قاسىم-جومارت توقاەۆ ءوزىنىڭ سايلاۋالدى شتابىندا بولىپ، Exit poll قورىتىندىسىن جاريالاۋ راسىمىنە قاتىستى. ءارى Exit Poll ناتيجەلەرىنە ساي العاشقى مالىمدەمەسىن جاسادى.

Exit poll-دىڭ قورىتىندىسىنا سايكەس پرەزيدەنت سايلاۋىندا Nur Otan پارتياسىنىڭ اتىنان تۇسكەن كانديدات قاسىم-جومارت توقاەۆ 70,13% داۋىس جيناپ، وزگە ۇمىتكەرلەردەن وق بويى وزىق ناتيجە كورسەتتى.

"سايلاۋالدى كامپانيانىڭ وركەنيەتتى تۇرعىدا وتكەنىنە قۋانىشتىمىن. نەگىزىندە، بۇل سايلاۋالدى جوبالاردىڭ ءوزارا باسەكەلەستىگى بولدى. بۇل قازاقستانداعى ساياسي مادەنيەت دەڭگەيىنىڭ ايتارلىقتاي وسكەنىن كورسەتەدى. حالىق بىزگە سەنىم ارتىپ، ءوز تاڭداۋىن جاسادى. سوندىقتان الدىمىزدا اۋقىمدى جۇمىستار كۇتىپ تۇر", – دەدى توقاەۆ.

توقاەۆ ۇگىت-ناسيحات كەزەڭىنە قاتىسقان رەسپۋبليكالىق قوعامدىق شتاب مۇشەلەرىنە، بەلسەندى ازاماتتارعا جانە پارتيا جاقتاستارىنا اتقارعان جۇمىستارى ءۇشىن العىس ايتتى، ءارى ەلەكتورالدى ناۋقاننىڭ اۋقىمى مەن تەحنولوگيالىق مۇمكىندىگىن اتاپ ءوتتى.

"بۇكىل الەمدەگى سەكىلدى ءبىزدىڭ ەلدە دە ءتۇرلى جاعدايلار وزگەرىس ۇستىندە. الەمدىك قاۋىمداستىقتىڭ ءبىر بولشەگى بولعاندىقتان قازاقستانعا جاھاندىق وقيعالاردىڭ دا ىقپالى بولارى ءسوزسىز. سونىمەن قاتار ءبىز دە حالىقارالىق تۋربۋلەنتتى ۇردىستەرگە ىقپال ەتۋ وبەكتىسى بولا الدىق. سوندىقتان ەلىمىزدىڭ جارقىن بولاشاعى ءۇشىن جۇدىرىقتاي جۇمىلىپ جۇمىس ىستەۋىمىز كەرەك", – دەدى مەملەكەت باسشىسى.

قاسىم-جومارت كەمەلۇلى ءسوز سوڭىندا قازاقستاننىڭ بۇگىنگى جەتىستىكتەرى ەلباسى ەسىمىمەن تىعىز بايلانىستى ەكەنىن ەسكە سالدى.

"قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆ بۇكىل الەم مويىنداعان قۋاتتى، كوپ ۇلتتى مەملەكەت قۇردى. ءبىزدىڭ ەندىگى مىندەتىمىز – قولداعى بارىمىزدى قادىرلەپ، جەتىستىكتەرىمىزدى ساقتاپ، ورلەۋ مەن جاسامپازدىق جولىندا بولاشاققا باتىل قادام باسۋ", – دەدى توقاەۆ.

Abai.kz