جۇما, 29 ناۋرىز 2024
بيلىك 6093 10 پىكىر 29 ناۋرىز, 2019 ساعات 09:33

ديماش جانە قازاق مادەنيەتىنىڭ ينتەگراتيۆتىك مودەلى

بۇگىندە الەمدىك دارەجەدەگى العاشقى قازاق ءانشىسى اتانىپ جۇرگەن ديماش قۇدايبەرگەننىڭ حالىقارالىق دەڭگەيگە كوتەرىلگەنىنە ەكى جىلدان ارتىق ۋاقىت وتسە دە، ول تۋرالى اقىن وڭايگۇل تۇرجانوۆانىڭ كىتاپشاسىنان باسقا تەرەڭنەن قۋزاعان تياناقتى دۇنيە، ءتىپتى قازاقستان كولەمىندە مۋزىكاتانۋشىلىق ماقالا جازىلا قويعان جوق. ەسسەيست جازۋشى ماقسات ءتاج-مۇرات وسى ولقىلىقتىڭ ورنىن تولتىرۋ ماقساتىندا «ديماش. كوگدا جاجدۋت كريكا» اتتى كىتاپ جازىپ ءبىتىردى. ءبىز وقىرمان نازارىنا سول كىتاپتىڭ قازاق تىلىنە اۋدارىلعان «جەر الەمدى شارلاعان قازاق ءانى» دەيتىن تاراۋىن ۇسىنۋدى جالعاستىرامىز. 

(جالعاسى. باسى مىنا سىلتەمەلەردە: «باعى بارمەن تالاسپا»تەڭىز تۇپتەن تەبىرەنەدى،ديماشتىڭ داۋىسى جانە الەمنىڭ 47 ەلىندەگى بەيتانىس تانىستار), ديماشتىڭ ديناميكالىق كونسەرۆاتيزمى، «قىر بالاسى قول سوزادى اسپانعا»...

ءيا، قازاقستانعا قوش كەلدىڭىز..

ديماشتىڭ جوعارىدا ءبىز شەتىن باسىپ قانا وتكەن ديناميكالىق كونسەرۆاتيزمى ەلىمىزدەگى بۇگىنگى ەسترادانىڭ جاعدايىنا، كەڭ كولەمدە العاندا مادەني كەڭىستىگىمىزگە قانشالىقتى اسەر بەرىپ وتىر دەگەن ماسەلە ءوز زەرتتەۋشىسىن كۇتىپ تۇر. وعان جەكەلەگەن تىڭداۋشىلار بولماسا، ساراپشىلار مەن ماماندار جەتكىلىكتى نازار اۋدارا قويعان جوق. بۇل ءوزى شىنتۋايتىندا، قولمەن قويعانداي تۇستەپ ايتىپ بەرۋگە كەلمەيتىن شەتىندەۋ قۇبىلىس تا. سەبەبى، بۇگىنگى كۇنى ەلىمىزدىڭ مۋزىكا سالاسىندا، جوعارىدا كەلتىرگەنىمىزدەي، بارشانى تاڭقالدىرىپ ۇستەمەلەتە شىعىپ جاتقان تالانتتى جاڭا ەسىمدەردى ديماشپەن عانا بايلانىستىرىپ ايتۋعا دالەل جەتكىلىكسىز. ايتتى-ايتپادى، ديماشتىڭ ءوزى دە وعان دەيىن بەلگى بەرە باستاعان ءۇردىستىڭ — جاڭارۋ تەندەنتسياسىنىڭ ءتۇيىن سالۋى بولۋى مۇمكىن عوي، ال ونىمەن جەدەلدەس، تۇستاس، جالعاس شىققان دۇرمەك سول تولقىنداردىڭ سوقپا-سوقپاسى بولماسىنا كىم كەپىل.

وسى ورايدا اسكار اشەن دەيتىن جەلى پايدالانۋشىنىڭ: «ەلىمىزدىڭ مۋزىكا سالاسىندا تالانتتاردىڭ تابان استىندا قاۋلاپ شىعا كەلۋى استە كەزدەيسوق ەمەس. ءتىپتى 1990-شى جىلداردىڭ وزىندە بالالاردىڭ ۇلكەن ءبىر بولىگى ۆوكال، مۋزىكا، بەينەلەۋ، بي ونەرىمەن جۇيەلى تۇردە اينالىسىپ جاتقان-دى جانە ءتۇرلى ساتىداعى كونكۋرستار ءجيى وتكىزىلەتىن»، – دەگەن پىكىرى شىندىققا كەلەدى. ديماش تا وسى لەكتەن.

ونىڭ ءانشى، مۋزىكانت رەتىندەگى العاشقى دايىندىق ساتىلارىن قاراڭىز: احمەت جۇبانوۆ اتىنداعى مۋزىكا مەكتەبى جانىنداعى بالالار ستۋدياسىنىڭ فورتەپيانو ءبولىمى، قالالىق وقۋشىلار سارايى جانىنداعى بالالار حورى، «ساز» بالالار مەكتەبى، ا. جۇبانوۆ اتىنداعى مۋزىكالىق كوللەدجىنىڭ كلاسسيكالىق ۆوكال ءبولىمى، قازاق ۇلتتىق ونەر ۋنيۆەرسيتەتىنىڭ ەسترادا جانە دجاز ءبولىمى. التى جاسىندا «اينالايىن» ۇلتتىق كونكۋرسىنىڭ فورتەپيانو كاتەگورياسى بويىنشا ءبىرىنشى سىيلىعىنىڭ يەگەرى، ون جاسىندا بايقوڭىردا وتكەن جاس انشىلەر كونكۋرسىنىڭ لاۋرەاتى، وسىلاي-وسىلاي كەتە بەرەدى. ەسترادامىزداعى قازىرگى قاداۋ-قاداۋ تالانتتى دەپ جۇرگەن ارتيستەرىمىزدىڭ دەنى ۇلكەن ساحناعا وسىنداي ساتى-ساتى دايارلىق جۇيەسىنەن ءوتىپ كەلگەندەر. مىسالى، وپەراپوپ ستيلىندە ايتاتىن زارينا التىنباەۆا، باۋىرجان مۋسين، جۇلدىز ءۋاليحان، سۇندەت بايعوجين، ماقسات ماقۇلبەكوۆ، تاماشا ۆوكاليست پوپ-انشىلەر ساكەن مايعازيەۆ، ساكەن قالىموۆ، الىشەر كارىموۆ، جىگەر اۋپباەۆ، ەرگەن سەيتىمبەتوۆ، سينتي-پوپ وكىلى عالىمجان مولدانازار، ساندا، ادەمي (دينارا قايىروۆا), كەنتال، دينارا سۇلتان، دينارا قايىروۆا، دجاز ستيلىندەگى JCS, Motorolla توپتارى. بۇلار ۇلكەن ساحناعا شىققاننان كەيىن جوعارىداعى تولقىن تىنشىدى، سايابىرسىدى، ويتكەنى سانالى رەگرەسسانس ساياساتىمەن ادەيى جاسالدى ما، الدە دامۋدىڭ لوگيكالىق قيسىنى سولاي بولدى ما، ايتەۋىر ساتىلاپ دايارلاۋ جۇيەسىنىڭ جۇلىنىن ءۇزىپ، قۇردىمعا تاستاعاننان سوڭ ەسترادانى بۇرىن بولماعان قۇرعاقشىلىق جايلادى. سول باسى ءبۇتىن شوۋ بيزنەستىڭ قولىنا ءتيدى، ال شوۋبيز زاڭدىلىعىندا جوعارىداعىداي جۇيەدەن، مەكتەپتەن وتكەن تالانتتى العا جىلجىتۋ ءۇشىن مول قارجى، كوپ ۋاقىت كەرەك، ونىڭ ۇستىنە مەكتەپ، ۇلگى-ونەگە كورىپ وسكەن، سوعان ساي ءوز پرينتسيپتەرى قالىپتاسقان بۇل تالانتتار جىلدام رەيتينگتەر مەن ارزان تانىمالدىلىق ءۇشىن پيار-قۋلىقتارعا بارا بەرمەيدى. مىنە، وسىدان كەلىپ ەسترادادا بوس قۋىس پايدا بولدى دا، جۇمىرتقادان ءجۇن قىرىققان پروديۋسەرلەر الگى كەۋەك ورىندى بۇرىن اۋىل-ايماق كولەمىنەن اسا الماي كەلگەن، مەكتەپ كورمەگەن، كاسىبي دايارلانباعان تومەن دەڭگەيلى «ولەڭشىلەرمەن» تولتىردى. ارينە، سونىڭ وزىندە دە حالىق ءوز ىشىنەن تالانتتار شىعارماي تۇرا المادى جانە ونداي تالانتتار جالپى زاماناۋي ونەردىڭ دەموكراتيالىق سيپاتىنا وراي ەسترادانىڭ ءارتۇرلى باعىت، ارقيلى ءستيلى بويىنشا اراگىدىك بولسا دا توبە كورسەتتى. الايدا وسى ەكى ارادا جۇلىمىر پىسىقاي شوۋ بيزنەس حالىققا كۇنىگە ۋاقىتى وتكەن تاماق بەرۋ ارقىلى دەگەنىنە جەتتى – كوپ ۇزاماي-اق جۇرتتىڭ سۋرروگاتقا بوي ۇيرەتىپ العانى سونشا، ءانشىنىڭ ساحناعا نە ءۇشىن شىعاتىنىن ايىرۋدان قالدى.

وسىلايشا ەڭ تانىمال قازاق رەپەرى مەن بيتمەيكەرى ستريپتونيت ء(ادىل جالەلوۆ), تاعى ءبىر تالانتتى رەپ ايتۋشى جان كاليب (باحتيار مامەدوۆ), م-بەندتە ونەر كورسەتكەن اناتولي تسوي، باسقا دا وشاڭ ەتىپ باس كوتەرگەندەر ءوز جەرىنەن تىڭدارمان تابا الماي، اقىرى ماسكەۋگە كەتۋگە ءماجبۇر بولدى. ەندى ءبىر بولىگى ەلدە قالىپ، سەنىڭ جاندى داۋىستا ايتىپ تۇرعانىڭ دا، فونوگراممامەن ەرىن قيمىلداتقانىڭ دا ءبارىبىر توعىشار توبىردىڭ اراسىندا بەلگىسىزدىك كۇيىن باستان كەشىرۋگە ءماجبۇر. بىلايشا ايتقاندا، ولار ءوز ومىرلەرىمەن ەمەس، سول ومىرمەن قوسانجار باسقا ءبىر ءومىر ءسۇرىپ جاتقانداي. ديماشتىڭ داڭقى كۇننەن كۇنگە ارتىپ بارا جاتقان قازىرگىدەي كەزەڭدە حالىق اراسىندا «قازاقستاننىڭ بۇكىل شوۋ بيزنەسى جينالىپ ءبىر ديماشتىڭ تىرناعىنا تۇرمايدى» دەپ كەلەتىن پىكىرلەر ايتىلىپ قالادى. سول سياقتى رەسەيلىكتەردىڭ دە سانالى ءبىر بولىگى ديماش رەسەي ەستراداسىن قوقىستان، «پەنسيونەرلەردەن» تازارتىپ بەرەدى دەپ ۇمىتتەنىپ، «ۆىگنات ۆسەح «پەۆتسوۆ» ەسترادى ناشەي، پۋست ديماش پويوت، ەتو تو، چتو نەوبحوديمو ليۋديام س نورمالنوي پسيحيكوي ي چۋۆستۆوم پرەكراسنوگو!» دەگەن ۇكىم شىعارىپ جاتىر.

البەتتە، مۇنىڭ بارلىعى دا نيەت. ديماش جالعىز ءوزى قازاقستانداعى شوۋ بيزنەستى دە جولعا قويا المايدى، رەسەيدەگى جاعدايدى دا جوندەپ بەرە المايدى. بۇل جەردە كوپ نارسەنى حالىقتىڭ ءوزى شەشەدى. شىنايى ونەرى بيلىككە ەمەس، ەلگە كەرەك. بەلگىلى شىندىق – «بەتەگە كەتەدى، بەل قالادى». دەسە دە ديماشتىڭ ونەرى، ونىڭ ايرىقشا ءستيلى، اسىرەسە ەلدەن جالعىز اتتى جولاۋشىداي بوپ كەتىپ، از ۋاقىتتا الەمدىك ارەناعا شىعۋى ەسترادامىزعا، جالپى مادەني كەڭىستىگىمىزگە بەلگىلى ءبىر دارەجەدە كوتەرىلۋ، سەرپىلۋ سەزىمىن الىپ كەلگەنى انىق.

قازىرگى تىلمەن ايتقاندا، ديماش – سپويلەر (تىنىشتىقتى بۇزۋشى). قىتايلىق Singer بىزدە توقىراۋعا ۇشىراي باستاعان ءان كونكۋرستارىن وتكىزۋ ىسىنە قايىرا جان بىتىرگەنى، ونىڭ وڭ اسەرىمەن 31-ارنادا قازاقستاندىق Aim Singer, «قازاقستان» ارناسىندا بولەك Silk Way Star, «جۇلدىزدى جەكپە-جەك» ءتارىزدى ءان سايىستارى پايدا بولعانىن ايتۋىمىز كەرەك. ايەلدەر تەلەسەريالدارىن تاستاپ، ەركەكتەر گازەتتەرىن قويا تۇرىپ، جاندى داۋىسپەن جۇرەكتىڭ قىلىن قوزعاي ايتىلاتىن ناعىز انگە مويىن بۇرا باستادى. شىنايى ونەرگە كوپتىڭ سۇرانىسى ءوز كەزەگىندە سۋرروگات ەمەس، ساپالى انگە ىشتەي قۇمار، بىراق شوۋ بيزنەستىڭ ارزان زاڭدىلىعىنا امالسىز كونىپ جۇرگەن بىرقاتار انشىلەرىمىزگە وي تۇسىرمەي جانە وسى ورايدا ديماش سىندى ءانشىنى تۇيسىك دەڭگەيىندە بولسا دا باعدار تۇتقىزباي تۇرا المادى. مۇندا ادەتتەگى اسەرلەنە ەلىكتەۋ دە، سونىمەن قاتار ديماشتىڭ ۇزدىك ورىنداۋ مانەرىن، ءارتيستيزمىن، ادامي قاسيەتتەرىن، ءوز اۋديتورياسىن، جالپى ادامداردى قۇرمەتتەي ءبىلۋىن قادىر تۇتۋ، سودان ۇيرەنۋ تالابى دا بايقالادى. اينالىپ كەلگەندە ديماش ەسترادا انشىلەرىنە ءبىز «كۋمير» دەپ جۇرگەن تالانت شىندىعىندا قانداي بولۋى كەرەك ەكەندىگىن كوزاپارا كورسەتتى. جوعارىداعى قاسيەتتەرگە يە بولساڭ، دارا شاپقان دارابوز ءوزى سياقتى الەمدىك دەڭگەيگە قادام باسۋعا بولاتىنىنا سەندىردى. ول ءۇشىن كۇنىگە تەر توگىپ ەڭبەكتەنۋ، تىنىمسىز ىزدەنۋ، وزىندىك سونى سوقپاق قالىپتاستىرۋ كەرەك ەكەندىگىن ۇقتىردى.

ارينە، ءدال وسىنداي تۇسىنىكتەن كەيىن ساحنامىزدا تالانت جاڭبىردان سوڭعى قوزىقۇيرىقتاي قاپتاپ كەتتى، ال الگى جاڭبىردىڭ اتى ديماش ەدى دەۋدەن اۋلاقپىز، دەسە دە، ءوز باسىم ەسترادامىزدا سوڭعى كەزدە پايدا بولعان مارحابا ءسابي، ەربول ناريمانۇلى سياقتى دجاز، بليۋز ستيلىندەگى ورىنداۋشىلاردى، بەلگىلى ءبىر دارەجەدە ديماش اسەرىمەن قالىپتانعان بۋىنعا جاتقىزار ەدىم. رەسەيلىك تنت ارناسى ارقىلى تمد-عا تانىلىپ ۇلگەرگەن ءنازيما جانىبەكوۆانىڭ، «سلاۆيان بازارى — 2018» كونكۋرسىندا ءبىرىنشى ورىن العان امىرەنىڭ (ەرنار سادىرباەۆ), ۋكراينانىڭ «داۋىس» رەاليتي شوۋىنىڭ جەڭىمپازى دانەليا تولەشوۆانىڭ شىعارماشىلىعىنا دا ديماش ونەگەسى شاپاعاتتى اسەرىن تيگىزگەنىن جوققا شىعارۋعا بولمايدى. زارينا التىنباەۆانىڭ 2018 جىلى جازدا جاپونيانىڭ مۋزىكا فەستيۆالىندە باس جۇلدەنى يەلەنۋى، بىزگە جيەن كريستيان كوسوۆتىڭ Singer-2019-عا قاتىسۋى دا وسى قاتاردا. سونداي-اق ديماش ۇلگىسىمەن ۇلتتىق مۋزىكامىزدى الەمدىك ستاندارتتارعا كوشىرىپ ترانسلياتسيالاۋ ءستيلى Made in KZ توبىنىڭ، MEZZO كۆارتەتىنىڭ، TRISTAR تريوسىنىڭ شىعارماشىلىق بەتىنەن ايقىن اڭعارىلادى. ديماش ستيلىندە ءان شىرقاۋ كەيىنگى تولقىن انشىلەردىڭ اراسىندا ەداۋىر ەتەك الىپ كەلەدى (ارينە، بۇل جەردە مايرا ءىلياسوۆا ورىندى ەسكەرتكەندەي شامالى ساقتىق كەرەك، سەبەبى، ديماشتىڭ ارحيميكستى — ەكىنىڭ ءبىرى شىعارا المايتىن ەكسكليۋزيۆ ورىنداۋ، ياعني وعان دايىندىقسىز كەلگەن ءانشى داۋىس شىمىلدىعىن زاقىمداپ الۋى مۇمكىن), وسى ورايدا MEZZO ديماشتىڭ پروزوپوپەيالىق ۇلگىسىن ءساتتى قولدانىپ، TRISTAR دا «شارشاعان اققۋلار ماحابباتى» كومپوزيتسياسىن ديماشتىڭ كاۆەر-ۆەرسياسى بويىنشا، بىراق ءوز ناقىشتارىمەن ورىنداپ جۇرگەنىن ايتۋ ءجون. ديماش بولام دەپ اۋرەلەنبە، دۇرىسى، ديماشتاي بول. وسى ءسوزدى كەيىنگى جىلدارى «قازاقستان داۋىسى» جوباسى ايقىنداعان مۇراتبەك حايرولدا، باۋىرجان رەتباەۆ، ينديرا ەدىلباەۆا، كەنا دونيا، دوسحان جولنيازوۆ جانە تاعى دا باسقا ونداعان تالانتتى جاس انشىلەرگە، پەرىشتە داۋىستارىمەن ەلدى جالت قاراتقان لۋيزا نۇرقۋاتوۆا، نۇرمۇحامەد جاقىپ، مۇحامەتقالي جۇگىنىسوۆ، ارداق ارۋجان، نارگيز جانۇزاقوۆا سەكىلدى كوكورىم انشىلەرگە دە باعىتتار ەدىك. ەڭ باستىسى، اندە، مۋزىكادا ءوز بەتىڭدى ايقىندا، بالا بولىپ ايتساڭ دا، دانا بولىپ ايتساڭ دا ۇلتتىق كولوريتتى ساقتا. مۇرات بالتاباەۆ دەيتىن يۋتۋبەر جازعانداي، Made in KZ ۆمەستە س ديماشەم تۆوريات پرەكراسنىي ناش وبراز. ۆ ميرە بۋدەت ناس پرەدستاۆليات پو يح وبرازۋ — يگريۆايا نەجنوست، ياسنايا ريتميچنوست ي مەلوديچنوست ستەپنوگو سوكولا». الەمنىڭ نازارىن وزىڭە تەك وسىمەن، ياعني ەشكىمگە ۇقسامايتىن وزىندىك قولتاڭباڭمەن عانا اۋدارا الاسىڭ.         مادەنيەت ءمينيسترى ارىستان مۇحامەديۇلى ءوزىنىڭ ءبىر سۇحباتىندا ايتقانداي، ديماشتان كەيىن شەتەلدىك پروديۋسەرلەردىڭ «التىن شىققان جەردى بەلدەن قاز» پرينتسيپىمەن قازاق انشىلەرىنە نازار تىگە باستاعانى دا تەگىن بولماسا كەرەك.

ەڭ باستىسى، اۆگەيدىڭ ازبارىن – تانىمال ءان سالاسىن، كوپشىلىككە ارنالعان ەسترادا ساحناسىن كوكتەمگى «التىن كۇرەك» جەلپىپ قانا قويماي، جاقسىلاپ تۇرىپ قوقىسىن ءبىر سىپىرىپ وتكەندەي اسەر بار. قازاق ادەبيەتىنىڭ كلاسسيگى عابيت مۇسىرەپوۆ ءبىر اڭگىمەسىندە ىلگەرىدە ءوزىمىز ايتقان اۋىل-ءۇي ولەڭشىلەرىنىڭ «رۋحاني اتاسى» قىدىرالى دەگەن قۋاياقتى بىلايشا سۋرەتتەيتىن: «قىدىرالى دەسە قىدىرالى، اۋىلدان اۋىلعا قىدىرىپ ءجۇرىپ ولەڭ ايتىپ قۋ قۇلقىن تاماعىن اسىرايتىن ءبىر شولاق اقىن بار ەدى. اۋلىڭا قىدىرالى كەلىپ كەتسە، دۇنيەدە اقىننان جەكسۇرىن ادام بولمايتىن شىعار دەپ ويلاپ قالاتىنسىڭ. سۇرانشاق، بەيمازا، ادەپسىز. نە سالعان انىندە، نە ايتقان ولەڭىندە ون تيىندىق ءوڭ بولمايتىن. قاشاندا كۇشتىنى ماقتاپ، ءالسىزدىڭ يىعىنان تۇسپەي ەزگىلەي بەرەتىن...». سونداي ولەڭشىلەر – سكوموروحتار ءوزىمىز ءالى كۇنگە دەيىن تۇشكىرسە، راس-اۋ، دەپ وتىرعان رەسەيدە دە دۇمەپ تۇر ەكەن، جۋىردا بەلگىلى ءانشى ديما بيلان سولاردىڭ قاتارىندا تۇرىپ ءان ايتقاندى ار كورىپ، ساحناعا شىعۋ بويىنشا تسەنزۋرا ەنگىزۋ جونىندە ۇسىنىس تاستادى. اتى وشكىر سول ءسوزدى قايتا تىرىلتپەي-اق قويايىق، ەڭ مىقتى تسەنزۋرا – مىقتى ۇلگى جانە سونداي ۇلگى-ورنەككە، ياعني ساپالى مۋزىكاعا دەگەن حالىقتىڭ ىقىلاسى عوي. قازاقتىڭ ءدال قازىرگى قالپىنداعى تويى جۋىرماڭدا جوعالا قويماس، ال توي جوعالماعاسىن توي انشىلەرى دە بولا بەرەدى. ماسەلە مىقتى ونەرپازدارىمىزدى ۇلىقتاۋ ارقىلى وزدەرىن قول جەتپەس «جۇلدىز» ساناپ جۇرگەن الگى «قىدىرالىلاردى» جەرگە تۇسىرۋدە. سوندا ولاردىڭ ءوزى-اق ساپالى مۋزىكا، ءتاۋىر انگە بەت بۇرا باستايدى. قاي سالانىڭ بولسىن وكىلىنىڭ ىشىندە الدەقانداي سەبەپتەرمەن اشىلماي كەتەتىن مۇمكىندىكتەر بولادى، سول سياقتى «ولەڭشىلەردىڭ» دە كوكىرەگىندە باعى اشىلماي، ءساتى تۇسپەي جۇرگەن، ايتىلماعان، شىرقالماعان جاقسى اندەر، نە سونداي اندەردىڭ ىزىڭ-بەلگىلەرى جاتۋى مۇمكىن. گاپ سول جاقسىنىڭ سىرتقا شىعۋىنا قولايلى جاعداي جاساي بىلۋدە. بۇگىندە بىرقاتار جۇرت توي-بيزنەستىڭ كورنەكتى وكىلى سانايتىن قايرات نۇرتاستىڭ ءوز باسىم ۇناتىپ تىڭدايتىن «جۇرەگىڭنەن ءبىر ورىن بەر» دەيتىن ءانى بار. سول ءان يۋتۋبتا توعىز ايدا 27 ميلليون مارتە تىڭدالعان. وسى ءان، مەنىڭشە، تالانتىنا داۋ جوق، بىراق «ەلى قالاي بولعاسىن، بوركى سولاي بولىپ» كەتكەن قايراتتىڭ بۇكىل توي-شىعارماشىلىعىنىڭ ارەدىك ءبىر جەرىندە، پەرفورمانس ساتىندە شىعىپ كەتكەن، كەۋدە سارايىندا قىستىعىپ جاتقان شىنايى، تالانتتى دۇنيەلەردىڭ ءبىر كەسەگى مە دەيمىن. دۇنيەگە كەلمەي قالعان بەيكۇنا شاقالاق ءتارىزدى مۇنداي شىنايى شىعارماشىلىق ءانشىنى ار-ۇيات سىنىنا سالۋى ءتيىس، بىراق ول ءۇشىن ونەر سالاسىندا قولايلى جاعداي، قاجەتتى اتموسفەرا جاسالۋى كەرەك. ءان تۇزەلۋى ءۇشىن تىڭداۋشى تۇزەلۋى كەرەك. تالانت بار جەردە تاربيە دە بولۋى كەرەك. باعىت بەرىلۋى كەرەك. ءبىزدىڭ ەسترادادا قازىردىڭ وزىندە ديماشتىڭ نەوكلاسسيكاسىنىڭ اسەرىمەن سونداي ءبىر احۋالدىڭ تاعانى تارتىلىپ تا قالدى. سول جاڭا كلاسسيكالىق ءستيلدىڭ، دۇرىسى، كلاسسيكالىق دەرلىك ساۋ تالعامنىڭ ارقاسىندا جۇزدەگەن، مىڭداعان ادام ناعىز ونەردىڭ ۇمىتىلۋعا اينالعان تۇپقازىق ميسسياسى – بيىك ورەدەگى اسەمدىك الەمىنە قايتىپ ورالىپ كەلىپ جاتىر. بۇل قاتاردى ديماش باستاعان ات توبەلىندەي توپتىڭ كۇشىمەن مولايتۋ قيىن. ىسكە اتتىڭ تۇگىندەي ەسترادا ورىنداۋشىلار تۇگەل تارتىلۋى كەرەك. ەگەر ءار تالانتتى ءانشىنىڭ سوڭىندا 50-100 مىڭ تالعامپاز تىڭداۋشى تۇرادى دەپ ەسەپتەپ، وسى سيپىردى الگى دارىندارىمىزدىڭ جالپى سانىنا كوبەيتسەك، ناعىز، ءتاۋىر مۋزىكانىڭ قادىرىنە جەتەتىن تۇتاس ارماداعا يە بولار ەدىك. ەكىنشىدەن، بۇل «ات تۇگى» ءۇشىن رەسەيدەگىدەي باق-تى، راديو-تەلەۆيدەنيەنى، كونتسەرت الاڭدارىن باسى ءبۇتىن مونوپولياعا اينالدىرمايتىن، ياعني ۆەرتيكال باسقارىلمايتىن، ۋكرايناداعىداي ەركىن، ەكسپەريمەنتتىك ىڭعايدا كولبەۋ ىڭعايلاستىرىلعان احۋال جاسالۋى ءجون. مۋزىكالىق يندۋستريانى وسىلايشا ىشتەي قايتا قۇرۋدىڭ ارقاسىندا ۋكراينادا بەيرەسمي تۇردە «ۋكرپوپ» دەپ اتالىپ وتىرعان جاڭا ەسترادالىق باعىت پايدا بولىپ، ول شەتەلدە، سونىڭ ىشىندە باتىستا كادىمگىدەي كادەلەنە باستادى. بۇگىندە قاتارىندا MONATIK, Qvest Pistols,YUKO, ناتا جيجەنكو، جەنيا فيلاتوۆ، يۋري بارداش سىندى وزگەشە ءبىتىمدى ورىنداۋشىلار بار «ۋكرپوپتىڭ» نەگىزگى «وكەان ەلꞌزى»، «بۋسمبوكس»، The Hardkiss ۇشتىگىنىڭ، بۇدان دا دالىرەك ايتساق «ەلꞌزانىڭ» فرونتمەنى سۆياتوسلاۆ ۆاكارچۋكتىڭ كۇشىمەن قالانعان. بىزدە بۇل مىندەت حالىقارالىق دەڭگەيدەگى بىردەن-ءبىر قازاق ونەرپازى – ديماشتىڭ موينىنا جاۋعا سالعان جالعىزداي ارتىلىپ وتىر. ءيا، ءدال وسى ءانشىنىڭ ىقپالىمەن ءبىز قازىر ۋكراينا جۇزەگە اسىرعانداي ينتەگراتيۆتىك مادەنيەتتىڭ قازاقستاندىق مودەلىن جاساۋ قارساڭىندا تۇرمىز، بۇل – ۋاقىت تالابى، دەسە دە ول ىستە ءبىر كوممەنتاتور (مەيرام شوتاي) بەينەلەپ «ۇلتتىڭ كيىمى» دەپ اتاعان ديماشتىڭ، ول تالداپ جاساپ وتىرعان ەكسپەريمەنتتىك پاتەنتتەلمەگەن ساۋند، امبەباپ مۋزىكالىق تەگتىڭ الار ورنى ءبىر توبە. قازاق حالقىنىڭ بولاشاعى قازاق تىلىندە بولسا، قازاق مادەنيەتىنىڭ بولاشاعى ونىڭ ينتەگراتيۆتىك مودەلىنىڭ ومىرشەڭدىگىندە. ەندەشە جارعاق قۇلاعى جاستىققا تيمەي بولاشاقتىڭ وسى تۇعىرىنىڭ كەسەگىن قالاۋعا ۇلەس قوسىپ جۇرگەن ونەر يەسىن، ايتىسكەر اقىن كۇستانالاپ وتىرعانداي، تەك وزىنە عانا قىزمەت ەتەتىن دەۋ، بىلمەي، بايىبىنا بارماي ايتىلعان ءسوز. ديماش جانە ونىڭ وكشەسىن باسىپ كەلە جاتقان تالانتتى شوعىر – «ديماش» ترەندى «ونسىز دا بولمىسى ەۋروپالانىپ بارا جاتقان قازاقتى، قازاقتىڭ جاستارىن» جامان جاققا ىلەستىرمەيدى، قايتا الەم جاساعان كامەلەتتىڭ توقسان توعىز كەمشىلىگىن تانىپ، توقسان توعىز جەتىستىگىنەن اۋلاق بولۋىدىڭ ىلكىمدى جولدارىن ىزدەستىرەدى. قازاق جاستارى ديماش فەنومەنىنە اۋالانىپ، بۇزىلىپ كەتەدى دەپ قورىقپا، قورىقساڭ، ءوزىڭ ءبىر سىناپ بارىپ الدەنەگە توقتاپ قالعان تازا كورەيلىك سۋبمادەنيەتتىڭ – كەي-پوپتىڭ ىقپالىنداعى، 7-دەن 20-عا دەيىنگى جاستارىمىزدى تۇگەلگە جۋىق سوڭىنا ەرتىپ وتىرعان «ناينتي ۋانداردان» قورىققىن، رينات جولداس! وسى ورايدا Kpop in KZ سايتى قازاق جاستارى اراسىندا جۇرگىزگەن ءبىر ساۋالناما قورىتىندىسىن نازارىڭىزعا ۇسىنا كەتەيىن: «ءسىز كورەي ءتىلىن نە ءۇشىن ۇيرەنىپ ءجۇرسىز؟» دەگەن سۇراققا رەسپوندەنتتەردىڭ 15,4%-ى كورەي ۋنيۆەرسيتەتىنە ءتۇسۋ ءۇشىن، 21%-ى كورەي سوزدەرىن ءتۇسىنۋ ءۇشىن، 20,9%-ى كورەي مادەنيەتىن ۇناتاتىندىعى ءۇشىن، 13,3%-ى كورەي اندەرى مەن دورامالارىن ءتۇسىنۋ ءۇشىن، ال 29%-ى كورەياعا بارىپ تۇرۋ ءۇشىن دەپ جاۋاپ بەرگەن...

ديماش ۇلگى سالىپ وتىرعان ينتەگراتيۆتىك مادەنيەت مودەلىنىڭ پراگماتتىق باتىستان بۇرىن رۋحاني شىعىسپەن بايلانىسى نازار اۋدارارلىق. بۇكىل ورتالىق ازيا بويىنشا حالىقارالىق فان-قوعامداستىعى بار جالعىز ءانشىنىڭ شىعارماشىلىعىن مودالدىق شىعىس مۋزىكاسى شاربىداي شىرماپ جاتىر. مىسالى، كەيبىر اندەرىندەگى تاياۋ شىعىس مۋزىكاسىنا ءتان ميزراحي ءستيلى. سونداي-اق بىرقىدىرۋ ساراپشىلار ديماش ورنەگىن Fusion جانرىنىڭ شىعىس بۇتاعىنا جاتقىزادى. جالپى مامانداردىڭ ايتۋىنشا ورتاازيالىق ونەرپازدار كەڭەستىك ورىنداۋ ستاندارتىنىڭ اياسىنان ەمىن-ەركىن شىعىپ كەتە الاتىن بىردەن-ءبىر انشىلەر ەكەن جانە سونىمەن بىرگە ايماق ارتيستەرىنىڭ كەيىنگى كەزدە شىعىس بويىنشا الدىمەن ازيا قۇرلىعىنا دەن قويۋى كۇشەيىپ كەلەدى. وسى تۇرعىدان كەلگەندە ديماش تمد ازيالىقتارى عانا ەمەس، جالپى كۇنباتىس شىعىس ەلدەرى بويىنشا وڭتۇستىك-شىعىس ازياعا ءبىرىنشى بولىپ تەرەزە اشتى دەپ نىق سەنىممەن ايتۋعا بولادى. ول 2014 جىلى ازيا-تىنىق مۇحيت حابار تاراتۋ وداعى ىستامبۇلدا وتكىزگەن ABU TV song فەستيۆالىندە ون ەكى ەلدەن كەلگەن انشىلەردىڭ اراسىندا «دايديداۋدى» جانە بەلگىلى تۇرىك ءانشىسى سەلدا باگجان رەپەرتۋارىنان تۇرىكتىڭ «گەزي باگلاري» ءانىن ورىنداپ كوزگە ءتۇستى. 2014 جىلى ىسىق-كول جاعاسىندا وتكەن «مەيكەن ازيا» (كەڭ-بايتاق ازيا») حالىقارالىق كونكۋرسىندا (وتىزدان اسا ازيالىق ەلدەن ءانشى كەلدى) توپ جارعان ەدى جانە سول القالى شارا كەزىندە گالا-كونتسەرتتى جۇرگىزىپ تۇرعان قىرعىز قىزى: «ديماشتى بۇكىلعالامدىق اتاق-داڭق كۇتىپ تۇر!» - دەپ كولدىڭ باسىن جاڭعىرىقتىرعانى بار-دى. اۋىزىنا قۇداي سالعان ەكەن، ەكى جىل ارالاتىپ ديماش ايلاپات ازيانىڭ قاي جەرىنە بارسا دا ستاديوندى لىق تولتىرىپ تىڭدارمان جيناي الاتىن دارەجەگە جەتىستى. باسقا ەمەس، ارقاسىن ەلگە تىرەگەندەي شىعىستىق، ازيالىق مودال مۋزىكا ستيلىمەن ءان شىرقاۋىنىڭ جانە ازيالىق چەمپيوندارعا ءتان مىنەز-قۇلقىنىڭ، توزىمدىلىگىنىڭ، ەرىك-جىگەرىنىڭ، شىنىققاندىعىنىڭ، تاربيەلىلىگىنىڭ ارقاسىندا دا سونشالىق اتاق-داڭققا بولەنىپ وتىر. ءبىر زاماندا ازيانى ەۋرازيامەن قوسىپ تولىق قامتۋدى العاشقى گلوباليست پاسسيونارلار – ۇلى قاعان شىڭعىسحان مەن جەتى جۇلدىزدىڭ ءامىرشىسى ءامىر تەمىر مۇرات تۇتقان ەدى. قاجىمۇقان دا كەزىندە «قارا يۆان» دەگەن نىسپىمەن ازيا چەمپيونى اتانعان، ياعني وعان «جاپونيانىڭ، كورەيانىڭ جانە مانچجۋريانىڭ چەمپيونى» دەگەن اتاق بەرىلگەن. قاجەكەڭ وسىندا، سولتۇستىك مانچجۋريانىڭ حان قالاسى حاربيندە 1913 جىلى جاپون دجيۋ-ءدجيتسۋىنىڭ حاس شەبەرى ساراكيكي جيندوفۋدىڭ ومىرتقاسىن ومىرىپ، باس تەرىسىن سىپىرىپ العان. قازاق چەمپيونى الەمنىڭ ەڭ ۇلكەن قۇرلىعىنا – ازياعا اراعا ءجۇز ءتورت جىل سالىپ ورالدى جانە بۇل جولى ديماش بولىپ كەلىپ مۋزىكامەن تايكەسىنەن ءتۇسىردى. سونىمەن بىرگە ءبىزدىڭ ازيا مادەنيەتى، ازيا مۋزىكاسى جونىندەگى تۇسىنىگىمىزدى دە ايتا قالعانداي كەڭەيتتى. بۇرىن ءبىز بۇل قۇرلىقتاعى مۋزىكانى، ەسترادانى تۇرىكتىڭ تارحان، يراننىڭ گۋگۋش، قىرىملى تاتاردىڭ دجامالا، قازانلى تاتاردىڭ ەلۆيرا گاريفۋللينا، دينا گاريپوۆا، ازەربايجاننىڭ سابينا باباەۆا، ەلدار قاسىموۆ، وزبەكتىڭ نارگيز زاكيروۆا، سەۆارا، چەشەننىڭ شاريپ ۋمحانوۆ، داعىستاننىڭ سەليم اليحاروۆ، تۇركىمەننىڭ اناگوزەل گوكيناەۆا سياقتى ونەرپازدارىمەن عانا كوزگە ەلەستەتەتىنبىز. ەندى ديماشتىڭ ارقاسىندا دۇنيەنىڭ وسى بولىگىنە تيەسىلى سەم ادريان، گۇلدەن ەرگەن، ەمرە ەدجەلەن سىندى انشىلەردى اشىپ وتىرمىز. سول سياقتى قىتايدا حان حونگ، تان دجين، كوكو لي، لاۋرا چانگ، ۆۋ تونگ، تيا رەي، دجەيسون چجان، حۋا چەن تارىزدەس انشىلەر بارىن بۇرىن كىم بىلگەن. نەمەسە وڭتۇستىك-شىعىس ازيا ەلدەرىندە سو حۋيانگ، مارسەليتو پوموي، شيلا امساح، تەنگري، ازاپ ديۆاس، تەرەزا كارپيو (دۋ لي شا), لاۋرا شەنگ، KZ تاندينگان، «ليون» توبى قۇرالىپتاس وزگەشە ءبىتىمدى ارتيستەر بار دەپ ويلادىق پا؟! ونى ايتاسىز، ىرگەلەس، قانداس شۇار-دا اراي، جانات ءادىلحان دەيتىن تاماشا انشىلەر بارىن ەندى ءبىلىپ جاتىرمىز. پۋگاچيوۆالارمەن ميىمىز اينالىپ قالعان ءبىزدىڭ تالعام-تانىمىمىز ءۇشىن بۇل ايدىك جاڭالىق بولدى جانە سونىڭ ارقاسىندا ازيا جايىنداعى بۇرىنعى تۇسىنىگىمىز تۇبەگەيلى وزگەرىسكە ۇشىرادى. سويتسەك، شىعىس جانە وڭتۇستىك-شىعىس ازيادا ءبىز ەسترادا، فولكلور، اكادەميالىق جانرلار دەپ ءمور باسىپ ءبولىپ تاستاعان نارسەلەردىڭ ارا-جىگى ايقىن بىلىنبەي جىمداسىپ جاتادى ەكەن دە، سوعان سايكەس مۇنداعى كوپتەگەن ەسترادالىق ورىنداۋشىلار ءۇشىن بىرنەشە ۆوكالدىق تەحنيكانى قاتار قولدانۋ نەمەسە مارسەليتو پوموي سەكىلدى تەنورمەن، باريتونمەن كەزەكتەستىرىپ شىرقاۋ، سو حۋيانگ قۇساپ داۋىسىن كوككە شانشىلتىپ ايتۋ ادەتتەگى جاعداي كورىنەدى. وسى جانە وزگە دە سەبەپتەرگە جانە كورەيلىك k-pop مادەنيەتىنىڭ، ونىڭ Psy (پاك چە سان) سياقتى كورنەكتى وكىلدەرىنىڭ ارقاسىندا ازيالىق مۋزىكا «كورەي تولقىنى» بولىپ الەمگە تاراپ، ءتىپتى العا سۋىرىلىپ شىعا باستاعان (ساراپشىلار سونىڭ ىشىندە ءبىزدىڭ Q-pop – qazaq pop ءستيلىن دە وسى كورەيلىك كەي-پوپ ارناسىنداعى جاڭا باعىتقا جاتقىزادى). البەتتە، بۇل ماسەلەنىڭ ءبىر جاعى عانا شىعار، زاماناۋي ازيالىق شوۋ-بيزنەستىڭ الەمدىك ارەناعا باسپاتورەلەپ كىرىپ، وعان ءوڭ بەرە باستاۋىنىڭ كورەيلىك پوپ-مادەنيەتتەن باسقا دا تۇرتكى سەبەپتەرى بولۋى مۇمكىن، سونىڭ ىشىندە قازىر باتىستىق ساۋند جەتەر جەرىنە جەتىپ، ەندى دامۋ قارقىنى باياۋلاي باستاعانىن، ال جاس ازيالىق ەسترادا ونەرى كەرىسىنشە كەمەلىنە كەلىپ، بويىن بۇلا كۇش كەرنەپ تۇرعانىن دا ەسكەرۋ ءجون. ەسترادا بويىنشا ازيا باتىستىڭ الدىنا تۇسە باستاعانىن امەريكاعا بارعان ءبىر ساپارىندا ديماش تا ايتقان-دى. ونى ديماش پەن دانەليا قاتىسقان امەريكاندىق The World's Best تالانتتار شوۋى قۇرامىنىڭ سەكسەن پايىزىن ازيالىقتار قۇراعانىنان دا اڭعاردىق. ءيا، كەزىندە پەلە الەم جۇرتشىلىعىنا، سونىڭ ىشىندە اعىلشىنداردىڭ وزدەرىنە دە فۋتبولدىڭ رەگبي ەمەس، ۇلكەن ونەر ەكەندىگىن كورسەتىپ بەردى عوي، بىراق بۇدان انگليا – فۋتبولدىڭ تاريحي وتانى دەگەن ۇعىم جوعالىپ كەتكەن جوق. سول سياقتى باتىستا دا مۋزىكالىق ماتەريال الدە دە كۇشتى، بىراق سونى ورىنداۋداعى شەبەرلىك تارازىسى ازيالىقتارعا قاراي اۋا باستاعانى انىق. اربەردەسىن ديماش تا بۇگىنگى تۇعىرىنا الدىمەن سول باتىستىق حيت اندەردى العاشقى ورىنداۋشىلارىنان دا اسىرىپ، تاماشا كاۆەر-نۇسقالار جاساۋ ارقىلى كوتەرىلدى عوي. سول تۇعىردى جۋىردا galiya1928 دەيتىن كوممەنتاتور بىلايشا سيپاتتايدى: «كورەيسكايا پەۆيتسا سو حۋيانگ نا داننىي مومەنت ياۆلياەتسيا لۋچشەي پەۆيتسەي ۆ ميرە، ي ديماشۋ، كاك ازياتسكومۋ پەۆتسۋ، وتۆوديات مەستو ريادوم س نەي، نازىۆايا ەيو كورولەۆوي، ا ەگو كوروليوم سوۆرەمەننوگو پەنيا ۆ ميرە».

قالاي بولعاندا دا ازياعا كەلىپ، ءوزى ءۇشىن مۇلدە توسىن مۋزىكالىق اسەرلەردى كەزىكتىرگەن ديماشتى قازىردىڭ وزىندە ازيا قۇرلىعىنىڭ ءان كورولى دەپ اتاۋعا بولادى جانە قازاق ءانشىسى ءوز ونەرىمەن، ءبىر قىرعىز كۇيەرمەنى جازعانداي، «ازيانى دۋينوگو تانىتتى». وسى ورايدا قىتايلىق مامان فۋ ءليننىڭ ءبىر پىكىرىن كەلتىرۋ ءجون. ونىڭ ايتۋىنشا، ديماشتىڭ ءان سالۋ تەحنيكاسىن «ادام مۇمكىندىگىنەن تىس تەحنيكا» دەپ مويىنداۋ كەرەك جانە باتىستا مۇنداي الەمدىك سانگە اينالاتىن باعىتتاردى ادەتتە ۋيتني حيۋستون، مەرايا كەري، بەيونسە دەڭگەيىندەگى مەگاجۇلدىزدار جاسايدى، ال ازيا قۇرلىعىندا سونداي ءبىرىنشى بولۋ باقىتى ديماشقا بۇيىرىپ تۇر. جانە دە بۇل جاڭا مۋزىكالىق باعىت الەمدىك ءوڭ الىپ كەتۋى ابدەن مۇمكىن.

بىراق امبيتسياسى اسپان تىرەگەن اق ادام وسى شىندىقتى مويىنداي ما دەسەيشى الدىمەن. «ءوزىم دە ءبىر نوستراديمۋسپىن عوي» دەپ قويايىنشى، بۇدان بىرقاتار ۋاقىت بۇرىن بەلگيالىق اتاقتى ءانشى لارا فابياننىڭ شىعارماشىلىق جولىن سارالاي كەلىپ، اسىرەسە ونى امەريكا جەتى جىل بويى ءوز ءان نارىعىنا كىرگىزبەي، اقىرى سەلين ديونداردىڭ دۇمپۋىمەن ەلىنە – ەۋروپاعا قايتارىپ جىبەرگەنىنە، سول سياقتى بەلگىلى مولداۆان ءانشىسى دان بالان دا مۇحيتتىڭ ارعى جاعىندا ءبىر جىل بولىپ قايتىپ كەلگەنىنە قاراپ، جاڭا دۇنيە ءبىزدىڭ «ازيالىق» ديماشقا دا سونداي ءبىر ءتاسىل قولدانىپ قالۋى مۇمكىن-اۋ دەپ جورامالداعان ەدىك، امەريكاندىق Ranker پورتالى 2019 جىلدىڭ باسىندا وتكىزگەن الەمنىڭ ۇزدىك ءجۇز ءانشىسىن انىقتايتىن ونلاين داۋىس بەرۋ باستالعان 16-قاڭتار كۇنى 35-ورىندا تۇرعان ديماش ەرتەسىنە، بۇل ۋاقىتتا قۇلاقتانىپ ۇلگەرگەن Deaps-تاردىڭ ىسكە قوسىلۋىمەن 104 مىڭنان اسا لايك جيناپ، ىشىندە مەركيۋري، مايكل دجەكسون، ۋيتني حيۋستون بار العاشقى ۇشتىكتىڭ دا الدىنا شىقتى. 18-قاڭتارعا قاراعان ءتۇنى ديماشقا بەرىلگەن داۋىس سانى 113 مىڭنان اسقاندا كەنەت لايكتار مەن ديزلايكتاردىڭ ورنىن اۋىستىرىپ جىبەرۋ ارقىلى قازاق ءانشىسى 369-شى ورىنعا سىرعىدى (لارا فابيان 366-ورىندا). كەيبىر كوممەنت يەلەرىنىڭ جازۋىنشا، بۇل – قولدان ۇيىمداستىرىپ ۇپاي جيناۋدى بولدىرماۋدىڭ امالى، ياعني ءبىر ەلدەن لايك باسۋ سانى كۇرت كوبەيىپ كەتكەن جاعدايدا كومپيۋتەرلىك پروگرامما مۇنى اۆتوماتتى تۇردە ادىلەتسىز ويىن دەپ تانىپ، لايك پەن ديزلايكتىڭ ورنىن اۋىستىرادى ەكەن. بۇل جەردە شىنىندا دا ءبىر عانا ەلدەن – ميللياردتىق قىتايدان ديماش ءۇشىن بەرىلگەن داۋىستىڭ وتە كوپتىگى كومپيۋتەرلىك جۇيەنى ىسكە قوسقان ءتارىزدى، بىراق جەر شارىنىڭ تۇكپىر-تۇكپىرىنەن داۋىس بەرۋلەر دە بولدى عوي، كومپيۋتەر وندايدى ەسەپكە الا المايتىنى بەلگىلى، بىراق وسى جەردە ۇيىمداستىرۋشىلار وزدەرىنىڭ پروگراممالانباعان اقىل-ويلارىن، قاراپايىم لوگيكاسىن ىسكە قوسىپ، الەمنىڭ قىتايدان دا باسقا ونداعان ەلىنەن ءبىر مەزگىلدە بەرىلگەن مىڭداعان داۋىستى ۇيىمداستىرۋ ديماش تۇگىل تسرۋ-ءدىڭ ءوزىنىڭ قولىنان كەلمەيتىنىن ەسەپكە السا، كانە. ەڭ عاجابى، رانكەر وتكىزگەن داۋىس بەرۋ ءبىر انشىگە بۇكىل الەمنىڭ بۇلايشا ىنتاسىنىڭ قۇلاۋى بۇرىن ەستراداتاريحىندا بولماعانىن، مۇنداي جاعداي جانسىز كومپيۋتەر بىلاي تۇرسىن، اقىل-ويى كەمەل امەريكانداردىڭ ءوزىنىڭ ويلاۋ قالىبىنا سىيماعانىن كورسەتتى. ونىمەن قويماي، پورتال سەبەبىن ايتپاستان ءدال ديماشقا لايك باسۋدى توقتاتىپ تاستادى. ديماشتىڭ بىرقاتار فاناتتارى جازعانداي، ۇياتتان ءۇش كۇن بۇرىن تۋعان قولتىعى ساسىق الدەقانداي ءبىر سايتتىڭ رەسمي ەمەس، بالدىر-باتپاق رەيتينگىنە بولا توندى وتقا تاستاۋدىڭ قاجەتى دە جوق شىعار، دەگەنمەن، وسىنىڭ ءوزى باتىس پەن ازيا اراسىندا كورىنەۋ ساۋدا سوعىسىمەن قوسامجار كومەس زەرتشىل اقىل جانە رۋحانيات جارىسى دا ءجۇرىپ جاتقانىن، وسى ورەدە اقش ءوز نارىعىنا اعىلشىن ساكسوندار مەن افروامەريكان ورىنداۋشىلاردان باسقا، وزگە ناسىلدەن شىققان، اسىرەسە ءتۇبى تمد-لىق انشىلەردى ولسە دە كىرگىزگىسى كەلمەيتىنىن تاپ-تازا كورسەتىپ بەردى. وسى ىڭعاي The World's Best رەاليتي شوۋى كەزىندە دە بايقالدى. ماسەلەن، اتالمىش كونكۋرستا داۋسىز ۇمىتكەر رەتىندە قارقىندى پرومو جۇرگىزىلگەن فيليپپيندىك ءۇش بالادان تۇراتىن TNT.BOYS توبىنىڭ ۆوكال شەبەرلىگىن وسى جاستاعى بالالار ءۇشىن ورتادان جوعارى دەپ باعالاۋعا بولادى، ال وندايلار الەمنىڭ كەز كەلگەن ەلىندە، مىسالى، تمد ەلدەرىندە تولىپ جاتىر. ال امەريكاندار تاڭدانباسقا تاڭداناتىن حالىق ەكەن. ولاردىڭ مۋزىكالىق تالعام تەڭگەيىن وسىنىڭ ءوزى-اق كورسەتىپ تۇرعان جوق پا؟!

ۋاقىتى كەلگەندە قازاق ءانى ديماش ارقىلى الەمنىڭ بۇل بولىگىن دە باعىندىرادى، ينشاللا. وعان ەش كۇمان جوق، سەبەبى ول قازىردىڭ وزىندە يتكويلەگىنە سىيماي تۇر، ەكىنشىدەن ءانشىنىڭ ەڭ مىقتى فان-قوعامداستىعىنىڭ ءبىرى سول ەلدە ورنالاسقان. ازىرگە ديماشىمىز 7, 6 ملرد. الەم حالقىنىڭ 4, 5 ملرد. بولىگىن قۇراپ وتىرعان ازيانىڭ ءان پاديشاسى جانە وسىنىڭ ءوزى قازاق ءۇشىن از مەرەي ەمەس. بۇل اتاق ديماشقا 2017 جىلى شانحايدا وتكەن Top Chinese Music Awards سىيلىعىنىڭ «ازياداعى ەڭ تانىمال ءانشى» نوميناتسياسى جۇلدەسىن تاپسىرۋ ارقىلى رەسمي بەكىتىلگەنىن ايتۋ ءجون. سىيلىق قىتايدىڭ عانا ەمەس، بۇكىل ازيانىڭ گرەممي سىيلىعى دەپ سانالادى. وسىنىڭ ءوزى قىتاي مادەنيەت بويىنشا دا ازيا قۇرلىعىنىڭ ورتالىعىنا اينالعانىن بىلدىرەدى جانە بۇل رەتتە ديماشتىڭ ازياعا، ودان ءارى دۇنيە جۇزىنە تانىلۋى ءدال وسى قىتاي حالىق رەسپۋبليكاسى ارقىلى عانا مۇمكىن بولعانى – شىققان كۇندەي شىندىق. كۇلەسىڭ بە، جىلايسىڭ با، قالاي ەتكەندە دە بۇلتارتپايتىن اقيقات.

(جالعاسى بار)

ماقسات ءتاج-مۇرات

Abai.kz

10 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1572
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2267
عيبىرات

قايسار رۋحتى عازيز جان

مۇحتار قۇل-مۇحاممەد 3567