اتىراۋ وبلىسىنىڭ اكىمى 6,3 ميلليارد تەڭگەگە جاڭا اكىمشىلىك عيماراتىن سالۋ تۋرالى شەشىم قابىلدادى. اتالعان ءزاۋلىم ساراي وبلىستىق “اتىراۋ” مادەنيەت ورتالىعىنىڭ ورنىندا بولماق.

بۇل جوبانىڭ قۇنى 6,3 ميلليارد تەڭگەنى قۇرايدى. باستاپقىدا اتىراۋ اكىمدىگى مەملەكەتتىك قازىنادان 7,5 ميلليارد تەڭگە سۇراعان. الايدا، 1 ميلليارد تەڭگەنىڭ ارتىق بولاتىنىن ارتىنان تۇسىنگەن سەكىلدى.

جوسپار بويىنشا جاڭا اكىمدىك التى قاباتتان تۇرادى. ياعني، 54 مەتردەن 15 مەترگە دەيىن (بۇعان دەيىنگى اكىمدىك عيماراتى 117x12 بولعان). ال، عيماراتتى سالۋعا «كازسترويپودرياد» استانا قۇرىلىس كومپانياسى مەردىگەر رەتىندە تاڭدالىپتى.

مۋنيتسيپاليتەت قىزمەتكەرلەرىنىڭ ايتۋىنشا، جەرگىلىكتى اتقارۋشى ورگاندارعا ءوز عيماراتتارى تارلىق ەتكەن. ءسويتىپ، ولار سىرتقى ۇيىمداردىڭ كەڭسەسىن جالداۋعا ءماجبۇر بولىپتى. سول سەبەپتى دە ولار اكىمشىلىك عيماراتىن كەڭەيتۋ كەرەك دەگەن شەشىم قابىلداعان.

سونىمەن قاتار، شەنەۋنىكتەردىڭ حالىق يگىلىگىنە جۇمىس ىستەۋى ءۇشىن اكىمدىك اينالاسىنا سۋبۇرقاقتار ورناتىلاتىن كورىنەدى. جوبالىق قۇجاتقا سايكەس، اكىمدىك اۋلاسىندا جالپى سانى 150-گە جۋىق اعاش، 115 ورىنعا جارىق قويۋ، سونداي-اق، تروتۋار بويى مەن دەمالىس ورىندارىنا 85 ورىندىق، 95 جاشىك ورناتىلماق.

ال، اكىمدىك اۋماعىنداعى قاۋىپسىزدىكتى قامتاماسىز ەتۋ ءۇشىن بەينەباقىلاۋ جۇيەلەرى جەرتولەدە ورنالاساتىن بولادى. ول ءۇشىن اكىمدىك تاعى 1 ميلليارد تەڭگە سۇراپ وتىر. جالپى، اكىمدىك قۇرىلىسى ەكى جىلعا جوسپارلانعان. ال، جاڭا اكىمدىك سالىنعاننان كەيىن اكىمشىلىك اپپاراتى زاماناۋي كومپتەرلىك جابدىقتارمەن، قىمبات اعاشتان جاسالعان جيھازدارمەن جانە شاعىن اسحانالارمەن جابدىقتالماق.

ايتا كەتەيىك، قازىر اتىراۋ وبلىسىندا 6 مەكتەپ اپاتتى جاعدايدا. ال، «نۇرسايا»، «جۇلدىز»، «الماگۇل» شاعىن اۋداندارىندا مەكتەپ جوق. سونىڭ كەسىرىنەن وقۋشىلار ءۇش اۋىسىمدا وقۋعا ءماجبۇر. قازىر اتىراۋ قالاسىندا ءۇش اۋىسىمداعى 13 مەكتەپ بار. ول مەكتەپتەر 9 566 وقۋشىعا ارنالعان. الايدا ول وقۋ عيماراتتارىندا 24 356 وقۋشى وقيتىن كورىنەدى. ال، ءۇش اۋىسىمدى مەكتەپتەردى جويۋ ءۇشىن تاعى اتىراۋ وبلىسىنا تاعى 20 مەكتەپ سالۋ قاجەت.

ءتۇيىن

اتىراۋ وبلىسى 20 مەكتەپكە مۇقتاج بولىپ وتىرعان كەزدە نۇرلان نوعاەۆ ءوزى وتىراتىن اكىمدىككە ارناپ ساراي سالعىزباق بولىپ جاتقانى قالاي؟ بۇل مەملەكەتتىك بيۋدجەتتى ماقساتسىز جۇمساۋ ەمەس پە؟ جوق الدە ەسكى عيماراتتىڭ استىنان سۋ شىقتى ما؟ ءبىز "6,3 ملرد. تەڭگەگە قانشا مەكتەپ سالۋعا بولار ەدى؟" دەگەن سۇراقتى تىكەلەي نوعاەۆ مىرزاعا جولداعىمىز كەلەدى.

اكىم-قارالار قىمبات سارايدا الشاڭ باسىپ جۇرگەندە بالالارىمىز نە سەبەپتى ءۇش اۋىسىمدا وقىپ ءجۇرۋى كەرەك؟ وسىعان جاۋاپ بەرسەڭىز نۇرلان مىرزا!

نۇربيكە بەكسۇلتانقىزى

Abai.kz