جۇما, 29 ناۋرىز 2024
دەپ جاتىر 5137 4 پىكىر 26 ءساۋىر, 2019 ساعات 09:12

پوليەتيلەن پاكەتتەردى پايدالانۋعا تىيىم سالىنادى

ەنەرگەتيكا مينيسترلىگى ازىرلەنىپ جاتقان جاڭا قر ەكولوگيالىق كودەكس اياسىندا قازاقستان اۋماعىنداعى بولشەك ساۋدادا سىيىمدىلىعى كىشكەنتاي پوليەتيلەن پاكەتتەردى پايدالانۋعا تىيىم سالۋدى كوزدەپ وتىر، - دەپ حابارلايدى قازاقپارات ءتىلشىسى ۆەدومستۆونىڭ ءباسپاسوز قىزمەتىنە سىلتەمە جاساپ.

«بۇل باستامانىڭ قاجەتتىلىگى مىنادا: نەگىزىنەن پوليەتيلەن پاكەتتەر قورشاعان ورتاعا جانە ادامداردىڭ دەنساۋلىعىنا ەلەۋلى زيان كەلتىرەدى. قازاقستانداعى سىيىمدىلىعى شاعىن پوليەتيلەن پاكەتتەردى ساتۋعا كەزەڭ-كەزەڭىمەن تىيىم سالىنادى. ءبىرىنشى كەزەڭدە پوليەتيلەن پاكەتتەردى تەگىن تاراتۋعا شەكتەۋ قويىلادى. وسى كەزەڭدە حالىق اراسىندا اسىرەسە قورشاعان ورتاعا جانە ادامداردىڭ دەنساۋلىعىنا پوليەتيلەن پاكەتتەردىڭ قانشالىقتى زيان ەكەنىنە بايلانىستى كەڭىنەن ۇگىت جۇرگىزۋ قاجەت. سونىمەن بىرگە، بالامالى ەكولوگيالىق قاپتاما ءوندىرىسىن ىنتالاندىرۋ ماسەلەسى دە شەشىلۋى ءتيىس. ەكىنشى كەزەڭدە ولاردىڭ ەل اۋماعىندا ساتىلۋىنا تولىق تىيىم سالىنادى. پوليەتيلەن پاكەتتەردى پايدالانۋداعى بۇل شەكتەۋ ماسەلەنى جان-جاقتى ءارى ەگجەي-تەگجەيلى زەرتتەۋدەن كەيىن ەنگىزىلەدى»، - دەلىنگەن حابارلامادا.

پلاستيكالىق پاكەتتەر مەن پوليپروپيلەندەردىڭ كوبى مۇناي مەن تابيعي گازدان جاسالعان ماتەريالدان دايىندالادى. ال ولاردىڭ ءوندىرىسى كەزىندە اۋاعا تارايتىن زياندى حيميالىق زاتتار كليماتتىڭ جاھاندىق دەڭگەيدە وزگەرۋىنە ىقپال ەتەتىنى ەسكەرىلۋى كەرەك. پوليپروپيلەن تولىعىمەن جويىلۋى ءۇشىن 100 جىلدان استام ۋاقىت قاجەت. پلاستيكالىق فراگمەنتتەر پوليحلورلانعان بيفەنيلدەر مەن پوليتسيكلدى كومىرسۋتەكتەر سياقتى زياندى زاتتار بولەدى. وسىلايشا، پلاستيكالىق پاكەتتەر قورشاعان ورتانى لاستايدى. جەڭىل بولعاندىقتان، پلاستيكالىق پاكەتتەر جەل مەن سۋ ارقىلى تاسىمالدانا بەرەدى. بۇل رەتتە قالالار مەن جاعالاۋ ايماقتارى ەرەكشە لاستانىپ جاتقانىن ايتا كەتۋ كەرەك.

مينيسترلىكتىڭ حابارلاۋىنشا، 2018 جىلدىڭ قورىتىندىسى بويىنشا قازاقستاندا تۇرمىستىق قاتتى قالدىقتاردى بولەك جيناۋ، سۇرىپتاۋ جانە قايتا وڭدەۋ جۇمىستارىن جۇرگىزەتىن كاسىپورىندار سانى 150-گە دەيىن ارتقان. ال 2016 جىلى ونداي كومپانيالاردىڭ سانى بار-جوعى 115 ەدى. قازاقستانداعى 51 ەلدى مەكەندە جەكە جيناق جۇيەسى، ال 30 ەلدى مەكەندە سۇرىپتاۋ جۇيەسى ەنگىزىلگەن.

بۇل باعىتتاعى جۇمىس جالعاسىپ جاتىر. اتاپ ايتقاندا، 2019 جىلدىڭ قاڭتارىندا ماڭعىستاۋ وبلىسىنىڭ مۇنايلى اۋدانى باسقۇدىق اۋىلىندا سۇرىپتاۋ قۋاتى جىلىنا 50 مىڭ توننا بولاتىن ستانسا ىسكە قوسىلعان. سول سەكىلدى، وسكەمەن قالاسىندا قاتتى تۇرمىستىق قالدىقتار پوليگونىنا قۋاتى جىلىنا 100 مىڭ توننا بولاتىن سۇرىپتاۋ جەلىسى ورناتىلعان. ال 2019 جىلى اتىراۋ قالاسىنىڭ پوليگونىندا قالدىقتاردى سۇرىپتاۋ كەشەنىن ەنگىزۋ جوسپارلانىپ وتىر. سول سياقتى قىزىلوردا وبلىسىندا مەملەكەتتىك-جەكەمەنشىك سەرىكتەستىك شەڭبەرىندە قاتتى قالدىقتاردى جيناۋ، تاسىمالداۋ، سۇرىپتاۋ، جويۋ، كادەگە جاراتۋدىڭ ورتالىقتاندىرىلعان باسقارۋ جۇيەسى قۇرىلادى.

 

Abai.kz

4 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2277
عيبىرات

قايسار رۋحتى عازيز جان

مۇحتار قۇل-مۇحاممەد 3594