حيسور شاھارىنىڭ 32 جاستاعى تۇرعىنى ديلشود جىلىنا ەكى رەت ميليتسيا بولىمشەسىنە بارىپ، تىركەلگەن مەكەن-جايدا تۇرىپ جاتقانىن ايتىپ، ەسەپ بەرىپ تۇرۋى كەرەك. «ءتارتىپ بويىنشا ميليتسيا قىزمەتكەرلەرى ەرتەرەك شاقىرتۋ جىبەرەدى. بارعان كەزدە ولار كەزەكتى رەت نە ىستەدىك، قايدا باردىق، مەدرەسەدە وقىپ جۇرگەندە قانداي ءبىلىم الدىق دەگەن سەكىلدى سۇراقتار قويادى. ولار وزدەرىن وتە مادەنيەتتى ۇستايدى»، - دەيدى ديلشود.

ديلشود ەگيپەتتە ءبىر جىلدان از ۋاقىت وقىپ كەلگەن. ول ءوزىنىڭ سونداعى ءال-ازحار ۋنيۆەرسيتەتىنە وقۋعا تۇسكىسى كەلگەنىن، 9 اي بويىندا اراب ءتىلىن وقىعانىن ايتادى. بىراق بيلىك وكىلدەرى ەلگە ورالۋدى تالاپ ەتكەن ەكەن.

2010 جىلدىڭ باسىندا تاجىكستان بيلىگى شەتەلدە ءدىني وقۋ ورىندارىندا وقىپ جۇرگەن جاستاردى وتانىنا ورالتۋ كامپانياسىن باستاعان. سول كەزدە ەل پرەزيدەنتى ەمومالي راحمون "ولار شەتەلدە مولدا ەمەس، تەرروريست بولىپ ورالادى" دەپ مالىمدەگەن.

تاجىكستاننىڭ ءدىني ىستەرى جونىندەگى كوميتەتتىڭ مالىمەتىنشە، يەمەندە، سيريادا، ەگيپەتتە، پاكىستاندا، اۋعانستاندا، يراكتا جانە يراندا زاڭسىز ءبىلىم العان 3 مىڭنان استام ازامات ەلگە قايتارىلعان.

بۇگىنگى كۇنى 300-گە جۋىق ادام شەتەلدە ءدىني وقۋ ورنىندا زاڭسىز ءبىلىم الىپ جاتىر ەكەن.

Abai.kz