سەيسەنبى, 17 قىركۇيەك 2019
الەۋمەت 1338 5 پىكىر 13 مامىر, 2019 ساعات 16:47

ە. اشىقباەۆ: سيريادان قايتارىلعاندار لاڭكەستىككە قاتىسى بولسا، جازالانادى

سيريادان قايتارىلعان ادامداردىڭ لاڭكەستىك قىلمىستارعا قاتىسى بارلارى جازاعا تارتىلادى. بۇل تۋرالى «جۋسان-2» وپەراتسياسىنا قاتىستى وتكەن ءباسپاسوز ءماسليحاتىندا قر سىرتقى ىستەر ءمينيسترىنىڭ ورىنباسارى ەرجان اشىقباەۆ ءمالىم ەتتى.

«7-9 مامىردا اسكەري قاقتىعىس بولعان ايماقتاردان 231 قازاقستاندىق ەلگە قايتارىلدى. ولاردىڭ ىشىندە 16 ەر ادام، 59 ايەل جانە 156 بالا بار. بۇل گۋمانيتارلىق وپەراتسيا بىرىنشىدەن قارۋلى شيەلەنىس اۋماقتارىندا بولعان ءبىزدىڭ ازاماتتارىمىزدى قۇتقارۋعا، سونداي-اق ولاردىڭ بالالارىنا قازاقستان رەسپۋبليكاسىنىڭ تولىققاندى ازاماتتارى رەتىندە بەيبىت ءومىر سۇرۋگە مۇمكىندىك بەرۋدى كوزدەدى»، - دەپ توقتالدى ە. اشىقباەۆ.

ونىڭ سوزىنە قاراعاندا، اتالعان ادامداردىڭ اراسىندا لاڭكەستىك قىلمىستارعا قاتىسى بارلار جازاعا تارتىلادى.

«لاڭكەستىك ءىس-قيمىلدارعا جانە زاڭسىز جاۋىنگەرلىك ارەكەتتەرگە قاتىسقاندارعا توقتالساق، قىلمىستارعا قاتىستىلىعى دالەلدەنگەن جاعدايدا، ولار قر زاڭناماسىنا سايكەس قىلمىستىق جاۋاپكەرشىلىككە تارتىلادى. بۇل گۋمانيتارلىق وپەراتسيا اقش-تىڭ قولداۋىمەن جۇزەگە اسىرىلدى، سونداي-اق بۇل جوبادا سيريا دەموكراتيالىق كۇشتەرىنىڭ ماڭىزدى ءرولىن اتاپ وتكەن ءجون»، - دەدى ءمينيستردىڭ ورىنباسارى.

بۇدان بۇرىن حابارلانعانداي، جاقىندا سيريادان 231 قازاقستان ازاماتىنىڭ ەلگە جەتكىزىلۋىنە بايلانىستى قر پرەزيدەنتى قاسىم-جومارت توقاەۆ مالىمدەمە جاسادى.

«مەنىڭ تاپسىرمام بويىنشا 7 جانە 9 مامىر كۇندەرى سيريادان 231 قازاقستان ازاماتى ەلگە جەتكىزىلدى، ونىڭ 156-سى - بالالار، دەنى مەكتەپ جاسىنا دەيىنگىلەر، سونىڭ ىشىندە 18-ءى - جەتىم بالالار. بۇل اۋقىمدى گۋمانيتارلىق اكتسيا - تۇڭعىش پرەزيدەنت - ەلباسى نۇرسۇلتان نازارباەۆتىڭ تاپسىرماسىمەن بيىل قاڭتار ايىندا جۇرگىزىلگەن «جۋسان» وپەراتسياسىنىڭ جالعاسى»، - دەلىنگەن مەملەكەت باسشىسىنىڭ مالىمدەمەسىندە.

ەسكە سالساق، بيىل قاڭتاردا ەلباسى سيريادان قازاقستان ازاماتتارىن ەۆاكۋاتسيالاۋ بويىنشا گۋمانيتارلىق وپەراتسياعا بايلانىستى مالىمدەمە جاسادى.

دەرەككوز: قازاقپارات

Abai.kz

5 پىكىر