جاستاردىڭ دۇرىس جولدى تاڭداۋىنا ءبىز جاۋاپتىمىز
مەن 1996 جىلى 17 جاسىمدا فيزمات مەكتەبىن بىتىرگەن سوڭ، جوعارعى ماتەماتيكادان ورتا ازيا، رەسەي وليمپياداسىنا قاتىستىم. ول كەزدە مەنىڭ ورىس ءتىلىم ناشارلاۋ ەدى. تمد ەلىنەن كەلگەن بالالار مۇنى بەتىمە باسىپ، مەنى ابدەن مازاق قىلدى. ايتەۋىر بۇرىن اۋىلدا ءوسىپ، دالادا ەر جەتىپ، كۇرەسپەن اينالىسقاندىعىمنىڭ وسى كەزدە ماعان پايداسى ءتيدى. سوندا ولاردىڭ مۇعالىمدەرى دە: ء"اي، سەندەر، جارىستا جەڭە المايسىڭدار!" - دەپ ەدى. "سەندەرگە قايداعى جەڭىس؟" - دەپ تە ايتىپ قالدى. شىنى كەرەك، مەن نامىستانىپ كەتتىم. مەنىڭ جەتەكشىم دە كۇرەستەن چەمپيون، ءوزى باتىر اعاي ەدى. "ال ەندى ازامات، باۋىرىم، نامىستى قولدان بەرمەۋ كەرەك", - دەدى. وسى نامىس مەنى قايرادى، بويىما كۇش بەردى.
سودان كۇندىز-ءتۇنى ۇيقى جوق. بار كۇشىمىزدى سالىپ دايىندالدىق. وليمپيادا ءبىر اپتاعا دەيىن جالعاستى. سوڭىندا ابىروي بولىپ مەن ءبىرىنشى ورىندى يەلەندىم. سول كەزدە مەنى مازاق قىلعانداردىڭ ءتۇرىن كورسەڭىزدەر عوي. ەندى سىرتىمنان: "بۇل فيزمات مەكتەبىنىڭ بالاسى ەكەن", - دەپ ايتا باستادى. قازاقتىلدى فيزمات مەكتەبىندە بىرگە وقىعان 3 دوسىم كانادادا وتكەن ماتەماتيكادان xالىقارالىق وليمپيادانىڭ جۇلدەگەرلەرى بولىپ ورالدى. سول دوستارىم كەيىننەن جۇزدەگەن قازاق بالالارىن دايىنداپ جەڭىمپاز قىلدى.
قازىر مىقتى جاستار كوپ. ولار بيزنەستە، عىلىمدا - ءار سالادا ءجۇر. ۇلت تاعدىرىن ويلاۋ ءۇشىن الدىمەن سول باۋىرلارىمىزدى العا تارتۋىمىز كەرەك. "بۇلاق كورسەڭ، كوزىن اش" دەمەكشى، ولاردىڭ قابىلەتتەرىن دامىتۋ ارقىلى بيىك شىڭداردى باعىندىرىپ، ەلىمىزدى شارتاراپقا پاش ەتۋىنە ۇلەس قوسۋىمىز قاجەت. بۇگىندە دە ولاردىڭ سانى جۇزدەگەن، ءتىپتى مىڭداعان. باسقا ۇلتتارعا ءبىلىم مەن قابىلەت جاعىنان بوي بەرمەيدى. قاي جاعىنان الساڭىزدار دا، وق بويى وزىق تۇراتىن جاستاردىڭ قاراسى كوپ. ال ولاردىڭ دۇرىس جولدى تاڭداۋىنا تىكەلەي ءبىز جاۋاپتىمىز.
ازاماتحان ءامىرتايدىڭ facebook پاراقشاسىنان
Abai.kz
