قر پرەزيدەنتى قاسىم-جومارت توقاەۆ قازاقستان حالقىنا انت بەردى، - دەپ حابارلايدى اباي-اقپارات.

انت بەرۋ ءراسىمى ءماجىلىس عيماراتىندا قازاقستان پارلامەنتى پالاتالارىنىڭ جالپى وتىرىسى بارىسىندا ءوتىپ جاتىر.

"قازاقستان حالقىنا ادال قىزمەت ەتۋگە، كونستيتۋتسيا مەن قازاقستان رەسپۋبليكاسىنىڭ زاڭدارىن قاتاڭ ساقتاۋعا، ازاماتتاردىڭ قۇقىعى مەن بوستاندىعىنا كەپىل بەرۋگە، قازاقستان رەسپۋبليكاسىنىڭ پرەزيدەنتى رەتىندە جۇكتەلگەن مىندەتتەردى ادال اتقارۋعا سالتاناتتى تۇردە انت بەرەمىن", - دەدى قاسىم-جومارت توقاەۆ.

بۇل ءىس-شاراعا پارلامەنت دەپۋتاتتارى، كونستيتۋتسيالىق كەڭەستىڭ مۇشەلەرى، جوعارعى سوت سۋديالارى، ۇكىمەت مۇشەلەر، شەتەلدىك ەلشىلەر، سونداي-اق، قازاقستاننىڭ تۇڭعىش پرەزيدەنتى قاتىسىپ جاتىر.

ەسكە سالايىق، 19 ناۋرىزدا نۇرسۇلتان نازارباەۆ وكىلىتتىگىن توقتاتقانىن مالىمدەگەن بولاتىن. بۇل تۋرالى ول رەسپۋبليكالىق تەلەارنالار ارقىلى قازاقستان حالقىنا ارنالعان مالىمدەمەcىندە ايتتى. پرەزيدەنت كەلەسى سايلاۋ مەرزىمىنە دەيىن وكىلەتتىگىن سەنات توراعاسىنا تاپسىردى.

نۇرسۇلتان نازارباەۆ قازاقستاندى باسقارۋدى سەنىپ تاپسىرا الاتىن ادام توقاەۆ ەكەنىن ايتىپ ءوتتى.

" قاسىم-جومارت توقاەۆ - ماسكەۋ مەملەكەتتىك حالىقارالىق قاتىناستار ينستيتۋتىنىڭ تۇلەگى، اعىلشىن، قىتاي جانە فرانتسۋز تىلدەرىن مەڭگەرگەن. ەلىمىزدىڭ باسقارۋشى لاۋازىمىندارىندا ۇلكەن ەڭبەك ءوتىلى بار، ەلىمىزدىڭ سىرتقى ساياساتى قالىپتاسۋ كەزىندە سىرتقى ىستەر ءمينيسترى بولدى. ۆيتسە-پرەمەر، مينيستر جانە پرەمەر-مينيستر، سەنات توراعاسى قىزمەتتەرىن اتقاردى. ەلىمىزدى بىلەدى، ونىڭ ەكونوميكاسىن، ساياساتىن بىلەدى، بۇۇ باس حاتشىسىنىڭ ورىنباسارى بولىپ جۇمىس ىستەدى", - دەگەن ەدى نازارباەۆ 19 ناۋرىزدا تەلەارنالار ارقىلى ايتقان مالىمدەمەسىندە.

سونداي-اق، نازارباەۆ توقاەۆتىڭ ادال جانە جاۋاپكەرشىلىگى بار ادام ەكەنىن ايتتى.

قاسىم-جومارت توقاەۆ 1953 جىلى 17 مامىردا الماتىدا دۇنيەگە كەلگەن. قازاقستاننىڭ مەملەكەت جانە قوعام قايراتكەرى، ساياسي عىلىمدار دوكتورى، قازاقستان رەسپۋبليكاسىنىڭ بۇرىنعى پرەمەر-ءمينيسترى (1999-2002), 2013 جىلدىڭ 16 قازانىنان باستاپ قر پارلامەنتى سەناتىنىڭ توراعاسى قىزمەتىن اتقاردى.

Abai.kz