جۇما, 29 ناۋرىز 2024
مىنە، اڭگىمە! 4302 29 پىكىر 18 ناۋرىز, 2019 ساعات 09:06

ديماشتىڭ مارتتىگىنە الەم ءسۇيسىندى، بىراق قازاق ءۇنسىز...

ماڭدايىمىزعا بىتكەن جالعىز جارىق جۇلدىزىمىز—ديماش قۇدايبەرگەندى جۇمىر جەردىڭ بارلىق تۇكپىرىندەگى ەل بىلەدى. ونىڭ ەشكىم قايتالاي الماس ساف التىنداي ونەرىنىڭ قىر-سىرىن وسى پورتالدا باسىلىپ جاتقان بەلگىلى جازۋشى ماقسات ءتاج-مۇراتتىڭ كىتابىندا تەرەڭنەن تالدانىپ، جان-جاقتى سارالانعان. بۇل ءۇشىن اۆتورعا ۇلكەن راحمەت دەمەسەك، وعان قوسىپ-الارىمىز جوق.

ال ءبىزدىڭ ايتپاعىمىز وسى ءبىر اسىل قازىنامىزعا اينالعان ءىنجۋ-مارجانىمىزبەن نەگە ماقتانا المايتىنىمىز  حاقىندا بولماق. قازىر بۇكىل دۇنيە ءجۇزى ونىڭ ايداي الەمدى اۋزىنا قاراتقان امەريكادا ءوتىپ جاتقان «الەمنىڭ ۇزدىگى» (The World`s Best) اتتى كونكۋرستان سانالى تۇردە باس جۇلدەدەن باس تارتىپ، بۇل سىناق سورەسىنە قوس بىردەي جاس جەتكىنشەك - ءوزىمىزدىڭ دانەليا مەن ينديالىق جاس تالانت - ليديانعا جول بەرەتىنىن مالىمدەگەنى قىزۋ تالقىلاپ جاتىر. شىندىعىندا دا بۇل ناعىز ەرلىككە پار-پار شەشىم ەدى.

ديماش بۇكىل الەمگە قازاقتىڭ تەكتىلىگى مەن تەك قازاعىمىزعا عانا ءتان ۇلكەندەردىڭ وزىنەن كەيىنگىلەرگە جول بەرەتىن مارتتىگىن جارقىراتا تانىتتى. مۇنداي قادامعا مىڭداعان، ميلليونداعان، ءتىپتى ميللياردتاعان جانداردىڭ ىشىندە بارا الاتىن ادام مۇلدەم سيرەك ەدى. مەنىڭ ءوزىم اتاعى جەر جاراتىن انشىلەردىڭ ىشىندە مۇنداي جومارتتىق جاساعان جاندى كەزدەستىرگەن دە، ەستىگەن دە ەمەسپىن. بۇعان شىندىعىن ايتقاندا قاراپايىم جۇرت تۇگىلى، سول باسەكەنىڭ تاعدىرىن شەشىپ وتىرعان، 50 ەلدەن سۇرىپتاپ الىنعان  قازىلار القاسىنىڭ ءوزى تاڭ قالىپ، كەيبىرەۋلەرى ءتىپتى تۇسىنە دە المادى. اسىرەسە، ديماشتى ۇنەمى كوتەرمەلەپ، ىلعي ءبىر اسا  جوعارى باعا بەرىپ وتىرعان باس قازىنىڭ ءبىرى رۋ پول قاتتى رەنجىگەن سىڭايلى. ايگىلى ءارتيستىڭ بۇلايشا قاپا بولۋى ءبىز ءۇشىن تاڭقالارلىق جاعداي بولعانىمەن، قانداي دا باسەكەدە جەڭىس ءۇشىن ەشكىمدى دە، ەشتەڭەنى دە ايامايتىن، سول جولدا قانداي دا قۇرباندىقتان تارتىنبايتىن قاعيداعا قاتتى سۇيەنەتىن امەريكا سەكىلدى ەلدە قالىپتى جاعداي دەسە دە بولعانداي. رۋ پولدىڭ ديماشتى جەڭىستىڭ شىرقاۋ شىڭىنا شىعىپ، جۇرتتىڭ ءبارىنىڭ سۇيسىنە قول شاپالاقتاعان ءساتىن ءبىر كورگىسى  كەلگەن شىعار؟ ول دا پەندە عوي. ول دا ديماشقا ەلدەن ەرەكشە قۇرمەتىن وسىلايشا تانىتىپ، ونىڭ جۇلدىزدى ءساتىن تاماشالاۋدى ارماندادى ما ەكەن؟

ال شىندىعىندا دا، وزگەسىن بىلاي قويعاندا باس جۇلدە وسال ەمەس ەدى، تۋرا 1 ميلليون اقش دوللارى. مۇنداي قولاقپانداي قارجى ديماشقا دا ارتىق ەتپەس ەدى. شوۋ-بيزنەس دەگەن دۇنيە كىم-كىمگە دە تىم قىمباتقا تۇسەدى. ءبىر كونتسەرتىنىڭ وزىنە ميلليونداعان قارجى كەتەدى. وعان قاتىساتىن وركەسترگە، بيشىلەر توبىنا لايىقتى اقشا تولەپ، ساحنانى بەزەندىرۋ دەگەنىڭىز دە قىپ-قىزىل اقشا. الەمدىك ساحناعا ەندى عانا قادام باسقان ديماشقا بۇل اقشا قولتىعىنان دەمەپ جىبەرەر مە ەدى، كىم ءبىلسىن. دەگەنمەن، ديماش ماتەريالدىق قازىنادان گورى رۋحاني قازىنانىڭ جوعارى ەكەنىن بارشا الەمگە تانىتتى. مۇنىڭ ءبىر سىرى ونىڭ قاشاندا قازاقتىڭ قارا شاڭىراعىنىڭ اسىل قاسيەتىن بويىنا سىڭىرگەن اجەسىنىڭ تاربيەسىنەن تۋىنداعاندىعىنان دەپ بىلدىك.

مىنەكەي، ءبىز ديماشتىڭ مۇنداي ەرەكشە شەشىمىن جوعارى باعالاپ جاتقان جانداردىڭ قازىر بۇكىل عالامتوردى جاۋلاپ العانىن ايتىپ وتتىك. ءبىزدى تاڭ قالدىرعانى ول ەمەس. ءبىزدىڭ سانامىزدى جاۋلاپ العان سان ساۋالدىڭ ىشىندە «مۇنداي قادامعا ديماشتىڭ ءوز ەلى نەگە قۋانا المايدى؟» دەگەنى جانىمىزدى جاي تاپتىرماي وتىر. بىزدەگى انشەيىندە كىمنىڭ نە العانىن، كىم كىمگە قانداي سىي-سياپات كورسەتكىنىن تاپتاشتەپ ايتىپ، جاعى تالمايتىن بلوگەرلەرىمىز نەگە اۋزىن بۋعان وگىزدەي ءۇنسىز؟ الدە ولار ءۇشىن ديماشتىڭ قازاقتىڭ تەكتىلىگىن تانىتقان شەشىمى ەمەس، «كىمنىڭ ءوز تۋعان كۇنىندە جان-جاققا قانشا اقشا شاشتى، بولماسا كىم قانداي قىمبات كولىكتى يەلەندى، كىم كىمگە اسىل جۇزىك سىيلاپتى» دەگەن قىسىر اڭگىمەدەن قولدارى بوساماي جاتىر ما؟ بۇلار نەگە قازاقتىڭ بالاسىنىڭ مارتتىگىن بىلايعا جۇرتقا قۋانا حابارلاپ،  «قازاق دەگەن وسىنداي حالىق» دەپ نەگە ماساتتانباسقا؟ بۇل جايدى ءبىز ەمەس، الدىمەن انا بەلورۋستىڭ بلوگەرى جان سودەل، بولماسا رەسەيدىڭ پەتەربۋرگ قالاسىنان بەرىلەتىن «ەحو پەتەربۋرگا» اتتى تەلە حابارى تەزىرەك بەرۋگە جانتالاسىپ جاتىر؟ بۇعان ءبىزدىڭ نامىسىمىز كەلمەي مە؟ الدە كەزىندە اباي حاكىمنىڭ ءوزى ايتىپ كەتكەن كورەالماۋشىلىق پەن قىزعانشاقتىقتىڭ قىزىل ءيتى بوي بەرمەي كەتتى مە؟

مۇنى ايتۋ دا، جازۋ دا ماعان وڭاي ەمەس شىعار، الايدا ديماشتاي اسىلدى ناسيحاتتاۋدا قازاق بلوگەرلەرى تاسادا قالىپ، پەندەشىلىكتەن اسا المادى. وعان قاراعاندا عالامتوردا ءبىردى-ەكىلى بولسا دا ورىس ۇلتىنىڭ وكىلى مەن ءوزىمىزدىڭ ءورىستىلدى باۋىرلارىمىز عانا وزگەلەرمەن قاتار اتسالىسىپ ءجۇر. ال ەندى اناۋ التى قۇرلىقتىڭ بارلىعىندا دا دەرلىك ديماشتىڭ بىزدەن باسقا جانكۇيەرلەرى جەتكىلىكتى. مىڭداپ ەمەس، ميلليونداپ سانالادى. ءتىپتى امەريكادا ءبىر ءبۇلدىرشىننىڭ ديماشتى تىڭداۋعا اكەسىن سۇيرەلەپ اكەلەتىنىن، ال مىنا كورشىمىز رەسەيدە وسىنداي ءبىر بالانىڭ ءوز اجەسىن ديماشتىڭ جانكۇيەرىنە اينالدىرعانىن كورگەندە ءوزىمىز ءۇشىن جەرگە كىرىپ كەتكەندەي كۇي كەشتىك. انا كورەي جۇرتىنىڭ بەلگىلى ءانشىسىنىڭ «مەن ديماش سەكىلدى ايتا المايمىن. مەندە ونداي داۋىس جوق» دەپ اعىنان جارىلعانىنىڭ دا كۋاسى بولدىق. ال ءبىزدىڭ تويدىڭ دەڭگەيىنەن اسا المايتىن، الايدا ءوزىن جۇلدىز سانايتىن ءانشىمىزدىڭ قايسىسى وسىلاي دەپ اعىنان جارىلا الار ەدى؟ ۇلكەن كۇمانىم بار. ويتسە تاعىنان ءتۇسىپ قالاتىن شىعار. الدە تويدان تاباتىن تابىسى ازايىپ كەتە مە؟ مەن بۇل جەردە ءتىپتى ديماشتىڭ سىيقىرلى ءۇنىن ەستۋ ءۇشىن سوناۋ امەريكادان، ەۋروپادان  ات ارىلتىپ كەلەتىن مىڭداعان جانكۇيەرلەرى جايلى ءتىپتى اۋىزعا الىپ وتىرعان جوقپىن.

ءبىز نەگە وسىندايمىز. بىرەۋدىڭ تابىسىنا، جەتكەن جەتىستىگىنە قۋانا بىلمەۋ دە سىرقاتتىڭ ءبىر ءتۇرى شىعار. ال ول سىرقات بولسا، ونىڭ ەمى قانداي؟

ارينە، ءدال قازىر ديماش ءبىزدىڭ قولداۋىمىزعا مۇقتاج ەمەس تە شىعار. ول الەمدىك دەڭگەيدەگى قايتالانباس تالانت.  كۇنى ەرتەڭ ناۋرىز مەرەكەسىندە ماسكەۋدىڭ تورىندە وتەتىن جەكە كونتسەرتىندە دە رەسەي جۇرتى عانا ەمەس، جۇمىر جەردىڭ بارلىعىنداعى جانكۇيەرلەرى ونىڭ ونەرىنە تاعى ءبىر سۋسىنداپ، قۇمارى قانارى راس. ودان سوڭ  عالامتوردا ىستىق لەبىزدەر مەن سىرلى سەزىمدەردىڭ تاعى دا ءدۇر ەتەرى اقيقات. ءبىزدىڭ انشەيىندە اۋىز جاپپاس بلوگەرلەرىمىز  بۇل جولى دا ءۇنسىز قالار ما ەكەن؟

ال ءبىز قايمانا قازاق رەتىندە ديماشتىڭ ماسكەۋدەگى جەكە كونتسەرتىنە اقجول تىلەۋمەن وسى ويىمىزدى تۇيىندەۋدى ءجون كوردىك. ءبىزدىڭ سىيىمىز وسى بولسىن.

جايبەرگەن بولاتوۆ

Abai.kz

 

   

29 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2277
عيبىرات

قايسار رۋحتى عازيز جان

مۇحتار قۇل-مۇحاممەد 3594