قر دەنساۋلىق ساقتاۋ ءمينيسترى ەلجان ءبىرتانوۆ الماتى قالاسىنا ءىسساپارى كەزىندە  ەلىمىزدەگى مەديتسينالىق مەكەمەلەردە قانداي  رەفورما بولاتىنىن ايتتى.

دەنساۋلىق ساقتاۋ مينيسترلىگى  قالا، اۋدان ورتالىقتارىنداعى ءبىر-بىرىنە جاقىن ورنالاسقان اۋرۋحانالاردى بىرىكتىرىپ، مەديتسينالىق مەكەمەلەردى بىرىڭعاي مەنەدجمەنتكە كوشىرۋدى جوسپارلاپ وتىر. ماسەلەن، الماتى قالاسىنداعى  كوپپروفيلدى  بالالار اۋرۋحاناسى  جۇقپالى اۋرۋلار اۋرۋحاناسىمەن،  كارديوورتالىق پەن جەدەل مەديتسينالىق كومەك اۋرۋحاناسى قوسىلادى. سوندا، مىقتى ماماندار ءبىر جەرگە شوعىرلانادى دا، كەز-كەلگەن ناۋقاسقا شۇعىل كومەك كورسەتىلەدى، دەنساۋلىق ساقتاۋ سالاسىندا شىعىن ۇنەمدەلەدى.

«جانساقتاۋ،  قابىلداۋ ، وپەراتسيا بولىمدەرى  ءبىر جەردە  ورنالاسسا،  مامان تاپشىلىعى بولمايدى. ءبىر مەزەتتە كوپ ادامعا ەش قيىندىقسىز كومەك كورسەتىلەدى. قالعان قىزمەت   العاشقى مەدەتسينالىق  سانيتارلىق  كومەك اياسىندا رەتتەلەدى.  400-500 اسا ورنى بار اۋرۋحانانىڭ  عانا جۇمىسى  ءتيىمدى سانالادى. سوندىقتان،  شاعىن اۋرۋحانالاردان  ارىلۋىمىز كەرەك.  قازىر قازاقستانداعى مەديتسينالىق مەكەمەلەر ورتاشا ەسەپپەن 140 ادامعا  ارنالعان. ارينە، ەلدى مەكەندەردەگى مەكەمەلەرگە تيىسپەيمىز. ولاردى كەرىسىنشە، كۇردەلى جوندەۋدەن وتكىزىپ، حالىقارالىق ستاندارتارعا ىڭعايلاۋ كەرەك»، - دەدى ەلجان ءبىرتانوۆ.

الماتى  قالاسىندا جەرگىلىكتى، رەسپۋبليكالىق بيۋدجەت ەسەبىنەن جانە كاسىپكەرلەردىڭ كومەگىمەن جاڭا نىساندار سالىنادى. سونداي-اق،  مەملەكەتتىك-جەكەمەنشىك ارىپتەستىك اياسىندا مەديتسينالىق مەكەمەلەردى سەنىمدى قولعا تاپسىرۋ جوسپارلانعان. ناتيجەسىندە اۋرۋحانا، ەمحانانىڭ مەنەدجمەنتى جاقسارادى، ولاردى كۇردەلى جوندەۋدەن وتكىزۋ  ۇشىن ينۆەستورلار تارتۋعا مۇمكىندىك تۋادى.

الماتى پيلوتتىق جوبا رەتىندە  مەديتسينا سالاسىن ساندىق جۇيەگە كوشىرگەن.  بۇل دارىگەرلەردىڭ جۇگىن جەڭىلدەتىپ قانا قويماي، اقپاراتتى ساقتاۋ، مەديتسينالىق كومەك، مەديكامەنتتەردى تىركەۋدىڭ ساپاسىن ارتتىرادى، اكىمشىلىك قىزمەتكەرلەردىڭ سانى قىسقارادى. ال ءمامس جۇزەگە اسسا، شىعىن تاعى ازايادى.

«ەلباسى بيىل تابىسى  تومەن مەملەكەتتىك اۋرۋحانا، ەمحانا قىزمەتكەرلەرىنىڭ جالاقىسىن  كوتەرۋدى  تاپسىردى.  بۇل جەردە كاسىپكەرلەر دە الەۋمەتتىك جاۋاپكەرشىلىكتى سەزىنىپ، اتسالىسۋى ءتيىس. ال الماتىدا جەكەمەنشىك كلينيكالار كوپ. مەديتسينالىق ساقتاندىرۋ قورى  ولارمەن  كەلىسىمگە وتىردى. ياعني، كلينيكالار ءمامس جۇيەسى اياسىندا  قولداۋ كورەدى.  مۇنىڭ ءبارى حالىققا مەديتسينا  قولجەتىمدى بولۋ  ءۇشىن كەرەك»، - دەدى مينيستر.

جەدەل جاردەمگە  بيۋدجەتتەن  جاردەم بولادى

دەنساۋلىق ساقتاۋ ءمينيسترى  ەلجان ءبىرتانوۆ  الماتىداعى ءىسساپارى بارىسىندا  جەدەل مەديتسينالىق كومەك كورسەتەتىن ورتالىققا باردى.  مەكەمە  حالىقارالىق ستاندارتقا ساي،  قابىلداۋ بولىمىنە تۇسكەن ناۋقاستاردى ءبىرىنشى ىرىكتەپ الىپ، سودان كەيىن ەمدەيدى. مۇندا ماماندار ەڭبەكتەگەن بالادان، ەڭكەيگەن كارىگە دەيىن جەدەل جاردەم كورسەتەدى.

كاسىپكەرلەردىڭ قاتىسۋىمەن  №2 قالالىق اۋرۋحانا جانىنان بالالارعا ارنالاعان ەكىنشى جەدەل جاردەم كورسەتۋ ورتالىعى اشىلعان. وندا دا قازىرگى تالاپقا ساي قابىلداۋ، جوعارى تەحنولوگيالى حيرۋرگيا بولىمدەرى، وپەراتسيالىق بلوك بار. بيزنەسمەندەردىڭ الەۋمەتتىك جاۋاپكەرشىلىگىنىڭ  ارقاسىندا، دارىگەرلەر قانشاما  بالانى  دەر كەزىندە قاراپ، امان الىپ قالۋدا.

ەلجان ءبىرتانوۆ، قر دەنساۋلىق ساقتاۋ ءمينيسترى: «جەدەل شۇعىل مەديتسينالىق كومەكتىڭ ساپاسىن ارتتىرۋ ازاماتتار ءۇشىن  وتە  ماڭىزدى. پروبلەما بار: الماتى - مەگاپوليس. قالاعا ايماقتاردان كوشىپ كەلگەندەر كوپ. ال وزگە وڭىرلەردىڭ  تۇرعىندارى ەسەپكە الىنباعان. مەديتسينالىق ساقتاندىرۋ قورىنان بۇل سالاعا جەتكىلىكتى قارجى بولىنبەگەن.  ءبىز بۇل ماسەلەنى  بىرلەسىپ شەشۋدەمىز. جەدەل مەديتسينالىق جاردەمنىڭ ساپاسىن جاقسارتۋ ءۇشىن قازىنادان  قوسىمشا  قارجى بولىنەدى.   بىراق مينيسترلىكتىڭ تالاپتارى، حالىقارالىق ستاندارتتار ورىندالۋى ءتيىس».

سونىمەن قاتار، مينيستر الماتى قالاسىنداعى  جەدەل  شۇعىل جاردەم كورسەتۋ  اۋرۋحاناسىن دا ارالادى. بۇل تاريحى تەرەڭدە جاتقان، ەلىمىزدەگى ەسكى مەديتسينالىق مەكەمەنىڭ ءبىرى. جەدەل مەديتسينالىق كومەكتىڭ نەگىزى وسىندا قالانعان دەۋگە بولادى. اتالعان اۋرۋحانادا دا 3ن جۇيەسى ەنگىزىلگەن. قابىلداۋ بولىمىنە تۇسكەن ناۋقاستار ىرىكتەلەدى.

«الماتى ناۋقاستاردىڭ مۇڭ-مۇقتاجىن تىڭداپ، ادامدارمەن اشىق جۇمىس ىستەۋ  جاعىنان وزگەلەرگە ۇلگى. قالادا تۇرعىندارمەن بايلانىس ورناتۋ ءۇشىن  ارنايى كەڭسە اشىلعان، وندا  ماماندار كوپتىڭ ارىز-شاعىمىن  تىڭدايدى. بۇل  مەديتسينالىق كومەكتى  ساپالى، قولجەتىمدى ەتۋگە سەپتىگىن تيگىزەدى» - دەدى ەلجان ءبىرتانوۆ.

الماتى  - كورپوراتيۆتىك باسقارۋ جۇيەسىن جۇزەگە اسىرعان العاشقى قالالاردىڭ ءبىرى. شاھاردا جاقىندا عانا باقىلاۋشىلار كەڭەسى قۇرىلدى. كەڭەستىڭ قۇزىرى كەڭ. قۇرامىنا كاسىپكەرلەر، قوعام بەلسەندىلەرى مەن باق وكىلدەرى كىرەدى.  ول كلينيكالاردىڭ شىعىنىن قاداعالاپ، ترانسپارەنتتى باسقارۋعا مۇمكىندىك بەرەدى. ءبىرىنشى باسشىلاردى تاعايىنداعاندا ۇمىتكەرلەردى  اشىق تالقىعا سالعان دا  الماتى.  ماسەلەن، ورتالىق اۋرۋحانانىڭ باس دارىگەرىنىڭ ورنىنا  8 كانديدات ءوتىنىش بىلدىرگەن. ءادىل تاڭداۋ جاسالدى.  بۇل تاجىريبەنى بارلىق ءوڭىر پايدالانۋ كەرەك. ورتالىق اۋرۋحانا، ەمحانانىڭ باس دارىگەرلەرى حالىققا جاقىن جۇرۋگە، قوعامعا قىزمەت ەتۋگە مىندەتتى.

Abai.kz