جۋىردا رەداكتسيامىزعا شىعىس قازاقستاننان ەكى بىردەي حات كەلدى. پورتالدا جاريالاپ، شىعىستاعى جۇرتتىڭ ۇنىنە ءۇن قوسۋىمىزدى سۇراپتى. ءبىز حاتتىڭ مازمۇنىمەن تانىسىپ شىقتىق. مۇنداي ماڭىزدى ماسەلەدە الاشتىڭ التىن مىنبەرى بولعان Abai.kz پورتالى ءۇنسىز قالعان ەمەس، قالمايدى دا.

ءۇشبۋ حاتقا ورالايىق، ەكى حات تا شقو-نى باسقارىپ وتىرعان دانيال كەنجەتايۇلى احمەتوۆتىڭ اتىنا جولدانىپتى. ەندى سولاردى رەت-رەتىمەن جازايىق.

التايداعى اعايىن ەل قالا اتاۋىن ۋست-كامەنوگورسك دەگەن تىلگە بوتەن، كىرمە اتاۋدان ارىلتىپ، سەمەيدەگى اۋەجايعا ءاليحان بوكەيحان ەسىمىن بەرۋدى سۇراپتى.

ۋست-كامەنوگورسككە – قابانباي باتىردىڭ ەسىمى بەرىلسىن

اۋەلگى حات سەمەي ايماقتىق «اق جول» پارتياسىنىڭ توراعاسى راحات التايدان كەلدى. وندا ۋست-كامەنوگورسك دەگەن ورىسشا اتاۋدان ارىلىپ، قالاعا قابانباي باتىردىڭ ەسىمىن بەرۋدى سۇراپتى.

ۋست-كامەنوگورسك دەگەن ورىستىڭ اتاۋى ەكەنىن جاقسى بىلەسىزدەر. 1720 جىلى م.ليحارەۆ باستاعان رەسەيلىك ەكسپەديتسيا كەلگەن. ءسويتىپ، ءۇلبى وزەنىنىڭ ەرتىسكە قۇيعان جەرىندە ۋست-كامەنوگورسكايا دەگەن بەكىنىس سالادى. بۇل ءسوز «ۋستە كامەننىح گور» تىركەسىنەن الىنعان ەكەن. جەرگىلىكتى قازاقتار بۇل اتاۋدى وسكەمەن دەپ اتاپ كەتكەن. مىنە، راحات التاي باستاعان شىعىستاعى ءبىر قاۋىم ەل وسى ءبىر كىرمە اتاۋدان رۋحاني جاڭعىرۋ جىلىندا ارىلماعاندا، ەندى قاشان قۇتىلمامىز، دەپ وتىر.

سەمەيدەگى اۋەجايعا ءاليحان بوكەيحاننىڭ اتى بەرىلسىن

ودان كەيىنگى حات تا دانيال كەنجەتايۇلىنىڭ اتىنا باعىتتالىپتى. وندا الاشتىڭ استاناسى بولعان سەمەي قالاسىنداعى اۋەجايعا «الاشوردا» نەمەسە الاشوردا كوسەمى بولعان ءاليحان بوكەيحاننىڭ ەسىمىن بەرۋدى سۇراعان. حاتتىڭ مازمۇنى مىنە:

قۇرمەتتى دانيال كەنجەتايۇلى!

-ءسىز، قازاقستان رەسپۋبليكاسىنىڭ ۇكىمەتىن باسقارعان ساياسي تۇلعاسىز. شىعىس قازاقستان وبلىسىنا اكىم بولىپ حالىققا قىزمەت اتقارىپ جاتقانىڭىزعا دا ءبىراز ۋاقىت بولدى. وسى كەزەڭدە سەمەي قالاسىنىڭ اباتتانىپ، ەكونوميكاسىنىڭ دامۋىنا ۇنەمى قولداۋ كورسەتىپ كەلەسىز. وتكەن جىلى «الاش» پارتياسىنىڭ 100 جىلدىق مەرەكەسى قارساڭىندا ءسىزدىڭ قولداۋىڭىزبەن ءاليحان بوكەيحاننىڭ ەسكەرتكىشى قالامىزدا ورنادى. ەلباسى ن.ءا.نازارباەۆ تا «الاش ارىستارىنىڭ ەڭبەگىن حالىققا ناسيحاتتاۋ پەرزەنتتىك پارىزىمىز»، - دەپ بيىك مىنبەلەردەن نەشە مارتە ايتقانىنا حالىق كۋا. سەمەي قالاسىنىڭ اكىمىنىڭ ورىنباسارى ن.ۆ.شاروۆا حانىم سەمەي قالاسىنداعى اۋەجايعا ات بەرۋ تۋرالى ماسەلە بويىنشا ەل اعالارىن كەڭسەسىنە شاقىرىپ كەڭەس وتكىزدى. جينالعاندار سەمەي، اباي، ءاليحان بوكەيحان، الاش وردا اتاۋلارىن ايتىپ پىكىر ءبىلدىردى. ماجىلىسكە قاتىسۋشىلاردىڭ باسىم كوپشىلىگى «الاش وردا» نەمەسە ءاليحان بوكەيحان اتىنداعى اۋەجاي بولىپ اتالسىن دەگەن ۇسىنىس ءبىلدىردى. بۇل ۇسىنىستى ءبىز دە قولدايمىز. اۋەجايعا الاش وردا نەمەسە ءاليحان بوكەيحاننىڭ اتى بەرىلگەنىن قالايمىز.

حاتقا قول قويعاندار:

نۇرقاسىم ق. – الاش ارىستارى قوعامدىق قورىنىڭ توراعاسى;

گورەلنيكوۆ يا.ۆ. – ف.م.دوستوەۆسكي اتىنداعى ورىس دراما تەاترىنىڭ ديرەكتورى;

تۋلەكوۆ ب.ح. – اباي اتىنداعى قازاق مۋزىكالى-دراما تەاتىرىنىڭ ديرەكتورى;

بەيسەنباەۆ س. – «اقىلداستار» اۋىل ارداگەرلەرى قوعامدىق بىرلەستىگىنىڭ توراعاسى;

ارعىنعازين د.س. – سەمەي قالالىق «قازاق ءتىلى» قوعامىنىڭ توراعاسى;

راحات التاي – سەمەي ايماقتىق «اق جول» پارتياسىنىڭ توراعاسى;

اديانوۆ ب.ت. – شىعىس قازاقستان وبلىستىق ماسليحاتىنىڭ دەپۋتاتى;

قۇسايىنوۆ ك.م. – سەمەي قالالىق ماسليحاتىنىڭ دەپۋتاتى;

رايىمبەك تەگى ك. – «دوستىق» ءۇيىنىڭ ارداگەرلەر كەڭەسىنىڭ توراعاسى;

سادىقوۆ م.م. – رەسپۋبليكالىق «اقجولتاي» گازەتىنىڭ جاۋاپتى حاتشىسى;

مەرەي قارت – قر جازۋشىلار وداعىنىڭ سەمەي وڭىرلىك فيليالىنىڭ توراعاسى.

Abai.kz