دۇيسەنبى, 19 تامىز 2019
1377 9 پىكىر 11 اقپان, 2019 ساعات 13:29

تۇركيا قىتايدان لاگەرلەردى جابۋدى تالاپ ەتتى

رەسمي انكارا قىتايدان شىڭجاڭداعى "ساياسي تاربيەلەۋ ورتالىقتارىن" جابۋدى تالاپ ەتتى. تۇركيا سىرتقى ىستەر مينيسترلىگىنىڭ 9 اقپاندا جاريالاعان مالىمدەمەسىندە شىڭجاڭداعى لاگەرلەردە قامالعاندار "ازاپتاۋ كورىپ جاتىر" دەگەن.

تۇركيا سىرتقى ىستەر مينيسترلىگىنىڭ وكىلى حامي اكسوي "ميلليوننان استام ۇيعىر ازاپتاۋ ورتالىقتارىندا قامالعانى قازىر قۇپيا ەمەس. قاماۋعا الىنباعاندار قىسىمعا ۇشىراپ جاتىر. قىتاي بيلىگىنىڭ 21 عاسىردا لاگەر اشۋى جانە ۇيعىرلاردى قۋدالاۋى - ادامزاتقا جاسالعان قارسى ارەكەت" دەگەن.

تۇركيا شىڭجاڭداعى جاعدايعا بۇۇ جەدەل ارالاسۋى كەرەك دەپ سانايدى.

شىڭجاڭ ايماعىنداعى لاگەرلەر جايلى العاش رەت 2017 جىلدىڭ كوكتەمىندە ايتالا باستاعان. بۇۇ شىڭجاڭداعى "ساياسي تاربيەلەۋ ورتالىقتارىندا" ميلليونعا جۋىق ادام "ەركىنەن تىس" قاماۋدا وتىرعانىن مالىمدەگەن.

قىتاي ۇكىمەتى باسىندا بۇل ورتالىقتاردىڭ بارىن جوققا شىعارىپ كەلدى. كەيىن پەكين قىسىمدى "ەكسترەميزمگە قارسى شارا" دەپ مالىمدەدى جانە "قامالعاندار ءتىل ۇيرەنىپ، كاسىپ مەڭگەرىپ شىعاتىنىن" ايتتى.

قازاقستانداعى قازاقتار دا الماتىدا بىرنەشە رەت جيىن وتكىزىپ، قىتايداعى جاقىندارىنىڭ جاپپاي قامالىپ جاتقانىن ايتقان. ولار قازاقستان بيلىگىنەن، حالىقارالىق ۇيىمداردان كومەك سۇراعان.

بىلتىر جەلتوقساننىڭ سوڭىندا پەكين بىرنەشە ەلدىڭ ەلشىلەرىن شىڭجاڭعا اپارىپ، “ساياسي تاربيەلەۋ ورتالىقتارىن” كورسەتكەن. لاگەرگە بارعانداردىڭ اراسىندا قازاقستان ەلشىلىگىنىڭ قىزمەتكەرى دە بار. ول شىڭجاڭداعى ساياسي تاربيەلەۋ ورتالىعىندا "جاعدايدىڭ جاقسى" ەكەنىن ايتقان.

Abai.kz

9 پىكىر