اقتاۋدىڭ كوشە تازالاۋشىلارى مەن كولىك جۇرگىزۋشىلەرى ءوز جۇمىستارىن ىستەۋدەن باس تارتتى. سەبەبى ولار تاعى دا ايلىقتارىن الماعان. قىزمەتكەرلەردىڭ ايتۋىنشا، كاسىپورىن اقشاسى سوڭعى التى ايدا ۇنەمى ۇستالىپ، 150 ميلليون تەڭگەگە قارىزعا باتقان. ال، شەنەۋنىكتەر قاراپايىم ازاماتتاردى ايىپتايتىن كورىنەدى.

بۇگىندە اقتاۋ قالاسىندا 400 ادام ءساۋىر ايىنداعى جالاقىلارىن تالاپ ەتىپ وتىر. قىزمەتكەرلەردىڭ ايتۋىنشا، ولار جارتى جىلدان بەرى جالاقىلارىن تەك داۋ-جانجالمەن الاتىن بولعان. ال، كاسىپورىننىڭ ايتۋىنشا، باسشىلىقتا ەشقانداي كىنا جوق. ەڭ باستىسى، اكىمدىك كاسىپورىنعا 150 ميلليون تەڭگە قارىز دەيدى.

ايناش يديتباەۆا:

- ءبىز ۇنەمى جالاقىنى “قاشان الامىز؟”،  “نەگە كەشىگەدى؟” دەپ شۋلاتىپ ءجۇرىپ قولعا تيگىزەمىز. مىنە ولار تاعى دا “ەرتەڭ، ەرتەڭ” دەيدى. ال، ەدەن جۋشىلار ءتىپتى از اقشا الادى. سوعان قاراماستان ولار تازالىققا قاجەتتى زاتتاردى دا وزدەرى ساتىپ الۋعا ءماجبۇر.

ناۋرىزباي تەنەرباەۆ:

- ولار بىزگە: “وسى ايدا شىداڭىزدار، كەلەسى ايدا ءبارى جاقسى بولادى” دەپ ۇنەمى ۋادە بەرەدى. ۋادە ايتىلعان جەرىندە قالادى. ايلىق ادەتتەگىدەي كەشىگەدى. ال، ءبىزدىڭ بالا-شاعامىز، كرەديتىمىز، كۆارتيرامىزدىڭ اقشاسى بار. بارىندە وسى پروبلەما.

قايرات حايرۋشەۆ:

- ءۇش ايعا جۋىقتادى. وكىنىشكە قاراي، بىزگە بيۋدجەتتەن ەشقانداي اقشا بولىنبەيدى.

وسى ماسەلە بويىنشا جۇمىسكەرلەر اقتاۋ قالاسىنىڭ اكىمىمەن كەزدەسكەن. اكىمدىكتىڭ ايتۋىنشا، قازىناعا تۇسكەن سالىق مولشەرى وتە از. سول سەبەپتى بيۋدجەتتە اقشا جوق. الايدا، شەنەۋنىكتەر وزدەرىنە تيەسىلى سالىقتى جاقىندا تولەيتىندەرىن ايتىپتى.

جانگەلدى اۋباكىروۆ، اقتاۋ قالاسى اكىمىنىڭ ورىنباسارى:

- ادامدار سالىق تولەمەيدى، از تولەيدى، سوندىقتان قازىر... سالىق تولەۋشىلەردىڭ ءبىر ايلىق قارىزى بار. ءبىر اي. سول اقشا قالاي تۇسەدى، بىردەن ايلىقتارىن بەرەمىز.

قىسقاسى، كاسىپورىن اكىمشىلىكتى، اكىمشىلىك سالىق تولەۋشىلەردى ايىپتايدى. ءسويتىپ، ءبىر-بىرىنە سىلتەپ وتىرعاندا، قاراپايىم جۇمىسشىلار وزىنە تيەسىلى ناپاقاسىنان قاعىلىپ وتىر. ال، ولاردىڭ بالا-شاعاسىن، القىمىنان الىپ وتىرعان نەسيە مەن پاتەراقىسىنا باس قاتىرىپ وتىرعان ەشكىم جوق. سوندىقتان، ولارعا قازىر ەشقانداي ساياسي ناۋقان مەن بوس ۋادەنىڭ ماڭىزى جوق.

نۇربيكە بەكسۇلتانقىزى

Abai.kz