋىپسىزدىك كەڭەسىنىڭ حاتشىلارى تۇرمىستىق وقيعاعا ۇلتارالىق ارازدىق سيپات بەرۋگە بولمايتىنىن اتاپ وتكەن.

گريگوريان مەن بايجانوۆ "قىلمىستىق ءىس جان-جاقتى ءارى اشىق تەكسەرىلىپ، كىنالىلەردىڭ ءبارىن تەك زاڭ اياسىندا جاۋاپقا تارتۋ ماڭىزدى" دەگەن. بۇعان قوسا، ەكى ەل ءوزارا تۇراقتى بايلانىس ورناتۋ قاجەت ەكەنىن ايتقان.

8 قاڭتاردا استانادا قازاقستان ىشكى ىستەر ءمينيسترىنىڭ ءبىرىنشى ورىنباسارى جانات سۇلەيمەنوۆ سەگىز ادام قامالعانىن، شەتكە قاشىپ كەتكەن ءبىر ادام ىزدەستىرىلىپ جاتقانىن ايتتى.

ونىڭ سوزىنشە، 14 ادام توبەلەسكەن. ولاردىڭ توعىزى - "درەۆني ريم" مەيرامحاناسىنىڭ قىزمەتكەرى. پىشاق جاراقاتىنان قازا تاپقان 23 جاستاعى ەر ادام مەيرامحاناعا كيكىلجىڭ شىققان كەزدە سەرىگىنىڭ شاقىرۋىمەن بارعان.

جانات سۇلەيمەنوۆتىڭ ايتۋىنشا، كيكىلجىڭ قاڭتاردىڭ 1-ىنە قاراعان ءتۇنى ساعات 4 شاماسىندا مەيرامحانا قىزمەتكەرلەرى كيلەنتتەرگە "مەيرامحانا جابىلاتىنىن ەسكەرتىپ، تاراۋدى سۇراعاننان كەيىن" شىققان. كيكىلجىڭ سوڭى توبەلەسكە ۇلاسقان. توبەلەس بولعانىن پوليتسياعا ساعات 4:40 شاماسىندا مەيرامحانا قىزمەتكەرلەرىنىڭ ءبىرى حابارلاعان.

بۇعان دەيىن ارمەنيا پرەمەر-ءمينيسترى مىندەتىن اتقارۋشى نيكول پاشينيان دا پىكىر ءبىلدىرىپ، وقيعانىڭ ۇلتارالىق سيپاتى جوق دەگەن.

جاڭا جىل ءتۇنى قاراعاندىداعى مەيرامحانالاردىڭ بىرىندە توبەلەس بولىپ، ءبىر ادام قازا تاۋىپ، ءتورت ادام جارالانعان. بارلىعى سەگىز ادام ۇستالعان. تاعى ءبىر ادام نارەك گۋرۋريانعا حالىقارالىق ىزدەۋ جاريالانعان. 6 قاڭتاردا قاراعاندىدا جۇزدەگەن ادام "قىلمىسكەردى" تابۋدى تالاپ ەتكەن. قاراعاندى وبلىسى اكىمى ەرلان قوشانوۆ ىزدەۋ جۇمىستارى ءجۇرىپ جاتقانىن ايتقان.

Abai.kz

25 پىكىر