كەشە جۋرناليست، قوعام بەلسەندىسى ساۋلە ابىلداحانقىزىنىڭ ۇستىنەن بىرنەشە كەلىنشەكتىڭ ارىز جازعانى تۋرالى اقپارات شىقتى. Yvision سايتىنىڭ مالىمەتىنە سايكەس، ساۋلە ابىلداحانقىزى كوپبالالى انالاردان 2 ميلليون تەڭگە كولەمىندە اقشا العان.

سونداي-اق، انالاردىڭ ءبىرى "2019-جىلدىڭ 31-مامىر كۇنى تەميريازوۆ پەن جوروكوۆ كوشەلەرىنىڭ قيىلىسىندا ورنالاسقان تۇرعىن ءۇي باسقارماسى ماڭىندا ساۋلە مەنى ميتينگكە شىعۋعا ۇگىتتەدى. ەگەر ميتينگكە شىقساڭ ساعان ءۇي ماسەلەسىن شەشىپ بەرەمىن دەپ ايتتى" دەپ شاعىم تۇسىرگەن. ازىرگە ارىزدانۋشىلاردىڭ اراسىندا ۇلجالعاس ساتقىنبەكوۆا دەگەن كەلىنشەكتىڭ عانا ەسىمى بەلگىلى بولىپ وتىر.

ءبىز بۇل جاعدايعا قاتىستى ساۋلە ابىلداحانقىزى مەن ونىڭ ادۆوكاتى ابزال قۇسپان مىرزانىڭ پىكىرىن بىلگەن ەدىك.

ساۋلە ابىلداحانقىزى، جۋرناليست: “بۇل كۇشتىك قۇرىلىمداردىڭ قولدان ۇيىمداستىرىپ وتىرعان جالاسى”

- بۇل تاپ-تازا جالا. بۇل كۇشتىك قۇرىلىمداردىڭ ماعان قارسى قولدان ۇيىمداستىرىپ وتىرعان دۇنيەسى. جانە دە انالاردىڭ ساعىن سىندىرۋ ءۇشىن بار ويلاپ تاپقان تاسىلدەرى. ونىڭ ۇستىنە مەن “قوسانوۆتى قولدايىق”، “ازاماتتتىق قوعام قۇرايىق” دەپ حالىققا كوبىرەك ۇندەۋ جاساپ ءجۇرمىن عوي. مەنىڭ سونداي پوزيتسيام ارقىلى حالىق ويانىپ كەتپەسىن، وسى حالىقتى ءتۇرتىپ، وياتىپ ءجۇر، وسى بىرەۋدىڭ اۋزىن جابايىق دەگەن-اۋ شاماسى. ياعني، بۇل قولدان ۇيىمداستىرىپ، جاساپ وتىرعان قيتۇرقى  ارەكەت.

ۇلجالعاس ساتقىنبەكوۆا دەگەن ادامدى ومىرىمدە كورگەن ەمەسپىن،  تانىمايتىن، بىلمەيتىن ادام. ول دا پوليتسەيلەردىڭ ادەيى ۇيىمداستىرىپ وتىرعان ءوز ادامى دەپ ەسەپتەيمىن.

مەن ەشقاشان بىرەۋدەن ءبىر تيىن العان ەمەسپىن. جاعدايى تومەن 5 انانى تىكەلەي ەفيرگە شىعارىپ، “بۇل انالاردىڭ كارتوچكالارى جوق ەكەن. وسىلارعا كومەكتەسەمىن دەگەندەرىڭ مەنىڭ كارتاما اقشا اۋدارۋعا بولادى” دەدىم. بىراق، ول كىسىلەرگە اۋدارىلعان اقشا كارتوچكادا تۇر. قانشا تۇسكەنى دە، مەن كىمگە قانشا ارتىعىمەن كومەكتەسكەنىم دە تۇر. سوندىقتان، ول تۇسكەن اقشانىڭ ءاربىر تيىنى ءۇشىن ەسەپ بەرە الامىن. ال، باسقا ەشقاشان ەشكىمنەن ءوزىم ءۇشىن ءبىر تيىن العان جوقپىن. المايمىن دا. مەن ەكى بالامەن جالعىز، جەسىر قالىپ، ءبىر ءۇزىم نان، جەيتىن تاماق تاپپاي  وتىرعان كەزدە دە ەشكىمگە الاقان جايعان ەمەسپىن. ول مەنىڭ ازاماتتىق ار-وجدانىما، ومىرلىك پرينتسيپتەرىمە، قاعيدالارىما جات نارسە.

ال، مەنىڭ انالاردى اشىق ميتينگكە شاقىرعانىمدى دالەلدەسىن. ول دا وتىرىك، جالا.

ابزال قۇسپان، زاڭگەر: “مەن ساۋلەنى جالانىڭ قۇربانى قىلىپ قاراپ وتىرا المايمىن”.

- بۇل بارىپ تۇرعان - پروۆاكاتسيا. بيلىكتىڭ قولدان ۇيىمداستىرىپ وتىرعان شاراسى. وكىنىشكە قاراي، ءبىزدىڭ قۇقىق قورعاۋ ورگاندارى مۇنداي ىسپەن وتە ءجيى اينالىسادى. وسىنداي قولدان ۇيىمداستىرىلعان ءىس-شارالاردى توقتاتپايتىن بولساق، ءبىز ەشقاشان ەل بولمايمىز. مۇنى تالاي جەردە ايتقانمىن.

ساۋلەنىڭ ايتىپ جۇرگەن سىن-پىكىرلەرىنىڭ بارلىعى دامىعان، وركەنيەتتى ەلدەردە قالىپتى جاعداي. ەشكىم بۇل مەملەكەتكە ريزا بولۋعا مىندەتتى ەمەس. بۇل سىن-پىكىرگە بايلانىستى تەك، قازاقستان سياقتى دامىماي قالعان مەشەۋ ەلدەردە بولاتىن رەاكتسيا.

ساۋلە قانداي زاڭسىز ىسكە باردى؟ ءيا، قوعامدا وسىنداي زاڭسىزدىقتار جالعاسا بەرەتىن بولسا، ميتينگكە شىعامىن دەدى. بىراق، ەشكىمدى ميتينگكە شاقىرعان جوق. سوعان بولا ادامداردان ارىز جيناپ الىپ ۇيىمداستىرۋدىڭ تۇك تە قيىندىعى جوق. ونىڭ چاتىندا 70 مىڭنان استام انا وتىردى. 70 مىڭنىڭ ىشىنەن 7 ادام تاۋىپ، وتىرىك ارىز ۇيىمداستىرۋ ولار ءۇشىن تۇك ەمەس. ءبىزدىڭ ادامدار وكىنىشكە قاراي، وسىنداي وتىرىكتەرگە ءجيى بارادى. ءبىز جالا جابۋعا بولمايتىنىن تۇسىنبەي كەلە جاتىرمىز. بىراق، اينالىپ كەلگەندە سول ادامداردىڭ وزدەرى زارداپ شەگەدى. ەرتەڭ سول ارىز جازعانداردىڭ وزدەرىنىڭ بالالارى سولاي ءىستى بولادى. سوندىقتان، ءبىز بىرەۋدىڭ وبالىنا قالۋعا بولمايتىنىن تۇسىنۋگە ءتيىسپىز.

بىزدە كەز-كەلگەن ادامعا جالا جاپقىزىپ، حالىقتىڭ الدىندا بەدەلى مەن تانىمالدىعى ارتىپ بارا جاتقان ادامدارعا وسىنداي لاس ارەكەتتەر قولدانادى. مۇنى پوليتسيا دا، قۇقىق قورعاۋ ورگاندارى دا جاقسى بىلەدى.

مەن ءوزىم جاڭاوزەن سوتىنا قاتىسقان كەزىمدە، ماعان قايتا-قايتا پوليتسيا تاراپىنان ەسكەرتۋ جاسالعان. 74 جابىرلەنۋشىنى جالعىز ءوزىم قورعاپ جاتقاندا “كەلمەي-اق قوي” دەگەن سمس-تەر، تەلەفونمەن حابارلار تۇسكەن. سول كەزدە ءبىر ايەل مەنىڭ ۇستىمنەن “ابزال قۇسپانوۆ  مەنى زورلاعىسى كەلدى” دەپ ارىز جازعان. مەنى سول ءۇشىن ادۆوكات باسىممەن سوتتاپ جىبەرە جازداعان. سوندىقتان تالاي ادامدى قورعاپ جۇرگەن ادۆوكات رەتىندە مۇنداي جاعدايلار ماعان جاقسى تانىس. جانە، ساۋلەنىڭ قانداي ادام ەكەنىن دە جاقسى بىلەمىن. سوندىقتان، مۇنىڭ 100 پايىز جالا ەكەنىن تولىق سەنىممەن ايتا الامىن!

مەن قازىر استانادا ءبىر ۇلكەن ءىستىڭ اياسىنان شىعا الماي جاتىرمىن. بىراق، ساۋلەمەن بايلانىستامىن. بايلانىستا بولا بەرەمىن. مىندەتتى تۇردە بۇل ىسكە ارالاسامىن!

مەن ساۋلەنى جالانىڭ قۇربانى قىلىپ قاراپ وتىرا المايمىن!

ءبىز اتالعان جاعدايعا بايلانىستى الماتى قالالىق ىشكى ىستەر دەپارتامەنتىنە بىرنەشە رەت حابارلاسقان ەدىك. الايدا، ولارمەن بايلانىسۋ مۇمكىن بولمادى. الداعى ۋاقىتتا بۇل ىسكە قاتىستى ءىىد ءنىڭ دە رەسمي جاۋابىن جاريالايتىن بولامىز.

نۇربيكە بەكسۇلتانقىزى

Abai.kz