بۇرىن باعىمىزدى بايلاپ كەلگەن قوس ءتىلدى تەڭگەنىڭ قازاقتانۋى استارىندا ۇلكەن ساياسات بار. ونىڭ ءبىرى – لاتىن جازۋىنىڭ ەنۋى بولسا، ەكىنشىسى -  رەسەي ءرۋبلىنىڭ قۇنسىزدانۋىنىڭ كەسىرى تيۋدەن قۇتقاراتىن دەنوميناتسيا.

حالىقتىڭ اشۋ ىزاسىن باسۋ ءۇشىن بيلىكتىڭ تەڭگەنى ءارى قازاقتاندىرىپ، ءارى دەنوميناتسيالاۋ قادامىنا امالسىز بارعالى وتىرعانىن الپاري اقپاراتتىق-اناليتيكالىق ورتالىعىنىڭ ديرەكتورى الەكساندر رازۋۆاەۆ ءبىرىنشى بولىپ ءسوز ەتتى  (https://dknews.kz/ekonomika/stoit-li-kazahstanu-zadumatsa-o-denominaci). الەمدىك ەكونوميكالىق تەوريا بويىنشا دەنوميناتسيا ينفلياتسيا 10% قۇراعاندا قولعا الىنادى. رەسمي دەرەكتەرگە سەنەر بولساق، ساعىنتاەۆ ۇكىمەتىنەن قالعان مۇرانىڭ ءبىرى ەلىمىزدەگى جىلدىق ورتاشا ينفلياتسيا 5,2% قۇراسا، بيىلعى جىلدىڭ سوڭىندا –4-6% بولادى دەپ جوبالانۋدا. بۇنداي شىعارىپ سالما ەسەپتەۋلەرمەن كۇن سايىن باعانىڭ وسۋىنە كوزى ۇيرەنگەن، قانى قارايعان حالىقتى ەشكىم الداي المايدى.

ۇلتتىق اقشاسىنا دەنوميناتسيا جاساۋ ەۋرازيا كەڭىستىگىندەگى رەسەيدە 1998 جىلى ال، بەلورۋس ەلىندە  2016 جىلى ورىن الدى.

ەگەر حالىقتىڭ الەۋمەتتىك بەلسەندىلىگىن تومەندەتۋگە باعىت ۇستانعان دەنوميناتسيا جۇرگىزىلسە، وندا دوللار – 3,76 تەڭگە، ەۋرو – 4,26 تەڭگە، ال رۋبل – 5,74 تيىن بولادى دەگەن پىكىر العا تارتىلا باستادى. ءارى بۇل قادام قازاقستاننىڭ رەسەي ىقپالىنسىز، ورتالىق ازيا ەلدەرىنىڭ كوشباسشىسىنا اينالۋىنداعى العاشقى ەكونوميكالىق تالپىنىسى دەيدى ءبىزدى وزىمىزدەن دە جاقسى بىلەتىن ورىستىڭ ساراپشىلارى.

ەگەر وسى تەڭگەگە جاسالاتىن «دەنوميناتسيا دەرتىمىزگە داۋا بولا ما؟» اۋىر سۇراق سانامىزدى مازالايدى.

ءابىل-سەرىك الياكپار

Abai.kz