«ارداگەرلەر وداعى» دەيتىن ۇيىم الدا بولاتىن كەزەكتەن تىس پرەزيدەنت سايلاۋىنا ەكونوميست مۇحتار تايجاننىڭ كانديداتۋراسىن ۇسىناتىنىن حابارلادى.

دەسە دە سوڭعى شەشىمدى ۇيىمنىڭ ەندى ۇيىمداستىرىلاتىن كەزەكتەن تىس جيىنىندا ايتپاق ەكەن. مۇحتار تايجاننىڭ كانديداتۋراسىن ۇسىنىپ وتىرعان ۇيىم – «ارداگەرلەر وداعى» (سويۋز ۆەتەرانوۆ) دەپ اتالادى. تاجىك-اۋعان شەكاراسىندا بولعان اسكەري قاقتىعىسقا قاتىسقان بۇرىنعى اسكەريلەردىڭ قۇرعان ۇيىمى كورىنەدى.

ەكونوميست مۇحتار بولاتحانۇلىنىڭ كانديداتۋراسىن ۇسىنۋ تۋرالى اتالعان رەسپۋبليكالىق قوعامدىق بىرلەستىكتىڭ توراعاسى، گۆارديانىڭ زاپاستاعى پودپولكوۆنيگى مۇرات مۇحامەدجانوۆ ايتقان. «ءىnbusiness.kz» سايتى سولاي دەپ جازادى.

«ءبىزدىڭ جوعارعى ورگان (كەڭەس) كونستيتۋتسيالىق زاڭنىڭ ەكىنشى بابىنا سايكەس ءبىر عانا كانديداتتى، ءبىزدىڭ رەسپۋبليكالىق ۇيىمنىڭ مۇشەسى ەمەس، قوعام بەلسەندىسى مۇحتار تايجاندى قازاقستان پرەزيدەنتتىگىنە ۇمىتكەر رەتىندە ۇسىنىپ وتىر»، دەيدى پودپولكوۆنيك مۇرات مۇحامەدجانوۆ.

ايتا كەتەيىك، بۇل رەسپۋبليكالىق ۇيىمنىڭ سوڭعى شەشىمى ەمەس. جيىن ناقتى ۇسىنىلاتىن كانديداتتى جالپى جينالىستا، داۋىسقا سالۋ ارقىلى انىقتايدى. سوڭعى شەشىم سول جيىننان سوڭ بەلگىلى بولادى. ال جيىننىڭ قاشان جانە قاي جەردە وتەتىنى تۋرالى كەيىنىرەك انىقتالماق.

ازىرگە بارى وسى. اتالعان ۇيىم پرەزيدەنتتىككە مۇحتار تايجاننىڭ كانديداتۋراسىن ۇسىندى دەگەن اقپارات الەمجەلىگە تارادى. ءبىز مۇحتار بولاتحانۇلىنىڭ وزىمەن پىكىرلەسىپ، بۇل شەشىم تۋرالى ويىن سۇراماق بولدىق. الايدا بايلانىس ورناتا المادىق.  الداعى ۋاقتا مۇحتار مىرزانىڭ ءوز ويىن دا سۇراپ بىلەتىن بولامىز.

Abai.kz