سەيسەنبى, 18 اقپان 2020
بىرلىك 2314 23 پىكىر 28 اقپان, 2019 ساعات 15:23

شەرزود پۋلاتوۆ. "قازاق ۇلتىنا العىس ايتامىن"

ەلىمىزدە اشىق اسپان استىندا ىنتىماعىمىز جاراسىپ، تاتۋ-ءتاتتى ءومىر ءسۇرىپ جاتقانىمىز ءۇشىن جاراتۋشىعا شۇكىرشىلىگىمىزدى بىلدىرەمىز. قازاقستانداعى بارشا ۇلتتاردىڭ باسىن قوسىپ، ءبىرتۇتاس حالىققا اينالدىرىپ وتىرعان ەلباسىنا العىسىمىز شەكسىز. بۇل كۇنى بارشا وتانداستارىمىز قايىرلى ىستەرگە ۇلەسىن قوسىپ، ءبىر-بىرىنە راقمەتىن ايتىپ، جاقسى نيەتىن بىلدىرەدى. بىرەگەيلىگىمىزدىڭ باستى نىشانى – دوستىعىمىز بەن بىرلىگىمىز ماڭگى بولسىن!   

جالپى العىس ايتۋ دەگەن جاي عانا سوزبەن شەكتەلىپ قالماي، ونى جۇمىسىمىزبەن كورسەتە ءبىلۋىمىز كەرەك. ياعني ءاربىر جاساعان جاقسىلىق ول ناتيجەلى بولعانى دۇرىس دەپ ەسەپتەيمىن. قازىرگى تاڭدا ءار ادام ءوزىنىڭ ءhال-قارەكەتىنشە شىنايى ىقىلاسپەن جاساپ ءجۇر. مەنىڭ باعىتىم عىلىم-ءبىلىمنىڭ الاڭىندا بولعان سوڭ، كوبىنە كوپ وسى باعىتتا ءبىلىمىمدى ودان ءارى شەت مەملەكەتتەردە شىڭداپ، تەرەڭدەتۋدەمىن. ونىمەن توقتاپ قالماي، العان ءبىلىمىمدى ەلگە كەلىپ ءار ءتۇرلى سالاداعى اۋديتوريالارعا دارىستەر وقىپ، تاجىريبەمدى جەتكىزۋدەمىن. سونىمەن قاتار ءوزىمنىڭ كىتاپ قۇمارلىعىمنىڭ ارقاسىندا، ەلدەگى جارىققا شىعىپ جۇرگەن عىلىمي ەڭبەكتەرگە، كىتاپتارعا جانە مونوگرافيالارعا ۇلەس قوسىپ كەلەمىن. جانە ونىمەن توقتاپ قالماي بيىلعى ءبىر جاڭالىعىم رەتىندە ايتارىم، كوپ جىلداردان بەرى كىتاپ جازۋدى قولعا الىپ، بىرنەشە ەڭبەكتەردىڭ باسىن قوسىپ، جاقسى ءبىر تۋىندىنى وقىرمانعا جول تارتپاقشىمىن.

ومىرىمدەگى اسەرلى ءسات، مەن شەت ەلدەن وقىپ كەلگەن كەزدە جامبىل وبلىسى تالاس اۋدانىنىڭ سالىق كوميتەتىندە زاڭگەر بولىپ جۇمىس ىستەۋگە بارعان بولاتىنمىن. سول جەردەگى جەرگىلىكتى حالىقتىڭ مەنى وتە جىلى قابىلداعانى سونشالىقتى، قاراتاۋلىق دوستارىم پاتەردە تۇرۋعا قالدىرماي، ءوز ۇيلەرىنە الىپ كەتتى. ءسويتىپ مەن سول ءۇيدىڭ بالاسىنا  اينالىپ، بۇگىنگى تاڭدا جاقىن باۋىرعا اينالدىق. مۇنىمەن مەنىڭ ايتپاعىم قازاق حالقىنىڭ كەڭ پەيىلدى، دارحان مىنەزدى قاسيەتتەرى مەنىڭ جۇرەگىمدى باۋراپ العاندىعىن جەتكىزگىم كەلەدى.

سونداي-اق جوعىرادىعى ايتقان سوزدەرىمنىڭ تاعى ءبىر ايقىندايتىن بولسام، تاريح بەتىندەگى دەپورتاتسيالانعان باسقا ەتنوستار وزدەرىنىڭ قۇشاق جايا قارسى العان قازاق جەرىنە شەكسىز العىستارىن كوز جاستارىمەن جەتكىزۋدە. مۇنى ودان ءارى كەيىنگى ۇرپاققا ونەگەلى وسيەتكە جالعاستىرىپ كەلەدى.

ەلباسى ن.ءا.نازارباەۆ: «قازاقستان حالقى اسسامبلەياسى قۇرىلعان كۇن – 1 ناۋرىزدى جىل سايىن بارلىق ەتنوستاردىڭ ءبىر بىرىنە جانە مەيىرباندىق تانىتىپ، ول ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋ ادىلەتتى بولار ەدى. ول كۇن ءبىزدى بۇرىنعىدان دا گورى جاقىنداستىرا تۇسپەك. بۇل كۇن مەيىرىمدىلىكتىڭ، بۇكىل قازاقستاندىقتاردىڭ ءبىر بىرىنە دەگەن دوستىعى مەن ماحابباتىنىڭ جارقىن مەرەكەسى بولا الار ەدى»، – دەگەن بولاتىن. وسىنى العا تارتا كەلە "نۇر وتان" پارتياسى "پويتاح" باستاۋىش ۇيىمىنىڭ توراعاسى رەتىندە كوپتەگەن جۇمىستاردى قولعا الدىق. ماسەلەن، جاس ۇرپاققا ۇلگى بەرەتىن تاربيەلى شارالارعا كوپتەپ  ءمان بەرەمىز. ەلىمىزدەگى قاريالارىمىز بەن ارداگەرلەردى قۇرمەتتەپ، ولارعا شەكسىز العىسىمىزدى امالمەن كورسەتەمىز.

ءسوزىمدى ءتامامداي كەلە، باۋىرمال قازاق حالقىنىڭ قۇشاق اشقان كەڭ جۇرەگىنە بارشا ەتنوستارمەن بىرگە ءوزىمنىڭ ريزاشىلىعىمدى جەتكىزەمىن. العىس ايتۋ كۇنىن مەرەكەلەي وتىرا، ءاربىر كۇنىمىزدى ارەكەتىمىز ارقىلى العىس تاپ وتىرساق بۇل دا ءبىر عانيبەت بولادى. العىستان العىسقا جەتە بەرەيىك.

شەرزود پۋلاتوۆ، قازاقستان حالقى اسسامبلەياسىنىڭ عىلمي-ساراپشىلىق كەنەسىنىڭ مۇشەسى، نۇر وتان پارتياسىنىڭ مۇشەسى، استانا قالاسى وزبەك ەتنومادەني ورتالىعىنىڭ توراعاسى.

Abai.kz

23 پىكىر